Jose Mourinho: Vinicius Real Madrid’ni faqat ketganingda tushunasan
Jose Mourinho Madridga ikkinchi bor qaytib kelganida, klubdagi eng katta savollardan biri shunchaki taktikaga oid emasdi. Gap Vinicius Jr kelajagi haqida ketayotgan edi. Shartnoma yakuniga bir yil qolgan, yevropalik gigantlar esa atrofida aylanib yurgan bir paytda.
Vinicius endi 26 yoshda. “Santiago Bernabeu”da shartnomasining so‘nggi 12 oyi ishlay boshlaganida, u kelasi yozda erkin agent sifatida ketishi mumkin edi. Angliya chempioni Arsenal bu vaziyatdan darhol xabardor bo‘ldi, bozor eng xavfli, eng yorqin qanot hujumchilaridan birini qo‘lga kiritish imkoniyati paydo bo‘lgandi.
Lekin bosim ostida bo‘lgan muzokaralar yakunida sahnaga Mourinho chiqdi.
“Ketma. Arzimaydi”
Iyun oyida Real Madrid bosh murabbiyi sifatida qayta tasdiqlangan 63 yoshli mutaxassis o‘zining eng muhim “transferi”ni ichkarida hal qildi. Vinicius bu oy boshida klub bilan olti yillik yangi shartnomaga imzo chekdi. Madriddan ketish mavzusi yopildi. Hozircha — mutlaqo.
Mourinho ispaniyalik “El Chiringuito” ko‘rsatuvida o‘sha suhbat tafsilotlarini ochib berdi.
“Vinicius Real Madrid’ga oshiq bo‘lib qolgan, – dedi u. – Men unga faqat bitta gapni aytdim: ‘Vini, qayerga ketmoqchisan? Sen faqat Braziliya va Real Madridni bilasan. Real Madridni faqat ketganingda tushunasan. Ketganingda, aynan o‘shanda Real Madrid nima ekanini anglaysan. Ketma. Arzimaydi’”.
Bir necha jumla. Ammo bu jumlalar futbolchining butun yo‘lini belgilab berdi.
Mourinhoning fikricha, bu faqat romantika emas, ichkaridagi ish uslubining natijasi ham.
“U bizning guruh sifatida o‘sishimizni, qanday ishlayotganimizni, qanday rivojlanayotganimizni his qildi. Bu unga juda muhim tuyg‘u berdi”, – deya davom etdi portugaliyalik.
Raqibdan – himoyachiga
Mourinho o‘tgan mavsumda Benfica bosh murabbiyi sifatida Real Madridga qarshi uch marta maydonga tushgan. Uchala uchrashuv ham yuqori darajadagi raqobat, keskinlik, emotsiya bilan o‘tgan. Ayniqsa pley-offdagi birinchi o‘yin.
O‘sha bahsda maydondagi to‘qnashuv futbol chegarasidan chiqib ketdi. Real Madrid futbolchilari Benfica hujumchisi Gianluca Prestianni’ni Viniciusga nisbatan irqchilik qilganlikda aybladi. O‘yin taxminan sakkiz daqiqa to‘xtab qoldi, stadiondagi kayfiyat birdan o‘zgardi.
Prestianni ayblovlarni rad etdi. Mourinho esa o‘sha payt o‘z futbolchisini ochiqchasiga himoya qildi. U uchun o‘sha daqiqada Prestianni – uning futbolchisi, jamoasi a’zosi edi.
Keyinroq Uefa qaror chiqardi: Prestianni uchta o‘yinga diskvalifikatsiya qilindi, yana uchta uchrashuv shartli ravishda “osilib” turadigan tarzda belgilandi, sababi – gomofob xatti-harakat.
Bugun esa Mourinho o‘sha epizodga boshqacha nuqtai nazardan qaytadi. Endi u Real Madrid murabbiyi. Endi u Vinicius bilan bir tomonda.
“Prestianni mening futbolchim edi. Shunaqa. Bu yerda bahs bo‘lishi mumkin emas, – deydi u. – Agar Prestianni mening futbolchim bo‘lsa, menga qarshi 20 nafar futbolchi kelishi mumkin, baribir men Prestianni bilan qolaman. Gap tamom”.
Bu so‘zlar murabbiyning printsipini ochib beradi: kiyinish xonasida u avvalo o‘z odamini himoya qiladi. Ammo Madridga qaytganidan so‘ng, u boshqa bir chiziqni chizadi.
“Endi Vini mening qaysi tomonda ekanimni biladi, – deydi Mourinho. – U biladi: menga ko‘ziga qarab, men uning tarafida bo‘lishimga tayana oladi”.
Real Madrid uchun ichki “transfer”
Real Madrid bu yozda katta nomlarni olib kelishi mumkin. Biroq klub uchun eng katta yutuqlardan biri allaqachon sodir bo‘ldi: Vinicius qoladi. Olti yilga.
Bu qarorning ichida pul bor, ambitsiya bor, lekin yana bitta omil ham bor – Mourinho omili. U futbolchini boshqa ligalar, boshqa klublar, boshqa loyihalar chaqirayotgan bir paytda, Real Madrid devorlari ichida ushlab qoldi.
“Sen Real Madridni faqat ketganingda tushunasan”, – degan gap Vini uchun ogohlantirish bo‘ldi. Balki eshikni yopib qo‘ygan kalit ham shudir.
Endi esa savol boshqa: Mourinho qo‘l ostida qolishga qaror qilgan, Real Madrid’ga oshiq bo‘lgan Vinicius bu yangi davrni qanday belgilaydi?
