Fermin Lopez: Valensiyada porlagan yulduz
Valensiyadagi kecha Fermin Lopez uchun oddiy o‘yin emasdi. Bu – mavsum startidagi yorqin parvoz tasodif emasligini isbotlagan sahna bo‘ldi.
Elche darvozasiga dubl, Athletic Bilbao ustidan g‘alabada gol. Endi esa Mestalla. Bu safar u raqamlarni yanada balandroqqa ko‘tardi: bitta gol, ikkita aniq golli uzatma, Lamine Yamalning bekor qilingan goliga olib kelgan hal qiluvchi pas va ustunga tegib qaytgan zarba. Bitta o‘yinda yarim mavsumga yetadigan ta’sir.
Maydonda har bir xavfli hujumning izida bitta ism ko‘rindi: Fermin. U har bir pressingda, har bir tezkor hujumda, har bir keskin uzatmada o‘rtada paydo bo‘ldi. Hansi Flick uchun esa bu o‘yin bir narsani aniq ko‘rsatdi – bu yigitni zaxiraga tashlab bo‘lmaydi.
Flick uchun shirin boshog‘riq
Ispaniyaning "AS" nashri qayd etganidek, Valensiyaga qarshi o‘yin Ferminning asosiy tarkibdagi uchinchi starti bo‘ldi. Rayo Vallecano bilan uchrashuvda u zaxiradan turib tomosha qilgan edi, endi esa u to‘g‘ridan-to‘g‘ri Dani Olmo bilan raqobatda oldinga chiqib oldi.
Bu raqobat haqiqiy. Olmo ham javobsiz qolmadi – atigi o‘n daqiqada ikkita golli uzatma bilan o‘z sinfini yana bir bor ko‘rsatdi. Lekin hozircha ritm, intensivlik va o‘yin taqdiri uchun mas’uliyat bo‘yicha maydonda birinchi bo‘lib Fermin ko‘rinmoqda.
Flick uchun bu murakkab, lekin yoqimli muammo. Bunday formadagi futbolchini tushirib yuborish – deyarli futboliy gunoh. Ayniqsa, u har uchrashuvda o‘yinni ochadigan kalitga aylanib borayotgan bir paytda.
Barcelona esa yutqazmaydi. Ikkita ijodkor, ikkita o‘yin ko‘ruvchanligi yuqori bo‘lgan futbolchi, ikkita maydonni his qiladigan miya. Ichki raqobat ularni ham, butun jamoani ham yuqoriga tortadi.
Chetda qolgan yoz va ichdagi alam
Bu yorqin start ortida esa og‘ir yoz yotibdi. O‘tgan mavsum yakunida liga chempionligi, ammo shu paytda olingan jarohat. Natijada – Jahon chempionatidan tashqarida qolgan nomzod.
Fermin o‘sha davrni ochiq tan olgan: u uchun bu oson bo‘lmagan, hatto dastlabki o‘yinlarni tomosha qila olmagan, chunki ichidagi alam bunga yo‘l qo‘ymagan. Futbolchi uchun bundan og‘irroq zarba topish qiyin – jamoaviy cho‘qqidan so‘ng birdan chetga surib qo‘yilish.
Shu alam uni yo‘qotmadi, aksincha, qayta yasadi. U yozni tinch o‘tkazmadi. Reabilitatsiya, yakka mashg‘ulotlar, o‘ziga bo‘lgan talabni oshirish – natijada esa bugungi ko‘rinish: maydonga har safar och bo‘lib tushadigan, o‘zini isbotlashni to‘xtatmaydigan futbolchi.
Endi uni to‘xtatish oson bo‘lmaydi
Bugun Fermin Lopez nafaqat natija berayotgan o‘yinchi, balki ritmni belgilab berayotgan futbolchiga aylanmoqda. U pressingda ishlaydi, to‘p bilan dadil boradi, xavfli hududlarda qaror qabul qilishdan cho‘chimaydi. Maydonda u o‘zini isbotlash emas, o‘z o‘rnini talab qilib olayotgandek ko‘rinadi.
Mavsum endi boshlanmoqda, oldinda uzoq yo‘l, og‘ir uchrashuvlar, rotatsiyalar, charchoq turibdi. Shunday pallada bunday holatdagi Fermin – Flick uchun zaruratga aylanib bormoqda. Savol esa tobora aniqroq eshitilmoqda: bu shakldagi Lopezni qaysi murabbiy ixtiyoriy ravishda zaxiraga o‘tirgiza oladi?
