Iga Swiatek Toronto Masters yarim finaliga chiqdi
Toronto kortlarida dushanba kuni eski hukmdor yana o‘z ohangini topdi. Iga Swiatek atigi 64 daqiqada Diana Shnaiderni 6:2, 6:1 hisobida yer tishlatib, Toronto Masters yarim finaliga chiqdi. Bu nafaqat tezkor g‘alaba, bu ogohlantirish edi.
Olti karra “Grand Slam” chempioni bo‘lgan polyak tennischi bu yil atigi ikkinchi marta WTA yarim finaliga chiqmoqda — avvalgi safar Rimda bo‘lgan. Final esa unga deyarli bir yildirki ko‘rinmayapti: so‘nggi marta u Seulda, Korea Open turnirida g‘alaba qozongan. Endi esa Toronto uning och qolgan chempion instinktini yana uyg‘otayotgandek.
“Boshlanishidanoq xujumga o‘tdim. Ustunlik qila olishimni his qildim,” — dedi Swiatek uchrashuvdan so‘ng. “O‘yinimdan juda mamnun bo‘ldim.”
Uindagi sinov, mental ustunlik
Bu g‘alaba faqat hisobdagi ustunlik emasdi. Shamol kort ustida o‘z qoidalarini o‘rnatishga urinayotgan bir paytda Swiatek barqarorlikni tanladi.
“Shamol bilan o‘ynash qiyin bo‘ldi,” — deya tan oldi u. “Bu yerga kelganimdan beri shamolda o‘ynashimga birinchi marta to‘g‘ri keldi. Shunga moslashishim kerak edi. Faqat yanada ishonchli bo‘lishni xohladim.”
Shu ishonch raqamlar bilan ham tasdiqlandi: u birinchi servislarda atigi uch ochko boy berdi, Shnaiderning ikkinchi servisiga qarshi esa 16 ochkodan 11 tasini yutib oldi. Qattiq bosim, sovuqqon ijro.
Matchning ohangini esa ilk g‘oyat sodda, lekin ramziy epizod belgilab berdi: chap qo‘l bilan o‘ynaydigan Diana Shnaider birinchi ge‘ymdayoq bekxendni chiziqdan oshirib yubordi va breykni boy berdi. Shundan keyin tashabbus deyarli qaytib kelmadi.
Swiatek 5:2 hisobida oldinga o‘tib, yana bir breykni qo‘lga kiritdi — bu safar Shnaider bekxendni to‘rga tushirdi. Set 31 daqiqada yakunlandi. Qisqa, og‘riqsiz operatsiya.
Ikkinchi setda ham manzara o‘zgarmadi. 2:1 da Shnaider bu safar forxendni to‘rga ilintirib, yana servisidan ayrildi. 4:1 da Swiatek kuchli forxend “vinner” bilan navbatdagi breykni oldi. So‘nggi o‘yinda esa Shnaider yana forxendni chiziqdan uzoqqa uchirib, mag‘lubiyatni rasman tasdiqladi.
Endi navbat Elina Svitolina
Endi polyak tennischini yanada sinovli raqib kutib turibdi. Chorshanba kuni u Ukraina vakili, WTA reytingida to‘qqizinchi o‘rinda borayotgan Elina Svitolina bilan yarim finalda to‘qnash keladi. Bu qarama-qarshilik allaqachon o‘z tarixiga ega.
Swiatek va Svitolina o‘rtasidagi o‘zaro uchrashuvlarda hisob hozircha 4:3, polyak foydasiga. Lekin bir muhim tafsilot bor: bu yilgi ikkala o‘yinda ham g‘alaba Svitolina tomoniga o‘tgan. Demak, statistik ustunlikka qaramay, psixologik bosim Swiatek yelkasida.
Svitolina esa Toronto kortlariga o‘ziga xos xarakter namoyishi bilan chiqdi. U 19-o‘rindagi Ekaterina Alexandrova ustidan 3:6, 6:0, 6:3 hisobida g‘alaba qozondi. Birinchi setni yo‘qotdi, lekin keyin sakkizta ge‘ymni ketma-ket yutib, uchrashuvni o‘z foydasiga burib yubordi.
Birinchi set yakunida ham dramatik lahza bo‘ldi: Svitolina so‘nggi o‘yinda bekxendni chiziqdan oshirib yuborib, “lov”ga breykni boy berdi. Set 29 daqiqada tugadi, Alexandrova 12 ta “vinner” urdi, Svitolina esa atigi uchtaga erishdi. Raqamlar bir yoqlama edi.
Lekin o‘yin tugamagan edi. Ikkinchi setda Alexandrova o‘zi uchun halokatli bo‘lgan xatolarga yo‘l qo‘ydi: bir forxendni chiziqdan oshirdi, ikki bekxendni to‘rga urdi va shu tariqa Svitolinaga uchta breykni “sovg‘a” qildi. Set 6:0. Momentum butunlay o‘zgardi.
Uchinchi setda ham asablar sinovi davom etdi. Svitolina sakkizinchi ge‘ymda uchrashuv uchun servisga keldi, ammo dubl-xato qilib, breykni o‘tkazib yubordi. Qaytish yo‘qdek ko‘rindi. Lekin u darhol o‘zini qo‘lga oldi: so‘nggi ge‘ymda raqibini “lov”ga sindirdi va kuchli qaytargan servisdan so‘ng g‘alabani yakunladi.
Endi esa sahnada boshqa savol turibdi: Toronto yarim finalida tajriba va sabrni birlashtira olgan Svitolina, nihoyat finalga chanqoq bo‘lib qolgan, shamolni ham, bosimni ham yenga oladigan Swiatekni to‘xtata oladimi?
Yoki bu shahar Iga Swiatek uchun yo‘qolgan final tuyg‘usini qaytarib beradimi?
