Arteta boshqaruvida Arsenal tibbiyot bo‘limi qayta qurildi
Premier League chempionligini himoya qilish arafasida Arsenal maydondan tashqarida ham keskin qaror qabul qildi. Mikel Arteta yozgi tanaffusda butun tibbiyot va performans tizimini deyarli boshidan tuzib chiqdi. Sabab bitta: asosiy futbolchilarni sog‘lom saqlash endi klubning eng katta ustuvor vazifalaridan biri.
So‘nggi mavsumlarda Arteta bir narsani qayta-qayta takrorlab keldi – chempionlik poygasida maydonga eng kuchli tarkib bilan chiqish uchun, yulduzlar jarohatlardan maksimal darajada himoyalangan bo‘lishi shart. Ammo amalda bu doim ham ishlamadi. Bukayo Saka, William Saliba, Kai Havertz va boshqalar mavsumning eng nozik pallalarida uzoq muddatli yo‘qotishlar qatoriga tushib qoldi. Natijada, London klubi hal qiluvchi uchrashuvlarga charchagan va yupqalashgan tarkib bilan kirib bordi.
Shu fon ortida klub ichida jiddiy silkinish boshlandi.
Tibbiyot bo‘limida tozalash
Champions League finalida Paris Saint-Germainga qarshi mag‘lubiyatdan ko‘p o‘tmay, sport tibbiyoti bo‘limi rahbari Dr Zafar Iqbal bilan xayrlashildi. Oradan ko‘p o‘tmay, klubning sport fanlari va performans bo‘yicha bosh mutaxassisi Tom Allen ham ketdi.
Iyun oxirida esa yana bir muhim ism – lead performance coach Sam Wilson klubni tark etdi. Bir qarashda, bu oddiy kadrlar almashinuviday ko‘rinishi mumkin. Aslida esa, bu Emirates ortida butun bir falsafaning yangilanayotganidan darak.
Arsenal o‘tgan mavsumdayoq tibbiyot bo‘limi ishini chuqur tahlil qila boshlagan edi. Ana shu ichki audit jarayonida Artetaning uzoq yillik do‘sti Joaquin Acedo jarayonning markaziga olib chiqildi. U klubda qayta qurilayotgan tizimda asosiy rollardan birini o‘ynayapti.
Arteta ketganlar haqida iliq gapirdi, lekin shu bilan birga, o‘zgarishlar zarur bo‘lganini yashirmadi.
“Avvalo, ularga klub, futbolchilar va shaxsan men uchun qilgan ajoyib ishlaridan minnatdorchilik bildirmoqchiman. Ular bizni juda yuqori darajaga olib chiqishdi, biz esa ayrim yo‘nalishlarda yanada rivojlanish va evolyutsiya qilishga qaror qildik,” – dedi u.
So‘zlar keskin emas, ammo ma’nosi aniq: Arsenal endi tibbiyot va performans bo‘limini ham raqobat maydoni deb ko‘ryapti.
Arteta davom etar ekan, qarorlarning og‘irligini yashirmadi: “Biz klub bo‘ylab hamma narsaga qayta nazar tashlashimiz kerak edi va o‘rta hamda uzoq muddatda bizni yaxshiroq qilamiz deb hisoblagan qarorlarni qabul qildik. Gap odamlar haqida ketayotganida, ular bilan mustahkam munosabatlar qurilgan bo‘lsa, bu juda og‘ir bo‘ladi.”
Yangi yuzlar, yangi falsafa
Tozalash ortidan Emiratesga yangi ism-shariflar kela boshladi. Real Betis safida head of rehabilitation sifatida ishlagan Eneko Angulo endi Arsenal tarkibida. Uning vazifasi – futbolchilarni jarohatdan qaytarish jarayonini zamonaviy talablar darajasiga ko‘tarish, qaytish muddatini qisqartirish, eng muhimi, qayta jarohatlanish xavfini pasaytirish.
Klub shuningdek yangi head doctor sifatida Aston Villa safidan ketgan Arnaldo Abrantesni jalb qildi. U oddiy shifokor emas. Abrantes – sobiq professional sprinter, 2008 yilgi Olimpiada o‘yinlarida Portugaliya sharafini himoya qilgan sportchi.
Futbol klubining bosh shifokori uchun noodatiy tarjimai hol. Aynan shuning uchun ham Artetani qiziqtirgan.
“U yaxshi atlet bo‘lgan, – deydi Arteta. – Biz tarkibni, jamoani, ichki munosabatlarni yangilashga, o‘yin qayerga qarab o‘zgarayotganini tushunishga harakat qilar ekanmiz, boshqa sifatlarni olib kirishni xohladik.”
Bu yerda murabbiyning asosiy g‘oyasi ko‘rinib turibdi: Arsenal endi futbolchini faqat jarohatlangan paytda davolash bilan cheklanmoqchi emas. Oldindan profilaktika, yugurish mexanikasi, tezlanish, tiklanish fiziologiyasi – bularning bari klub falsafasining bir bo‘lagiga aylanmoqda.
“Bu ham shundan biri – u o‘sha bosimni, o‘sha intensivlikni o‘zi boshidan kechirgan, narsalarni boshqacha his qilgan. Shu bilan birga, uning tajribasi va bilimlari ichida men juda qiziqqan jihatlar bor edi. Biz u to‘g‘ri tanlov deb hisobladik. U keltirayotgan narsalardan juda xursandman,” – deya qo‘shimcha qildi Arteta.
Chempionlik poygasida yashirin front
Arsenalning bu yozgi o‘zgarishlari transfer bozoridagi shov-shuvli bitimlar qatorida unchalik baland yangramasligi mumkin. Ammo chempionlik uchun kurashda maydon chetidagi bunday qarorlar ko‘pincha hal qiluvchi bo‘lib chiqadi.
So‘nggi yillarda top-klublar chempionlikni nafaqat yulduzlar soni, balki jarohatlar statistikasi bilan ham yutmoqda. Kim asosiy futbolchilarini aprel-may oylarigacha sog‘lom ushlab tursa, ko‘pincha kubokni ham o‘sha ko‘taradi.
Arteta aynan shu yashirin frontni mustahkamlashga kirishdi. Endi savol bitta: yangi tibbiyot va performans tizimi Arsenal yulduzlarini sog‘lom saqlashga, eng muhim pallada maydonga eng kuchli tarkib bilan tushishga yetarlimi?
