Enzo Fernándezning Chelsea'dagi kelajagi xavf ostidami?
"Luton"ga qarshi EFL Cup uchrashuvi arafasida eng katta yangilik natija emas, balki bir ism bo‘ldi. Enzo Fernández. Yaqinda ham jamoaning markazida bo‘lgan argentinalik bu safar umuman zayavkaga ham kiritilmadi.
Bu tasodifga o‘xshamadi. Ayniqsa, Angliyada "Manchester City"ning unga qiziqayotgani haqida gap-so‘zlar kuchayayotgan bir paytda.
Alonso qarori va tushuntirishi
"Marca" xabariga ko‘ra, Enzo yozgi transfer oynasi boshlanishidan oldinning o‘zidayoq "Stamford Bridge"ni tark etish istagini bildirgan. Endi esa Xabi Alonso uni "Luton"ga qarshi o‘yinda butunlay chetda qoldirdi.
Ispaniyalik mutaxassis buni keskin rad etib, qarorni faqat futboliy omillar bilan izohladi. U Enzoni "juda professional" futbolchi sifatida ta’rifladi, mashg‘ulotlarda o‘zini yaxshi ko‘rsatishini alohida urg‘uladi.
Alonso fikricha, bu kechada rotatsiya va o‘yinning o‘ziga xos talablari ustun bo‘lgan. Ba’zi futbolchilarga nihoyat daqiqa berish, boshqalarga esa nafas rostlash zarur edi.
Matbuot anjumanida u qisqa, lekin aniq javob berdi: bu qaror faqat shu uchrashuv haqida bo‘lgan.
"It was simply about today's match. We have other players who need minutes to play," — dedi u o‘yindan so‘ng bo‘lib o‘tgan matbuot anjumanida.
Qachon yakuniy qarorga kelgani so‘ralganda esa, Alonso ikkilanmadi: bu fikr chorshanba oqshomidayoq shakllanganini aytdi.
"City" soyasi
Angliyadagi manbalarga ko‘ra, "Manchester City" transfer oynasi yopilishidan oldin Enzo Fernández bo‘yicha taklif tayyorlashni ko‘rib chiqmoqda.
Shu fon’da "Luton"ga qarshi zayavkadan tashqarida qolish boshqacha ko‘rinadi. Oddiy rotatsiyadek emas, balki katta transfer sahnasidan oldingi sokin pauza singari.
Alonso esa hozircha vaziyatni jilovlab turibdi. U Enzoga eshiklar hanuz ochiq ekanini aytdi va yakshanba kuni "Stamford Bridge"da bo‘lib o‘tadigan "Brighton"ga qarshi liga uchrashuvida uni qayta maydonda ko‘rish mumkinligini bildirdi: Enzo yaxshi mashg‘ulot o‘tayotgani, unga bu borada e’tirozi yo‘qligini ta’kidladi.
Hozircha rasmiy hech narsa yo‘q. Lekin argentinalik yulduzning klubdan ketish istagi, "City"ning qiziqishi va EFL Cup o‘yinidagi yo‘qligi bir-biriga ulanib, "Chelsea"ning yozgi rejalari haqida yanada keskin savollar tug‘dirmoqda.
Endi hammasi transfer oynasining so‘nggi kunlariga borib taqaladi: "Chelsea" Enzoni ushlab qola oladimi yoki "Etihad"dagi yangi sahifa uchun yo‘l ochiladimi?
