Crystal Palace va Manchester City: Xavotir va Ishonch
“Crystal Palace” mavsumni xohlaganidek boshlab qo‘ya olmadi. Safarda “Everton”ga qarshi sust, ishonchsiz o‘yin, maydondagi ikkilanib qolish – bu klub atrofidagi kayfiyatni ancha og‘irlashtirdi. Eng katta xavf esa natijadan ham ko‘ra chuqurroq: transfer oynasi yopilmasidan oldin asosiy futbolchilarni boy berish ehtimoli.
Ism eng ko‘p tilga olinayotganlardan biri – Ismaila Sarr. Unga “Liverpool”ning qiziqayotgani aytilmoqda. Bu – London klubi uchun xavotirli signal. “Palace” o‘z o‘yinini qayta tiklashi, ochkolar jamg‘arishi mumkin, lekin bir narsani aniq bilishadi: bu oynada eng yaxshi futbolchilarni qo‘ldan chiqarish – o‘z qo‘li bilan o‘zni pastga tortish degani.
Shunga qaramay, jamoa ichida umid bor. Hujum chizig‘ida gol topish salohiyati seziladi. Hali ham bu jamoa raqibni bitta zarba bilan jazolay oladigan tarkibga ega. Savol faqat shunda: bu imkoniyatni qachon va qaysi bosqichda ishga solishadi?
“Manchester City”: g‘alaba bor, lekin ritm izlanmoqda
“Manchester City”ning “Bournemouth” ustidan g‘alabasi kutilgan natija bo‘ldi, ammo o‘yin mukammal emasdi. Pep Guardiola jamoasi odatdagi ravon, avtomatik harakatlanadigan mexanizmga o‘xshamadi, ba’zi epizodlarda ritm buzilib, pressingda kichik uzilishlar ko‘rindi.
Bunga sabab bo‘lgan taktik tajribalardan biri – Mark Guehi’ning yarim himoyada qo‘llanishi. Bu qaror ko‘pni o‘ylantirdi. Ayniqsa, tabiiy markaziy yarim himoyachi bo‘lgan Mateo Kovacic o‘rindig‘ida qolganini ko‘rganlar uchun. Guardiola yana bir bor o‘z tizimini yangilashga urinmoqda, lekin bu jarayon muayyan “g‘ichirlash”siz o‘tmayapti.
Endi esa e’tibor yoshlik va energiyaga qaratildi. Tarkibga qo‘shilgan Ayyoub Bouaddi – klub kelajagi sifatida ko‘rilayotgan futbolchi. Undan darhol mo‘’jiza kutish adolatdan bo‘lmaydi. Unga moslashish, ritmni his qilish, murabbiy talablariga ko‘nikish uchun vaqt kerak bo‘ladi. “City” esa hozir natijani ham, yangilanishni ham bir vaqtda talab qiladigan bosqichda.
Shu fon’da ham bir haqiqat o‘zgarmaydi: bu jamoa g‘alaba qozonishni biladi. Hatto o‘yini “chayqalib” turgan paytda ham.
Haaland javob berishga tayyor
Erling Haaland o‘tgan turda gol ura olmadi. Bu holat odatda boshqa hujumchilar uchun oddiy kun bo‘lishi mumkin, lekin norvegiyalik uchun emas. U har bir “quruq” o‘yindan keyin maydonga boshqa kayfiyatda qaytadi – xuddi qarzdorlikni yopishga kelayotgandek.
Shu bois “City”ning navbatdagi uchrashuvi ham aynan Haaland atrofida aylanishi ehtimoli katta. Himoyachilar uning har bir harakatini kuzatadi, lekin u bitta epizod, bitta bo‘sh zona bilan ham o‘yinni hal qilib qo‘yishi mumkin. Uchrashuv “sayr” bo‘lmaydi, raqib qarshilik ko‘rsatadi, ammo “City” odatda shunday bosimli vaziyatlarda o‘z sinfini ko‘rsatadi.
Bosim asta-sekin oshadi, ritm topiladi, va oxir-oqibat sifat o‘z so‘zini aytadi. Shunga ko‘ra, Chris Sutton ushbu uchrashuv uchun o‘z hisobini aniq aytdi: 1–3.
Savol endi bitta: raqib chiday oladimi yoki “City” yana bir bor Angliyada kim xo‘jayinligini eslatadimi?
