Curtis Jones: 16 yillik “Liverpool” ertagi yakunlandi

Curtis Jones nihoyat xayr dedi. “Liverpool” bilan 16 yil davom etgan aloqasi tugadi, u Italiyaga – “Inter Milan” safiga yo‘l oldi. Taxminan 30 million funtlik bitim bilan.

Bu shunchaki transfer emas. Bu – bolalik orzusini shu klubda yashab ko‘rgan, endi esa boshqa qit’a futboliga yo‘l olayotgan futbolchining yopilgan bobidir.

Akademiyadan Anfield yulduzigacha

Jones “Liverpool” akademiyasiga hali bola paytida kelgan. O‘sha payt kichik yigitning orzusi bitta edi – asosiy jamoa libosida maydonga tushish. Oradan yillar o‘tdi, u bu orzuni nafaqat ushladi, balki uni to‘liq yashadi.

U “Liverpool” tarkibida 200 dan ortiq o‘yin o‘tkazdi, 22 ta gol urdi. Eng muhimi – u oltita yirik sovrin yutgan avlodning bir qismi bo‘ldi. Ikki marta Premyer liga chempionligiga erishgan tarkibda bo‘lish har qanday akademiya shogirdi uchun orzu darajasidagi yutuq.

25 yoshida u allaqachon klub tarixining muhim bo‘limiga o‘z ismiga kichik bo‘lsa-da, iz qoldirib ulgurdi.

“Bu klub – mening hayotimning o‘zi”

Transfer e’lon qilingach, Jones ijtimoiy tarmoqlarda “Liverpool” muxlislariga murojaat qildi. Undagi ohang – minnatdorlik va tugamayotgan sog‘inch aralash hissiyot.

“16 yildan so‘ng xayr aytish vaqti keldi”, deb yozdi u. “Bu yerga bolaligimda, ‘Liverpool’ uchun o‘ynash orzusi bilan kelganman va bu orzuni yashash baxtiga muyassar bo‘ldim”.

U klubni faqat ish joyi emas, hayotining markazi sifatida tasvirladi. “Bu klub men bilgan hamma narsa edi. Bu yerga bola bo‘lib keldim, endi esa o‘z oilam bilan erkak bo‘lib ketayapman. Bu yerda hayotimning qanchalik katta qismini o‘tkazganimni shundan ham bilsa bo‘ladi”, deya yozdi u.

Jones uchun bu 16 yil faqat maydon bilan cheklanib qolmadi. U debyut qildi, sovrinlar yutdi, unutilmas lahzalarni boshdan kechirdi, otalik baxtini tatidi. “Qizim aynan shu yerda tug‘ilgani bu joyni yanada maxsus qiladi. Endi ‘Liverpool’ faqat mening hikoyamning emas, oilam hikoyasining ham bir qismi”, deb ta’kidladi u.

Ichkaridagi odamlarga, ko‘rinmas qahramonlarga rahmat

Jones xayrlashuv maktubida faqat murabbiylar va jamoadoshlarni emas, ko‘zga ko‘rinmaydigan, ammo klubni har kuni harakatda ushlab turgan insonlarni ham unutgani yo‘q. Akademiya murabbiylari, shtab a’zolari, Anfield ortida ishlaydigan ko‘plab xodimlar – barchasiga alohida minnatdorlik bildirdi.

“Yillar davomida birga kiyinish xonasini bo‘lishgan barcha yigitlarga rahmat”, deb yozdi u. “Men aql bovar qilmas darajada kuchli futbolchilar bilan o‘ynadim, umr bo‘yi davom etadigan do‘stliklar orttirdim”.

So‘ng navbat tribuna egalariga yetdi. Muxlislar u uchun alohida bo‘lim edi. “Menga doim ishongan va yonimda bo‘lgan muxlislarga rahmat. Men har doim sizlardan biriman”, dedi Jones.

Yangi bob – “Inter Milan”

Endi oldinda yangi sinov. Yangi mamlakat, yangi liga, yangi kiyinish xonasi. U buni yashirmaydi: bu o‘ziga va oilasiga ochilayotgan yangi bo‘lim.

“Endi men va oilam uchun yangi chaqiriq, yangi bob va men oldinda turgan narsalar uchun hayajondaman”, deya yozdi u.

Shu bilan birga, u bir haqiqatni qayta-qayta urg‘uladi: “Liverpool” undan ketmaydi. “Bu klub men uchun doim ulkan bo‘lib qoladi. Bu yerga orzu bilan kelganman, endi esa o‘sha orzuni yashab ketayapman”, dedi u.

So‘nggi satrlar esa 16 yillik yo‘lni bir jumlada yig‘di: “Bu yerda o‘tgan 16 yilimda ozgina bo‘lsa-da hissasi bo‘lgan har bir insonga chin dildan rahmat. Men buni hech qachon unutmayman”.

Va, albatta, yakunda bitta qisqa, ammo hamma gapni aytib beradigan yozuv: “YNWA”.

Endi savol bitta: San Siro osmoni ostida u yana qanday hikoya yozadi?