Barcelona transfer rejasi: Himoyachilarni izlash davom etmoqda
"Barcelona" yozgi qayta qurilishida hal qiluvchi burilishga kirib bordi. Klub sport direktori Deco oldidagi vazifa aniq: 48 soat ichida ikki yirik bitimni yopish, shu paytning o‘zida esa "Liverpool"ga ketgan Ronald Araujo qoldirgan bo‘shliqni to‘ldira oladigan darajadagi markaziy himoyachini topish.
U vaqt bilan poygada.
Rodri va Julian Alvarez bo‘yicha soat ishlayapti
Kataloniyaning "Sport" nashri ma’lumotiga ko‘ra, Deco Ispaniya terma jamoasi yarim himoyachisi Rodrining "Manchester City"dan transferini kechiktirmay, eng kechi chorshanbagacha yakunlashni rejalashtirgan. Gap faqat bitta futbolchi haqida emas. Argentina hujumchisi Julian Alvarez bo‘yicha ham muzokaralar yakuniy bosqichga kirgan, bitim 48 soat ichida yopilishi kutilmoqda.
Bu – yangi mavsum startidan avval tarkibni tubdan mustahkamlashga qaratilgan agressiv reja. Klub moliyaviy cheklovlar bilan yashayotgani ma’lum, lekin Deco va Hansi Flickning ambitsiyasi bundan kichigiga rozi emas.
Himoyachi uchun ruxsat berildi
Araujo "Liverpool"ga ketishi tasdiqlangach, Deco nihoyat markazga yuqori darajadagi himoyachi olishga to‘liq "yashil chiroq" yoqdi. Muzokaralar allaqachon bir necha nomzodlar bilan boshlangan.
Transfer oynasining yopilishiga uch haftadan kam vaqt qoldi. Reja sodda: oy oxirigacha himoya chizig‘ini yakuniy bo‘g‘in bilan to‘ldirish. Xato qilishga joy yo‘q.
Akademiya vakili Alvaro Cortes ichki variant sifatida kun tartibida qolmoqda. Lekin bu – faqat bozor real imkoniyat taklif qilmasa. Klub ichida aniq prinsip bor: agar darhaqiqat jozibador, yuqori darajadagi imkoniyat paydo bo‘lsa, Cortesni asosiy reja sifatida emas, balki zaxira rejasi sifatida ko‘rishadi.
Araujo bo‘lmasa, mavsum startida "Barcelona" markazda Cubarsi, Gerard Martin, Christensen va Eric Garcia bilan qoladi. Nemis mutaxassisi Hansi Flick Ericni chap qanot himoyachisi sifatida ham ko‘rmoqchi, bu esa Kounde uchun taktik juftlik bo‘lib xizmat qilishi mumkin. Ya’ni, resurs bor, lekin elit darajadagi rahbar himoyachi yetishmayapti.
Eng qiyin yo‘l: Cristian Romero
Ro‘yxat tepasida bitta ism turibdi: Argentina terma jamoasi himoyachisi, "Tottenham" markaziy himoyachisi Cristian Romero. "Barcelona" uchun ideal profil. Tajriba, agressiya, yuqori chiziqda o‘ynashga mos xarakter.
Ammo bu – eng qiyin variant.
Argentina manbalariga ko‘ra, hozircha kelishuvga erishish ehtimoli juda past. Futbolchining o‘zi bilan bog‘liq sabab emas: Romero qo‘lida "Arsenal" va "Inter Milan" takliflari bor, "Atletico Madrid" bilan esa muzokaralar juda ilg‘or bosqichda. Bozor raqobat bilan qaynayapti.
Asosiy to‘siq – narx. "Tottenham" uni 40 million yevrodan biroz yuqoriroq summa evaziga qo‘yib yuborishga tayyor, ijaraga berish variantini esa butunlay rad etgan. Bu esa "Barcelona"ning moliyaviy imkoniyatlarini hisobga olganda, juda og‘ir tosh.
Shunga qaramay, Romero "Barcelona"ga o‘tishni afzal ko‘rayotgani aytilmoqda. Uning agentlariga klubdan ketishi mumkin bo‘lgan futbolchilar ro‘yxati yetkazilgan, ya’ni "Camp Nou"dagi ichki tozalash bu transfer bilan bog‘lanishi mumkin. Lekin hozircha birorta aniq qadam tashlanmagan, bu esa "Barcelona"ni vaqt bo‘yicha sezilarli darajada ortda qoldirib yuborishi mumkin.
Murakkab yo‘l: Aymeric Laporte
Yana bir jiddiy nomzod – Ispaniya himoyachisi Aymeric Laporte, hozirda "Athletic Bilbao" sharafini himoya qilmoqda. Uning agentlari shartnomasidagi tovon puli nisbatan past ekanini ta’kidlashmoqda. "Athletic Bilbao" esa buni keskin rad etyapti.
Bu qarama-qarshilikning o‘ziyoq "Barcelona"ni ogoh qiladi. Klub allaqon o‘tgan yozda Nico Williams bo‘yicha urinish sababli basklar bilan munosabatlarini ancha sovutib qo‘ygan. Endi yana keskin muzokaralarga kirishish – diplomatik risk.
Agar Laporte bo‘yicha aniq raqam paydo bo‘lsa, tovon puli rasmiylashtirilsa va vaziyat tiniqlashsa, "Barcelona" rasmiy taklif yuborishga tayyor. Hozircha esa manzara murakkab: noaniq shartlar, keskin pozitsiyalar va allaqachon taranglashgan munosabatlar bu transferni xavfli o‘yin darajasiga olib chiqmoqda.
Tanlov mezoni: faqat haqiqiy raqobatchilar
Dekoning stolida takliflar ko‘p. Ayniqsa, mavsum oxirida ijaraga ketishi mumkin bo‘lgan "Premier League" futbolchilari bo‘yicha. Bozor "oxirgi kun" variantlari bilan to‘lib-toshgan.
Lekin Flick va Deco o‘rtasida bitta kelishuv bor: sifatdan voz kechilmaydi. Transfer faqat ikki shart bajarilganda amalga oshadi – moliyaviy tomondan maqbul bo‘lishi va kelayotgan futbolchi darhol asosiy tarkib uchun kurashishga qodir bo‘lishi kerak. Shunchaki chuqurlik uchun, "rotatsiya uchun" olingan himoyachi varianti kun tartibidan chiqarilgan.
"Barcelona" uchun bu yoz endi faqat tarkibni to‘ldirish masalasi emas. Bu – yangi davrning qanchalik tez va og‘riqsiz boshlanishini belgilab beradigan sinov. Uch haftalik oynada to‘g‘ri markaziy himoyachini topa oladimi yoki Araujo soyasi butun mavsum bo‘yı "Camp Nou" ustida osilib turadimi?
