Islom Maxachev: Vaqt va Meros
UFC’ning eng zo‘r jangchilari qatorida tilga olinadigan Islom Maxachev o‘zining eng keskin davriga kirib bormoqda. U buni yashirmayapti ham. 34 yoshli rossiyalik Filadelfiyada bo‘lib o‘tadigan UFC 330 galasida ilk bor yarim o‘rta vazn chempionlik kamarini himoya qiladi va shu bilan birga, o‘z vaqtini ham sanay boshlaganini ochiq tan oladi.
Shanba kuni Xfinity Mobile Arena oktagoni uni Irlandiya vakili, 28 yoshli Ian Machado Garry qarshisiga olib chiqadi. Bu oddiy himoya emas. Bu – tarixga zarba.
Rekordga bir qadam
Maxachev 2015 yilda UFC sahnasiga qadam qo‘ydi. Shundan beri promoushen doirasida 18 jang o‘tkazdi, ulardan 17 tasida g‘alaba qozondi. U endi nafaqat kamar, balki ramziy toj – ketma-ket g‘alabalar bo‘yicha rekord uchun ham jang qilmoqda.
Agar u Machado Garry ustidan zafar quchsa, Anderson Silva’ning 16 ta ketma-ket g‘alabadan iborat, 13 yildan beri buzilmay kelayotgan natijasini ortda qoldiradi. Bu raqamlar UFC tarixida alohida satr bilan yozilgan, endi esa Maxachev ularni o‘chirib, o‘z nomini qo‘yish arafasida turibdi.
Vaqt bilan poyga
Maxachev o‘tgan yili to‘rtinchi marta engil vazn kamarini muvaffaqiyatli himoya qilib, rekord o‘rnatgach, yuqori vazn toifasiga ko‘tarildi va yarim o‘rta vaznda ham chempion bo‘ldi. Lekin u bugun o‘zini “cheksiz” deb his qilmaydi.
“Men endi yosh yigit emasman. Menga har uch-to‘rt oyda jang qilish yaxshiroq”, – deydi u UFC Hall of Famer Demetrious Johnson bilan suhbatda. “Tushunaman, men 28 yoshda emasman, hozir 34daman. Va menda ko‘p vaqt yo‘q”.
Uning so‘zlarida shoshilish emas, aniq reja seziladi. Ko‘proq jang, ko‘proq meros. Lekin UFC jadvali hamisha jangchining istagiga mos tushmaydi.
“Ba’zan UFC’da hammasi sen xohlaganingdek ketmaydi. Uch-to‘rt oydan keyin jang qilmoqchi bo‘lasan, lekin hammasi sening istaging bo‘yicha bo‘lavermaydi”, – deydi u.
Khabib bilan taqqoslashlardan qochib bo‘lmaydi
Islomning har bir jangidan oldin bitta savol baribir stol ustida qoladi: u allaqachon o‘z murabbiyi va do‘sti Khabib Nurmagomedov’dan o‘tib ketdimi yoki yo‘qmi?
Khabib 2020 yilda, 29-0 rekordi bilan, raqiblarini bo‘g‘ib qo‘yadigan bosim uslubi orqali afsonaga aylangan holda oktagondan ketdi. U hech qachon mag‘lub bo‘lmadi, u hech qachon ikkinchi kamar uchun yuqori vaznga ko‘tarilmadi. U o‘z cho‘qqisida to‘xtadi.
Maxachev esa boshqa yo‘lni tanladi. U Khabibchalik yovuz pressing bilan hujum qilmaydi, lekin arsenalida zarba texnikasi ancha rang-barang. Uning UFC’dagi yagona mag‘lubiyati 2015 yilda Adriano Martinsga qarshi bo‘lgan. O‘shandan beri u xato qilmayapti.
O‘tgan yili Jack Della Maddalena ustidan g‘alaba qozonib, ikki vazn toifasida chempion bo‘ldi – Khabib erishmagan marrani zabt etdi. Statistikani sevadiganlar uchun bu juda kuchli argument.
Dana White’ning bahosi
UFC prezidenti Dana White ham bu bahsdan chetda qolmadi. U haftaning boshida Maxachev haqida qisqa, ammo og‘ir gap aytdi: u Islomni UFC tarixidagi eng buyuk jangchi maqomiga “to‘g‘ri yo‘lda” deb hisoblaydi.
Bu maqomni hech kim yengil so‘z bilan bermaydi. Ayniqsa, bu tashkilotda Jon Jones, Georges St-Pierre, Anderson Silva kabi nomlar bo‘lgan bir paytda.
Endi esa navbat Machado Garryga. U 28 yoshda, och, ishtiyoq bilan to‘la va tarixiy rekordni to‘xtatib qolishga urinadi. Maxachev esa boshqa raqamlarni o‘ylayapti: necha oy qoldi, necha jang qoldi, merosni qanchaga yetkazib ulguradi?
Uning o‘zi aytgandek, “menda ko‘p vaqt yo‘q”. Savol esa bitta: shu qisqa vaqt ichida u yana nimalarni ulguradi?
