Aston Villa darvozasi o‘zgaradi: Zion Suzuki birinchi raqamga kelmoqda
Aston Villa nihoyat ko‘p kutilgan qarorni rasman tasdiqladi: Yaponiya terma jamoasi posboni Zion Suzuki klubga qo‘shildi. Bu oddiy rotatsiya uchun olingan ikkinchi darajali darvozabon emas. U birinchi raqamga kelmoqda.
Bu fikrni tajribali jurnalist Sam Tighe yana bir bor ta’kidladi. U Sky Sports efirida Villa rejasini ochib berdi: Suzuki klubga aniq shart bilan – asosiy darvozabon maqomida – kelmoqda.
Yillar davomida Villa uchun darvozadagi muhokama yo‘q edi. Emi Martinez – Villa Parkning ramziga aylangan, ko‘plab top-klublar qiziqqan, ammo har safar Birmingemda qolib ketgan darvozabon. Klub ham uni saqlab qolishni istar, kim kelishidan qat’i nazar, argentinalik o‘z o‘rnini yo‘qotmaydigandek tuyulardi.
Endi esa manzara o‘zgarmoqda.
Suzuki shartlari: “No.1 bo‘lmasam, kelmayman”
Suzuki transferi atrofidagi voqealar uning xarakterini ochib berdi. Tighe eslatganidek, uning Paris Saint-Germain safiga o‘tishi uchta sabab tufayli amalga oshmay qolgan, shulardan biri – unga asosiy darvozabonlik bo‘yicha aniq kafolat berilmagani.
U ijaraga berilib, chetga surib qo‘yilishni istamaydi. Ikkinchi darvozabon bo‘lib o‘tirishni ham xohlamaydi. Uning Aston Villa uchun rejasi juda aniq: o‘ynash, yetakchi bo‘lish, darvozani o‘ziga “mahkamlash”.
Shu bois Tighe fikricha, Villa Suzuki’ni Martinezning Juventusga o‘tishi barbod bo‘lib qolganiga qaramay, baribir olib kelmoqda. Ya’ni bu transfer Martinez ketishini kutib turuvchi ehtiyot chorasi emas, balki yangi sport loyihasining markaziy qaroridir.
Klub esa endi murakkab savolga duch kelgan: Emi Martinez bilan nima qilish kerak?
Martinez uchun bozor torayib bormoqda
Tighe ochiq tan oladi: mos variantlarni topish qiyinlashgan. Juventus endi variant emas. Atletico Madrid? Nazariy jihatdan ehtimol bor, lekin Jan Oblak hali ham u yerda va ispaniyaliklar faqat qiziqish bildirgan darajada qolgan.
Saudiya Arabistoni varianti o‘tgan mavsum Martinezning o‘zi tomonidan rad etilgan. Bu yozda fikri o‘zgarganmi – noma’lum. Turkiya esa odatdagidek tilga olinadi, ammo “katta to‘rtlik” allaqachon darvozabon bilan ta’minlangan.
Fenerbahce safida Ederson, Besiktas esa yaqinda Alexander Nubel bilan shartnoma imzoladi. Bunday sharoitda Martinezning o‘zi ham, Aston Villa ham real variantlarni qidirib, bozorni “tirnab” qidirishga majbur.
Shu orada klub ortga qaytmayapti. Suzuki bilan rejalar aniq, yo‘nalish o‘zgarmaydi. Villa rahbariyati vaziyatni o‘zi boshqarishga urinmoqda – agar bir kun kelib Martinez ketishga qaror qilsa, klub tayyor bo‘lmasa, qo‘l qovushtirib qolishni istamaydi.
Savol esa o‘tkir: jahon chempioni darvozabon zaxiraga tushib qoladimi yoki yoz oxirigacha unga mos darajadagi top-klub topiladimi?
Pape Sarr: Villa o‘rtada kuchayishni ko‘zlamoqda
Darvoza ortida bu qadar dramatik sahna kechayotgan bo‘lsa-da, Villa transfer bozorining boshqa chizig‘ini ham bo‘sh qoldirayotgani yo‘q. Klub markaziy chiziqda kuchayishni rejalashtirmoqda va nishonda – Tottenham yarim himoyachisi Pape Sarr.
Caught Offside xabariga ko‘ra, Spurs ma’lum shartlar bajarilsa, senegallik futbolchini sotish variantini ko‘rib chiqishga tayyor. Uning atrofida qiziqish yetarlicha: Al-Ahli allaqachon so‘rov yuborgan, Aston Villa va Brentford esa vaziyatni yaqindan kuzatmoqda.
Oldinroq Sarr uchun 30 million funt atrofida summa tilga olingan bo‘lsa, hozir Tottenham narxni oshirgan. Klub uni taxminan 50 million funt atrofida baholamoqda. Bunga sabab aniq: ular sotishga majbur emas, futbolchi 2030 yilgacha shartnoma bilan bog‘langan, demak, muzokaralarda ustunlik ularning qo‘lida.
Villa uchun bu nimani anglatadi? Agar klub Suzuki bilan darvozani qayta formatlayotgan bo‘lsa, Sarr transferi o‘rtadagi ritmni o‘zgartirishi, jamoani keyingi bosqichga olib chiqishi mumkin.
Bitta yozda darvozabon chizig‘ini yangilash, markaziy yarim himoyani qayta qurish – bu oddiy kosmetik o‘zgarish emas. Bu Aston Villa o‘zini Angliya va Yevropada boshqa darajadagi o‘yinchi sifatida ko‘rishni boshlaganini ko‘rsatmayaptimi?
