Fransiya FIFA U20 Ayollar Jahon Kubogida ishtirok etadi
Fransiya futbol federatsiyasi global futbol siyosatini larzaga keltirgan mojaro fonida keskin qaror qabul qildi. FFF BBC Sport orqali Polshada bo‘lib o‘tadigan Fifa U20 Women’s World Cup musobaqasida ishtirok etishini rasman tasdiqladi. Qisqa, lekin aniq bayonot: “Hozircha, France Fifa U20 Women World Cup turnirida qatnashadi.”
Bu jumla hozirgi vaziyatda oddiy xabar emas. Bu – pozitsiya.
UEFA bosimi, FIFA bilan sovuqlashgan munosabat
Butun mojaroning markazida – FIFA prezidenti Gianni Infantino va uning tijoriy rejasi. U turli FIFA musobaqalariga xususiy investorlarni jalb qilish, ulardan ulush sotish g‘oyasini ilgari surdi. Bu taklif Yevropa futbolidagi 55ta assotsiatsiyani bir yoqadan bosh chiqarishga majbur qildi.
Ular bir ovozdan qaror qildi: taklif rasmiy ravishda qaytarib olinmaguncha, barcha FIFA homiyligidagi turnirlarni boykot qilish. Bu shunchaki ogohlantirish emas, FIFA uchun ochiq siyosiy zarba edi.
FIFA rahbariyati kechirim so‘radi, lekin UEFA hanuz orqaga chekingani yo‘q. Yevropa uyushmasi payshanba kuni e’lon qilgan bayonotida boykot hali ham kun tartibidan tushmaganini, ayrim talablar bajarilmasa, rejadan voz kechilmasligini ma’lum qildi. Demak, keskinlik saqlanib turibdi.
Fransiya ochiq o‘ynadi, boshqalar sukut saqlayapti
Shu fonida FFFning qarori alohida ahamiyat kasb etadi. Fransiya o‘z niyatini yashirmadi, yo‘l xaritasini oldindan e’lon qildi. Boshqa yirik futbol davlatlari esa jim.
Angliya futbol assotsiatsiyasi hali ham Lionesses tarkibi Polshaga yo‘l oladimi-yo‘qmi, bu borada bir og‘iz gap aytmadi. Bu sukunat savollarni ko‘paytiryapti: ayrim terma jamoalar UEFA qarorgohidan keladigan yakuniy ko‘rsatmani kutyaptimi? Qatnashish bo‘yicha qaror siyosiy savdolashuvning bir qismiga aylanib qolganmi?
Fransiya esa o‘z yo‘lini tanladi. Bu yo‘l – hozircha – maydonga olib chiqadigan yo‘l.
Ayollar futboli – mojaroning eng nozik nuqtasi
Bu tortishuvda eng katta zarbani aynan ayollar futboli olishi mumkin. Taqvim siqilgan, turnirlar ketma-ket: Polshadagi U20 mundiali, keyingi yillarda esa yirik musobaqalar navbat kutib turibdi. Ularning birortasi uzoq davom etadigan boykotga bardosh bera olmaydi.
Agar UEFA o‘z qat’iy chizig‘ini oxirigacha ushlab tursa, zarba birinchi navbatda 5-sentabrda start oladigan U20 Women’s World Cup musobaqasiga tegadi. Turnirga kelishi kutilayotgan eng kuchli yevropalik futbolchilar birdaniga tashqarida qolishi mumkin.
Eng og‘ir ssenariy esa 2027 Women’s World Cup bilan bog‘liq. Agar Yevropa terma jamoalari UEFA tomonidan majburiy boykot tufayli saralash pley-off bosqichida qatnasha olmasa, Braziliyada o‘tadigan final bosqichiga yo‘l yopiladi. Bu esa nafaqat sportiy zarba, balki butun avlod futbolchilari uchun yo‘qotilgan imkoniyat bo‘ladi.
Olti jamoa va bir savol
Hozircha futbol olamining nigohi bitta sahnaga qadalgan: Polshada o‘ynashi rejalashtirilgan olti yevropalik jamoa – England, France, Italy, Portugal, Spain va mezbon Poland.
Fransiyaning “boramiz” degan qarori bu manzaraga oz bo‘lsa-da yorug‘lik tashlaydi. Agar ular o‘z va’dasida turishsa, turnir yulduzsiz qolib ketmasligi mumkin. Lekin umumiy fon hanuz o‘ta beqaror.
Endi savol bitta: qolgan yevropalik gigantlar ham maydonni tanlaydimi yoki siyosiy sahnani?
