Eron futbolchilari Avstraliya fuqaroligini oldi
Eron terma jamoasi sobiq futbolchilari Fatemeh Pasandideh va Atefeh Ramezanisadeh uchun chorshanba oddiy marosim emasdi. Bu kun ular uchun yangi hayotning rasmiy boshlanishi bo‘ldi. Ular bir paytlar Vatanida “xoin” tamg‘asi bosilgan sportchi sifatida tilga olingan bo‘lsa, endi Avstraliya fuqaroligini olganidan faxrlanib turibdi.
Ikki futbolchi Kanberrada Ichki ishlar bo‘yicha vazir Tony Burke ishtirokida o‘tgan marosimda Avstraliya pasportiga ega bo‘ldi. Ular mart oyida o‘tgan Women’s Asian Cup paytida Eron delegatsiyasidan bo‘lgan yetti nafar ayol orasida edi – o‘sha mashhur norozilik chog‘ida milliy madhiyani kuylashdan bosh tortgan guruh.
O‘yin oldidan madhiyaga qo‘shilmaslik qarori Eron ichida siyosiy bo‘ron ko‘targan, xalqaro maydonda esa ularni jasorat ramziga aylantirgan edi. AQSh prezidenti Donald Trump ularning qadamini ochiq olqishlagan bo‘lsa, Tehron bu ishni obro‘ga putur yetkazuvchi hodisa sifatida qabul qildi. Turnir mezboni bo‘lgan Avstraliyadan boshpana so‘rashi esa bosimni yanada oshirdi.
Shunga qaramay, yetti nafardan besh nafari keyinchalik yo‘lidan qaytdi va uyiga – Eron tomon yo‘l oldi. Pasandideh va Ramezanisadeh esa qolishni tanladi. Orqaga yo‘lni yopdi.
Atefeh Ramezanisadeh marosimdan so‘ng tarqatilgan bayonotida his-tuyg‘ularini yashirmadi: “Kecha men uchun haqiqatan ham juda maxsus va unutilmas kun bo‘ldi. Avstraliya fuqarosi bo‘layotganimdan faxrlanaman va chuqur minnatdorman”, – dedi u.
Fatemeh Pasandideh ham bu lahzaning og‘ir yo‘l bilan kelganini eslatdi: “Boshimizdan o‘tganlar, duch kelgan barcha sinovlardan keyin bu onning qadri so‘z bilan ifoda etib bo‘lmaydigan darajada katta”, – deya ta’kidladi u.
Ularning yangi hayotga kirib borishi ham futbol maydonidan boshlandi. Boshpana so‘raganidan atigi bir hafta o‘tib, ular Avstraliya klubi Brisbane Roar bilan mashg‘ulotda jilmayib tushgan suratlari bilan paydo bo‘ldi. Klub chorshanba kuni ularni fuqarolik bilan tabriklab, yo‘llarini ochiq qolishini bildirdi.
Klub matbuot kotibi ularning boshidan o‘tgan davrni qisqa, ammo og‘ir ta’rif bilan ifodaladi: “Fevraldan buyon ular boshdan kechirgan narsalar ko‘pchilik butun umr davomida ham ko‘rmaydigan darajada ko‘p”, – dedi u. “Ularni mana shu nuqtaga yetib kelganini ko‘rish – bu yerda, Brisbane Roar dagi barchamiz uchun oz bo‘lsa-da hissa qo‘sha olganimizdan faxrlanishga arzigulik holat”.
So‘ngra u bitta jumla bilan ularning yangi manzilini aniq belgilab berdi: “Queensland endi ularning uyi. Agar qachondir yana mashg‘ulot libosini kiyib, biz bilan maydonga qaytishni istashsa, bu eshik ular uchun doimo ochiq qoladi”.
Bu orada Eron tomon qaytgan delegatsiya a’zolarining taqdiri hanuz qorong‘i. AFP muxbirlari ularni Turkiyadan avtobusda o‘tishayotganda ko‘rgan: milliy terma jamoa sport kostyumida, sochlari ro‘mol bilan yopilgan holda. Chegaradan o‘tishi bilan rasmiylar ularni siyosiy ramzga aylantirishga shoshildi.
Eron parlament spikeri Mohammad Bagher Ghalibaf ijtimoiy tarmoq X orqali ularga “Vatan farzandlari” deya murojaat qildi va “Eron xalqi ularni quchoq ochib qarshi olishini” yozdi. Uning ta’rificha, qaytgan futbolchilar “Eron dushmanlarini ko‘nglini sovutib, Eronni nishonga olgan unsurlar bosimi va qo‘rqitishiga taslim bo‘lmagan”.
Shunday fon ortida Pasandideh va Ramezanisadehning yo‘li butunlay boshqa tomonga burildi. Ular uchun endi milliy madhiyani kuylash yoki kuylamaslikdan ham kattaroq savol bor: yangi Vatanda futbol orqali o‘z hayotini qayta yozib chiqish imkoniyatidan qay darajada foydalana olishadi?
Javobni vaqt beradi. Ammo bitta narsa allaqachon aniq: ular Avstraliyaga muxlis sifatida emas, o‘z taqdirini qo‘liga olgan futbolchilar sifatida keldi.
