Lampard va Mourinho: Murabbiylik yo‘lida o‘rganilgan darslar

Frank Lampard uchun Jose Mourinho nomi hanuz oddiy xotira emas. Bu – ish stolida ochiq qoladigan, vaqti-vaqti bilan qayta varaqlanadigan qo‘llanma. Bugun u Coventry City bosh murabbiyi, Mourinho esa yana Real Madrid boshida. Lekin ularning orasidagi aloqa uzilgani yo‘q. Aksincha, yanada aniqroq va kasbiyroq tus olgan.

Lampardning o‘zi aytadi: u yaqinda yozgi transfer oynasida bir futbolchi borasida maslahat so‘rab Mourinho bilan bog‘langan. Gap Real Madrid futbolchisi haqida emas, portugaliyalik murabbiy ilgari ishlagan boshqa bir o‘yinchi haqida ketgan. Mourinho esa odatdagidek – band, lekin befarq emas. Javob berishga bir necha kun ketgan, ammo qaytgach, Lampard so‘zlari bilan aytganda, “juda-juda batafsil” tahlil yuborgan.

“Jose har doim yonimda. Yaqinda ham unga boshqa bir futbolchi haqida – Real Madrid futbolchisi emas, u ilgari ishlagan o‘yinchi haqida yozdim, u esa doim qo‘ng‘iroqqa tayyor,” – deydi Lampard talkSPORT’ga bergan intervyusida. “Ba’zan javob berishi ikki-uch kun oladi. Band odam ekanini bilaman. Lekin u qaytgach, gaplashayotganimiz o‘sha futbolchi haqida juda batafsil tahlil yubordi.”

Mourinhoning soyasi Lampard murabbiylik yo‘lidan hanuz ketmayapti. Stamford Bridge’dagi eng yorqin yillari aynan portugaliyalik mutaxassis qo‘l ostida o‘tgan sobiq Angliya terma jamoasi a’zosi “Special One”ni o‘zining bosh yo‘nalish nuqtasi sifatida ko‘rishda davom etadi. U o‘z yo‘lini o‘zi chizmoqchi, lekin sobiq ustozidan o‘rgangan darslar – xususan, insonlar bilan ishlash va muloqot uslubi – uning bugungi ish uslubiga singib ketgan.

Lampard yaqinda Mourinho haqidagi hujjatli filmni ham ko‘rgan. Ayniqsa birinchi qismi – sof Chelsea hikoyasi – uni orqaga, o‘sha chempionlik yillariga qaytarib qo‘ygan.

“Albatta, Mourinho haqidagi hujjatli filmni ko‘rdim, ajoyib xotiralar qaytdi, ayniqsa birinchisi, chunki u faqat Chelsea haqidagi hikoya edi va juda ko‘p chiroyli narsalarni eslatdi. Men Jose’ni allaqachon yaxshi ko‘rardim, lekin bularning barchasini qayta ko‘rish juda yoqimli bo‘ldi. Juda ko‘p yaxshi murabbiylar bilan ishladim, lekin u kelganida menga bergan ishonchi tufayli mening kareramga eng katta ta’sirni aynan u ko‘rsatdi,” – deydi Lampard.

U hozirgi murabbiylar avlodida Mourinho uslubini takrorlashga urinayotganlar ko‘pligini ko‘radi, lekin o‘zi bunday yo‘lga tushmoqchi emas.

“Ko‘plab murabbiylar ma’lum ma’noda Jose’ni taqlid qilishga urinishganini o‘ylayman, lekin men buni qila olmayman ham, qilmoqchi ham emasman, chunki menda uning xarakteri yo‘q. Menda o‘zimnikisi bor,” – deydi u.

CBS Arena’dagi 18 oylik davr esa Lampardning o‘zgarib, pishib borayotganini ko‘rsatmoqda. Derby County, Chelsea va Everton davrlaridan so‘ng u endi o‘zini boshqacha his qiladi. Premier League’dagi hayot – haddan tashqari baland cho‘qqilar va keskin pastliklarga to‘la. Lampard esa shu tebranishlar orasida ruhiy muvozanat topish kerakligini anglab yetgan.

U endi “tribute act” – ya’ni kimningdir nusxasi bo‘lib qolishni istamaydi. Uning maqsadi aniq: o‘z jamoasining ehtiyojlarini tushunish, o‘z uslubini saqlagan holda, o‘zini ham ruhiy jihatdan sog‘lom tutish.

“Men boshqaruvni o‘zimcha qilishga harakat qilyapman. Eng ko‘p o‘rgangan narsam – o‘zimning ichki muvozanatimni topishdir, chunki har bir o‘yinda g‘alaba qozona olmaysiz,” – deydi Lampard. “Sizni har xil yo‘llar bilan sinashadi. Har kuni mukammallikni qidirib bo‘lmaydi. Maydonda ham, undan tashqarida ham muvozanatni topishingiz, haqiqatan ham muhim bo‘lgan narsalarga ustuvorlik berishingiz kerak. Umid qilamanki, Coventry’dagi bu 18 oy – men uchun shaxsiy taraqqiyot bo‘lganini ko‘rsatdi.”

Bu yondashuv uning hayotini ham yengillashtirganini ta’kidlaydi.

“Bu muvozanatni topish hayotimni osonlashtiradi, chunki dam olishga ham vaqtingiz bo‘ladi. Bu juda stressli ish, sizni charchatadi, lekin ichiga kirganingizda, bu ishning o‘zi shunday ekanini tushunishingiz kerak,” – deydi u.

Endi esa nazariya amaliyot bilan to‘qnashadi. Coventry’ning ko‘tarilgani haqiqati shu hafta oxirida yanada aniq seziladi – ular safarda Arsenal bilan o‘ynashadi. Lampard vazifa qanchalik murakkab ekanini juda yaxshi biladi. Biroq u jamoasidan bir narsani talab qiladi: sahnadan cho‘chimaslik. Na stadiondan, na raqib sifatidan.

“Hayajondaman. O‘ylaymanki, biz hammamiz hayajondamiz,” – deydi u. “Bizning kichik hikoyamiz bor: 25 yil ligadan tashqarida bo‘ldik, o‘tgan yil yigitlar bilan nimalarga erishganimiz, ularning bizni bu yerga olib kelishdagi ishi… Keyin esa haqiqat yuzingizga qaraydi. Birinchi o‘yinda safarda Arsenal chiqib kelganini ko‘rganingizda, haqiqat juda keskin uradi, chunki ular haqli ravishda chempion bo‘lishdi. Lekin biz o‘zimizga e’tibor qaratishimiz kerak. Bu chaqiriqni yuzma-yuz qabul qilishimiz zarur. Yil davomida eng kuchli jamoalarga safarda qarshi o‘ynaysiz.”

Lampard uchun bu faqat ochilish o‘yini emas. Bu – Mourinho bilan kechgan yillardan, London kechalaridan, Madrid maslahatlaridan keyin o‘z nomini mustaqil murabbiy sifatida chizish uchun navbatdagi katta sahna. Endi savol bitta: u Mourinho’dan o‘rgangan darslarni Premier League gigantlari fonida qanchalik o‘z ohangiga aylantira oladi?