Kai Spears: The New York Timesga qarshi 9,25 million dollar tovon puli
Alabama hakami hay’ati sobiq kollej basketbolchisi foydasiga 9,25 million dollar miqdorida tovon puli tayinladi. Ular nufuzli gazeta – The New York Times uni o‘lim bilan yakunlangan otishma joyida bo‘lgan deb noto‘g‘ri xabar bergani orqali tuhmat qilgan, degan xulosaga keldi.
Gap Kai Spears haqida ketmoqda. U University of Alabama erkaklar jamoasida o‘ynagan paytida, 2023 yilda The New York Times chiqargan maqola markazida qolib ketdi. Materialda tergovga yaqin manbaga tayanilgan holda, Spears otishmaga aloqador mashinada yo‘lovchi sifatida qatnashgani yozilgandi. Manba “nozik masalalar” haqida gapirayotgani uchun ismi sir tutilgani qayd etilgan edi.
Bu xato keyin tan olindi. Tahririyat eslatmasi bilan maqolaga tuzatish kiritildi. Ammo o‘sha paytga kelib zarba allaqachon berilgan, ism allaqachon otishma bilan bog‘lanib bo‘lgandi.
To‘qqiz kunlik sud jarayonidan so‘ng hakamlar hay’ati hukmini e’lon qildi. Spearsning advokati Matt Glover bu qarorni qoniqarli deb baholadi va “bu hukm butun mamlakat bo‘ylab jurnalistikani yaxshilashiga” ishonishini aytdi. Sud zalida bu nafaqat bitta sportchi, balki ommaviy axborot vositalari ishonchliligi uchun ham kurash sifatida ko‘rindi.
The New York Times esa orqaga chekinishga shoshilmayapti. Nashr vakillari bayonotida: “Biz hakamlar hay’ati The Times’ni halol xatoga ko‘ra aybdor deb topganidan afsusdamiz. Hakamlar hay’ati xizmatini qadrlaymiz, biroq hukm va tayinlangan tovon puli qonunga zid va dalillar bilan qo‘llab-quvvatlanmagan, deb hisoblaymiz”, deya bildirishdi. Tahririyat hozir o‘zining huquqiy imkoniyatlarini ko‘rib chiqmoqda.
Otishma 2023 yil yanvarida sodir bo‘lgan. Uch nafar boshqa Alabama basketbolchisi voqea joyida bo‘lgan, 23 yoshli ona – Jamea Harris halok bo‘lgan. Spears esa, sudga ko‘ra, u yerda bo‘lmagan. Da’vo arizasida u noto‘g‘ri xabarlar unga kuchli ruhiy zarba bergani, uni umrbod qotillik bilan bog‘lab qo‘ygani haqida yozdi.
Bosim ostida turgan asosiy detal keyin ochildi: mashinada bo‘lgan shaxs – o‘yinchi emas, jamoa menejeri bo‘lib chiqqan. U otishma bo‘yicha gumonlanuvchi sifatida ko‘rilmagan, ayblanmagan ham.
The New York Times o‘zi yozgan keyingi maqolada shuni ta’kidladi: nashr AQShda yozilgan maqolasi bo‘yicha tuhmat ishi yutqazmaganiga ellik yildan oshgan edi. Alabama sudi shu uzoq davom etgan “rekord”ga nuqta qo‘ydi.
Kai Spearsning otasi – Christian Spears bu qarorni yengillik bilan qabul qildi. U Patch nashriga bergan intervyusida shunday dedi: ularning maqsadi avvaliga bor-yo‘g‘i oddiy raddiya bo‘lgan. Oila The New York Times’dan xatoni tan olib, orqaga qadam tashlashini kutgan. Biroq nashr maqolani himoya qilishni tanladi, faktlar bilan bahslashdi, o‘z ta’sir kuchi uni daxlsiz qiladi, degandek tutdi. Alabama hakamlar hay’ati esa bu pozitsiyani qat’iy rad etdi.
Kai Spears Alabama safini 2023–24 yilgi mavsumdan keyin tark etdi, keyingi kollej bosqichida Marshall va West Liberty uchun ham maydonga tushdi. U maydonda o‘yinlar bilan, sud zalida esa ismi-sharifini oqlash uchun kurashdi.
Endi esa uning familiyasi statistik jadvalda emas, sud qarorida turibdi. Savol bitta: bu hukm katta sport va katta media o‘rtasidagi kuch muvozanatini qay darajada o‘zgartiradi?
