Christian Pulisic: San Siroda qayta tug‘ilgan yulduz
Stamford Bridgedagi yillar unga Chempionlar Ligasi kubogini berdi, lekin hech qachon to‘liq ishonch emas. “Chelsea” uni hech qachon haqiqiy tayanch sifatida qabul qilmadi, Pulisic esa 2023-yilda San Siro sari yo‘l olganida, bu ajralish ikki tomon uchun ham yengillikdek tuyuldi.
Italiyadagi “ish safar”i esa boshqa sahna bo‘ldi. “Milan” libosida u shaxsiy statistikasini yangiladi, gol borasida eng sermahsul mavsumlarini o‘tkazdi. 27 yoshli, maydonda hamma joyda paydo bo‘ladigan, turli pozitsiyalarda o‘ynay oladigan bu futbolchi tezda “Serie A” muxlislarining ko‘nglini zabt etdi. Unga bo‘lgan ishonch, undan kutilayotgan ish hajmi, mas’uliyat – bularning barchasi unga mos tushayotgandek ko‘rindi.
Ammo bir savol osilib turibdi: bu qanchaga cho‘ziladi?
“Milan” taklif qilgan yangi shartnoma bir necha oydan beri stol ustida yotibdi. Imzo esa yo‘q. Har bir imzolanmagan kun bilan eshik birozroq ochiq qolmoqda. Shunday paytda, bosim ostida porlay oladigan, klubu va terma jamoasi ranglarida yetakchilik yukini ko‘tarib kelayotgan “Captain America”ga Yevropaning yirik klublari ko‘z tikishi tabiiy.
Shu qatorda “Liverpool” ham bor. “Anfield”da “Egyptian King” – Mohamed Salah ketdi, o‘ng qanotda ulkan bo‘shliq paydo bo‘ldi. Zamonaviy klub afsonasini qanday almashtirish mumkinligi haqida Merseysaydda kun bo‘yi bahslar ketmoqda.
Pulisic bu bo‘shliqni to‘ldira oladimi?
Uning o‘yini – tinimsiz pressing, chiziq bo‘ylab yugurish, keskin reydlar va golga bo‘lgan ishtiyoq. Ko‘p mezon bo‘yicha “Liverpool” profili bilan mos tushadi. Aynan shuning uchun ham sobiq AQSh terma jamoasi himoyachisi Jonathan Spector uni Mersisayd uchun to‘g‘ri nomzod deb biladi. U GOAL bilan UFL on mobile hamkorligida suhbatda shunday deya ta’kidlagan: “Men ham shunday ko‘raman, u yerda… ular qarshi hujum deb atalmaydigan, lekin tezlikka asoslangan o‘yin o‘ynashadi, bu esa Pulisic juda yaxshi bajara oladigan narsa”.
Spectorning fikricha, himoyachi uchun Pulisicga qarshi o‘ynash – eng yomon ssenariy: u dadil, raqibga tik yuguradi, tez, chaqqon, yo‘nalishini bir zumda o‘zgartira oladi. Bunday futbolchi bilan birga qolish – har bir himoyachi uchun azob.
Londondagi muvaffaqiyatsizlik saboqlari
“Chelsea” davrida u bu darajadagi tahdidni doimiy ravishda ko‘rsata olmadi. Spector bunga ochiq baho beradi: Pulisic “Stamford Bridge”dagi kutilgan darajada mahsuldor bo‘lmadi. Bunday klublarda esa ikkinchi imkoniyatlar kam. “Chelsea”, “Man United”, “Man City” – bu darajadagi jamoalar mos kelmagan futbolchilardan tezda voz kechish qudratiga ega.
Spector uchun asosiy masala – vaqt va moslik. To‘g‘ri futbolchi, to‘g‘ri murabbiy, to‘g‘ri tizim, to‘g‘ri lahza. U shuni urg‘ulaydi: yaxshi futbolchini tanlash oson, hatto oddiy muxlis ham buni qila oladi. Eng qiyin narsa – aynan o‘sha futbolchi ayni paytda o‘sha klub uchun to‘g‘ri mos tushadimi, yo‘qmi, shuni aniqlash.
Pulisic uchun “Chelsea”da bu kombinatsiya hech qachon to‘liq yig‘ilmadi. U yerda u na vaqt, na tizim, na rol nuqtai nazaridan ideal joyni topa olmadi. Spector aynan shuning uchun ham amerikalik yulduz qiynalganini, klub uslubi unga unchalik ham mos kelmaganini aytadi.
Endi esa, San Siroda o‘zini qayta kashf etgan Pulisic uchun yangi sahifa ochilishi mumkin. “Liverpool”da Jurgen Klopp davridan keyingi qayta qurilish, Salahdan keyingi davr, yangi hujum chizig‘i – bu fon amerikalik vinger uchun ham imkoniyat, ham xavf.
Mamlakat kutgan mundial va ichkaridagi alam
Klub darajasidagi kelajak muhokama qilinayotgan bir paytda, Pulisic yaqinda o‘zining eng og‘ir yozlaridan birini boshdan kechirdi. 2026-yilgi Jahon chempionati – uyda, o‘z muxlislari oldida, hammasi orzu qilgandek bo‘lmadı. AQSh mezbonlardan biri sifatida musobaqani 1/8 finalda tark etdi, terma jamoaning yetakchi futbolchilari, tabiiyki, tanqid ostida qoldi.
Pulisic ham bundan chetda qolmadi. Spectorning fikricha, u hali ham AQSh terma jamoasining bosh ramzi, USMNT uchun talisman bo‘lib qolmoqda. U Pulisic haqida gapirar ekan, yana bir-ikki mundialda u yetakchi bo‘lib o‘ynashi mumkinligini aytadi. Shu bilan birga, bu safargi turnirni uning eng yaxshi Jahon chempionati deb bo‘lmasligini ham tan oladi.
Muammo ritmda bo‘ldi. Pulisic barcha o‘yinlarda maydonga tushmadi, doimiy o‘yin amaliyoti va ritmni topa olmadi. Mundial davomida eng yaxshi jamoalar va eng yaxshi futbolchilar o‘yindan-o‘yinga kuchayib boradi, har bir uchrashuvda o‘z sifatini yanada yaqqolroq ko‘rsatadi. Pulisic esa bu izchil ritmni ushlay olmadi, o‘yinidagi uzluksizlik yetishmadi.
Shunga qaramay, Spector tanqidlarning bir qismini haddan tashqari keskin deb biladi. Uning fikricha, Pulisicni o‘tmishdagi AQSh yulduzlari bilan faqat shu qisqa turnir asosida taqqoslash adolatdan yiroq. Jahon chempionatida asosiy yulduzlardan mo‘’jiza kutish odatiy hol, lekin bu har safar ham ro‘y bermaydi.
Spector baribir bir narsani e’tirof etadi: Pulisic ayrim lahzalarda juda xavfli ko‘rindi, raqiblar uchun doimiy tahdid bo‘lib qoldi. Ammo o‘zi ham tan olsa ajab emas – bu uning eng yaxshi mundiali emasdi. Eng ko‘p xafa bo‘layotgan odam, ehtimol, aynan o‘zi.
Endi nima bo‘ladi?
Shu ichki alam, uy mundialidagi muvaffaqiyatsizlik va klubdagi ochiq qolayotgan kelajak – bularning bari Pulisicni yana bir katta qadamga undashi mumkin. U allaqachon Germaniyada ulg‘aydi, Angliyada yonib-pishdi, Italiyada qayta tug‘ildi. Savol endi bitta: uning keyingi manzili qayer bo‘ladi?
San Sirodagi hayotini davom ettiradimi? Yoki Anfield chiroqlari, “You’ll Never Walk Alone” sadolari va Salahdan bo‘shab qolgan qanot uni o‘ziga chorlayaptimi?
