
- muallif:
- Jasur Ahmedov
Irlandiyalik bokschi Lee Reeves 31 yoshida vafot etdi
Irlandiyalik bokschi Lee Reeves 31 yoshida vafot etdi. U 1-avgust kuni ringda olgan og‘ir miya jarohatidan so‘ng aniq 107 kun yashadi.
Uning yaqin do‘sti Jonathan O Brien bu xabarni ijtimoiy tarmoqda e’lon qildi, og‘ir yo‘qotishni qisqa, ammo larzali so‘zlar bilan tasvirlab berdi. Reevesning oilasi va do‘stlari uchun bu post nafaqat xabar, balki xayrlashuv edi.
16 g‘alaba (11 tasi nokaut), 2 mag‘lubiyat.
Raqamlar shunday. Ammo bu raqamlarning ortida o‘z vazn toifasida ko‘zga tashlanayotgan, ringdan tashqarida ham ommaga tanilgan sportchi turardi. 2023-yilda u “Survivor UK” loyihasida ishtirok etib, keng auditoriyaga tanilgan edi.
Fojia
Fojia 1-avgust kuni Dublin shahridagi 3 Arena majmuasida bo‘lib o‘tgan super yengil vazn jangida yuz berdi. Gary Cully bilan bahs 10-raundga qadar cho‘zildi. So‘nggi raund, so‘nggi daqiqalar, lekin aynan o‘sha payt Reeves nokautga uchradi.
U ringdan to‘g‘ridan-to‘g‘ri zambilga yotqizilgan holda olib chiqildi. Zalda jimlik cho‘kdi. Tomoshabinlar nafasini ichiga yutgancha, uning holatiga qarab qoldi. Reeves zudlik bilan Dublin shahridagi Beaumont Hospital shifoxonasiga yetkazildi. U yerda uning ahvoli “tanqidiy, ammo barqaror” deb baholandi.
Shifokorlar zudlik bilan miya jarrohligiga qo‘l urishdi. Reevesga shoshilinch operatsiya qilindi va u sun’iy ravishda keltirilgan koma holatiga o‘tkazildi. Hayot uchun kurash ringdan reanimatsiya bo‘limiga ko‘chdi.
Reabilitatsiya jarayoni
Reabilitatsiya jarayoni murakkab kechdi. Infeksiyalar rejalashtirilgan keyingi jarrohlik amaliyotlarini kechiktirdi, tiklanish yo‘lini yanada mashaqqatli qildi. Shunga qaramay, oktyabr oyiga kelib Reevesga kranioplastika — bosh suyagini tiklash bo‘yicha operatsiya qilindi. Bu kichik bo‘lsa-da, umid uyg‘otuvchi qadam edi.
Shundan so‘ng u oilasiga yaqin bo‘lishi uchun University Hospital Limerick shifoxonasiga ko‘chirildi. U yerda Reevesni nafaqat shifokorlar, balki tunu kun yonida bo‘lgan yaqinlari ham kurashga undab turdi. Har bir kun, har bir soat uning hayoti uchun navbatdagi raundga aylandi.
Ammo tana yana zarba oldi. O‘tgan hafta oxirida Reeves yana infeksiya bilan kurashishga majbur bo‘ldi. Bu safar organizm chidamadi. Dushanba kuni u hayotdan ko‘z yumdi.
Lee Reevesning hikoyasi raqamlar va statistikadan kattaroq. U ringda oxirigacha kurashgan, ringdan tashqarida esa tiriklik uchun yanada og‘irroq jang olib borgan sportchi sifatida esda qoladi. Endi uning ismi natijalar jadvalida emas, irlandiyalik bokschilar avlodlari xotirasida yashaydi.