Enzo Maresca: Pepdan keyin kelish – sharaf
Enzo Maresca: “Pepdan keyin kelish – bu bosim emas, sharaf”
Pep Guardiola bilan xayrlashgan Manchester City yangi davrga qadam qo‘yar ekan, klubni endi Enzo Maresca boshqaradi. Italiyalik murabbiy o‘zining ilk matbuot anjumanidayoq ohangni aniq belgilab oldi: bu lavozim, avvalo, sharaf.
“Birinchi navbatda aytishim kerakki, bu – imtiyoz, sharaf”, – dedi u City bosh murabbiyi sifatidagi birinchi chiqishida.
“Ko‘p marta aytganman: so‘nggi 20–25 yil ichida Pepni dunyodagi eng yaxshi murabbiy deb hisoblayman. Lekin bu baribir chaqiriq. Yoqqan tomoni ham shu. Bu sharaf”.
Guardiola Etihaddagi o‘n yillik hukmronligi davomida 20ta sovrin yutib, klub tarixini tubdan o‘zgartirib ketdi. Shunday merosdan keyin lavozimni qabul qilish – har qanday murabbiy uchun xavfli maydon. Futbol olami bunga misollarga boy: Manchester United, Alex Ferguson ketganidan beri, hali ham eski cho‘qqisiga qayta olmayapti.
City esa boshqacha yo‘l tanlagan klub sifatida ko‘rilmoqda. Maresca aynan shu tizimga suyanadi.
“Menimcha, bu yerda tashkilot darajasi eng asosiy omil”, – dedi u.
“Ular 17 yil ichida atigi uchta murabbiy bilan ishlashgan. Bu odatiy hol emas, deyarli bo‘lmaydigan narsa. Shuning o‘zi ham biz bu yerda juda yaxshi ish qila olishimizga ishonch beradi”.
Guardiola iste’fosidan keyin ko‘pchilik Cityning ritmi buziladimi, degan savolni o‘rtaga tashlagan edi. Klub esa bunga qarshi oldindan tayyorgarlik ko‘rgandek harakat qildi: ichki struktura, qarorlar zanjiri va murabbiy tanlovida keskin burilish emas, izchillikni tanladi. Maresca avvalroq City tizimida ishlagan, shuning uchun bu binoning poydevori unga begona emas.
Uning so‘zlarida haddan ortiq va’da yoki balandparvoz shiorlar yo‘q. Lekin bir jihat yaqqol seziladi: u o‘zini Pepning soyasida emas, uning qurib ketgan tizimi ichida, ammo o‘z yo‘lini topishi kerak bo‘lgan murabbiy sifatida ko‘rmoqda.
Endi savol oddiy: Guardiola davrida yuksaklikka chiqqan City, Maresca qo‘l ostida shu balandlikni ushlab qola oladimi – yoki bu yangi bob butun Premyer liganing kuch muvozanatini yana bir bor silkitadimi?
