Arsenalning keng qanot hujumchisi: Ferran Torresga navbat keladimi?

Mikel Arteta yozgi transfer oynasini kuchli boshladi. Bruno Guimaraes, Piero Hincapie, Illan Meslier va Christos Tzolis – bularning barchasi allaqachon Emirates yo‘lini tutgan yoki tutishga yaqin turgan nomlar. Maydonning markazi, orqa chizig‘i, hatto darvoza – hammasi bo‘yicha ish bor. Ammo bir pozitsiya bor, Arsenal hali ham yechim topa olmayapti.

Elita darajadagi keng qanot hujumchisi.

Yo‘qolib borayotgan nishonlar

Londonning shimoliy qismida aniq rejalar bor edi. Lekin bozor boshqacha o‘ynayapti.

Morgan Rogers uchun kurashda Chelsea oldinga o‘tib ketdi. Bradley Barcola bo‘yicha esa yo‘l deyarli yopildi: Paris Saint-Germain hujumchisi, xabarlar bo‘yicha, Emiratesdan ko‘ra Anfieldni afzal ko‘rgan. Arteta rejalaridagi asosiy bo‘g‘inlardan biri shunday qo‘ldan chiqdi.

Eng og‘ir zarba esa Vinicius Junior atrofida yuz berdi. Arsenal Real Madrid yulduzining shartnomasi yakuniga yaqinlashayotganini diqqat bilan kuzatib, imkon paytini kutayotgan edi. Klublar orasidagi kuch muvozanatini o‘zgartirishi mumkin bo‘lgan imkoniyat sifatida ko‘rilgan bu orzu bir zumda so‘ndi: Vinicius yangi ulkan shartnomaga imzo chekdi va endi 2032-yil iyunigacha Bernabeuda qoladi.

Shu bilan birga, Arsenalning asosiy variantlari birin-ketin yo‘qolib bordi. Qanotdagi “galaktiko” rejasi muzlab qoldi.

Tanish yuz – yangi reja

Shunday pallada sahnaga yangi nom emas, balki tanish futbolchi chiqmoqda: Ferran Torres.

CaughtOffside xabariga ko‘ra, Arsenal endi aynan Torres bo‘yicha “imkoniyatlarni o‘rganmoqda”. Sobiq Manchester City hujumchisi Arteta uchun begon emas – murabbiy uning sifatlarini, har tomonlama moslashuvchanligini yaxshi biladi. Hujum uchligining istalgan chizig‘ida o‘ynay olishi, aynan Arsenal izlayotgan narsa.

Torres uzoq vaqtdan beri PSG bilan bog‘lab kelinmoqda, lekin hozircha hech qanday kelishuv yakuniga yetgani yo‘q. Bu esa bozor eshigini ochiq qoldiradi. Aynan shu eshikdan kirib kelishga Arsenal urinmoqda.

CaughtOffside jurnalisti Mark Brus klub ichidagi suhbatlarga oydinlik kiritdi. Uning aytishicha, ikki alohida manba Arsenal Torres vakillari bilan bog‘langanini, yozgi harakatlari borasida xabardor qilib turishni so‘raganini bildirgan. Boshqa manbalar esa vaziyatni boshqacha talqin qilmoqda: ular Arsenal hozircha ichki doirada Ferran Torres nomini muhokama qilayotgani, jarayonni uzoqdan kuzatayotganini aytadi.

Ya’ni, rasmiy taklif yo‘q. Lekin nom stol ustida turibdi.

Torres – Barcelonaga chaqiriq

Bu orada futbolchining o‘zi ham vaziyatni yanada qizitib qo‘ydi.

Barcelona bilan AQShdagi mavsumoldi safarida bo‘lgan Torres klubga ochiq xabar yubordi: agar uni haqiqatan ham kerak deb bilishsa, buni amalda ko‘rsatishlari kerak. U Sportico nashriga bergan intervyusida shunday degan:

“Barca meni xohlayotganini ko‘rsatishi kerak. Ular kelib muzokara qilishlari mumkin, oxir-oqibat hammasi muhokama qilinadi.”

Bu oddiy gap emas. Bu – pozitsiya. Futbolchi klubdan tashabbus kutyapti, o‘zini bozor o‘rtasida emas, qaror qabul qiluvchi tomon sifatida ko‘rsatmoqda.

Torres yevropalik grandlar bilan bog‘lanayotgan mish-mishlarga ham befarq emas. Ayniqsa, Parc des Princes yo‘nalishidagi savollarga javob berar ekan, u shunday deydi:

“Har safar bunday jamoalar sizni xohlasa, bu yaxshi narsa.”

Shu bilan birga, u o‘zining hozirgi kuchli tomonini ham eslatib qo‘yadi – shartnoma muddati. Torresning so‘zlariga ko‘ra, u Barcelonada amaldagi shartnomaga ega va bu unga sabr bilan kutish, shoshilmay qaror qilish imkonini beradi: futbolda hamma narsa tez o‘zgarishi mumkin, lekin shartnomasi bor futbolchi o‘z yo‘lini o‘zi tanlash huquqiga ega.

Arsenal uchun nimasi muhim?

Arsenal uchun Torres – superyulduz rejasi barbod bo‘lganidan keyingi “B-reja” emas, balki murabbiy falsafasiga mos, amaliy variant bo‘lishi mumkin. Arteta uni Manchester City davridan biladi, pressing tizimiga moslashuvi, pozitsion hujumda har xil rolda ishlay olishi – bularning barchasi London klubi uchun katta ustunlik.

Savol bitta: Arsenal qanchalik jiddiy?

Hozircha gap ichki muhokamalar, agentlar bilan aloqa darajasida. Bozor esa kutmaydi. PSG ham jim turmaydi. Barcelona esa, Torresning o‘zi aytganidek, unga qanchalik ishonganini ko‘rsatishi kerak bo‘ladi.

Arsenal qanotdagi jumboqni hal qilish uchun qanchalik keskin qadam tashlashga tayyor – javob aynan shu yozda ma’lum bo‘ladi.