Gianni Infantino atrofidagi mojaro: Uefa to‘lovi va inkor
Gianni Infantino nomi yana sarlavhalarda. Bu safar – maydon chetidagi qarorlar yoki turnir formatlari emas, balki shaxsiy hayotiga aloqador jiddiy ayblovlar sabab.
Daily Telegraph surishtiruvi ma’lumotlariga ko‘ra, Infantino Uefa bosh kotibi bo‘lib ishlagan davrida u bilan yaqin munosabatda bo‘lgan, deb da’vo qilinayotgan ayolga tashkilot tomonidan katta miqdorda ishdan bo‘shash to‘lovi berilgan. Gap olti xonali summa haqida ketayotgani aytilmoqda.
Infantino hozir Fifa prezidenti. Uning tarafidan javob keskin bo‘ldi. Uning nomidan so‘zlagan vakil nashrga “bu ayblovlar mutlaqo asossiz” ekanini, Infantino ularni qat’iyan rad etishini bildirgan. Ular buni nafaqat yolg‘on, balki obro‘ga putur yetkazuvchi tuhmat sifatida talqin qilmoqda.
Uefa esa sukut saqlamadi. Tashkilot rasmiy bayonot berib, “mazkur shaxsga ketish to‘lovi amalga oshirilganini” tasdiqladi. Bu ayol Infantino 2009–2016-yillar oralig‘ida Yevropa futbol uyushmasida bosh kotib bo‘lib ishlagan davrda u bilan munosabatda bo‘lgan, degan da’volar fonida tilga olinmoqda. Infantino o‘sha vaqtda ham turmush qurgan edi.
Tafsilotlar asta-sekin ochilmoqda. Telegraph xabariga ko‘ra, to‘lov nafaqat ishdan bo‘shash paketini, balki ayolning mahalliy biznes maktabida MBA dasturini yakunlashi uchun to‘langan kontrakt pullarini ham o‘z ichiga olgan. Uefa bu moliyaviy majburiyatlarning barchasi o‘sha paytdagi ichki qoidalarga to‘liq mos bo‘lganini ta’kidlaydi. Shuningdek, tashkilot reglamentlar keyinchalik yangilanganini va hozir ular “zamonaviy, yuqori darajadagi tashkilot” standartlariga moslashganini qo‘shimcha qilgan.
Infantino tomoni esa chiziqni yanada qalinroq chizib berdi. Fifa vakili Telegraph’ga bergan izohida: “Fifa president Gianni Infantino bu ayblovlarni qat’iyan rad etadi, ular mutlaqo haqiqatga to‘g‘ri kelmaydi. Har qanday noo‘rin xulq yoki nizomlar buzilgani haqidagi ishoralar tuhmatdir”, degan. Yana bir muhim nuqta: ularning ta’kidlashicha, “Uefa yoki Fifa tarkibida biror xodim hech qachon Infantino xulqi yuzasidan shikoyat qilmagan, chunki u bilan bog‘liq birorta ham hodisa bo‘lmagan”.
Bu gaplar fonida savollar ko‘paymoqda. Nega Uefa bunday to‘lovni amalga oshirdi? Nega bu holat endi ochilmoqda? Va eng muhim savol – bu mojaro Fifa rahbarining siyosiy kelajagiga qanday ta’sir qiladi?
Infantino allaqachon bosim ostida. U jahon chempionati tijoriy huquqlarining bir qismini xususiy investorlar qo‘liga berish rejalari ortidan keskin tanqid ostida qolgan, reja esa oxir-oqibat to‘xtatilgan edi. Endi esa uning atrofida yana bir noxush bo‘ron ko‘tarilmoqda.
BBC Sport Fifa va Infantino bilan qo‘shimcha izoh olish uchun bog‘langan. Hozircha javoblar qat’iy inkor va reglamentlarga tayangan rasmiy bayonotlar bilan cheklanmoqda.
Ammo savdo-sotiq, siyosiy kurash va shaxsiy hayot chatishtirilgan bu davrda bir narsa aniq: Fifa prezidenti endi faqat futbol maydonidagi qarorlari bilan emas, o‘tmishidagi har bir chiziq bilan ham himoyaga majbur bo‘ladi.
