Liverpool mudofaaga Asencio va hujumga Barcola bilan qaraydi
Liverpool yozgi bozorni shiddat bilan boshlab yubordi, ammo Merseyside klubi hali to‘xtash niyatida emas. Hujum chizig‘ini yangilash ustida ish qizigan bir paytda, kutilmaganda mudofaaga oid jiddiy imkoniyat paydo bo‘ldi: Real Madrid markaziy himoyachisi Raul Asencio Anfield yo‘liga ochiq.
Asencio uchun eshik ochildi
Ispaniya poytaxtidan kelayotgan xabarlarga ko‘ra, Raul Asencio yozda Madridni tark etishi mumkinligi haqida rasmiy raviy o‘gohlantirilgan. Real Madrid bosh murabbiyi Mourinho uni yuqori baholashini bildirgan, lekin uzoq muddatli rejalarida markaziy rol ko‘rmayapti va chiqib ketishiga rozilik bergan.
Shu fon’da Liverpool nomi darhol paydo bo‘ldi. TEAMtalk ma’lumotiga ko‘ra, klub Asencio bo‘yicha “potensial kelishuv” haqida xabardor qilingan, ya’ni Anfield tomoni transfer imkoniyati borligidan rasmiy tarzda ogohlantirilgan.
Liverpool murabbiyi Iraola esa ispaniyalik himoyachining ko‘p yillik muxlislaridan biri sifatida tilga olinmoqda. Biroq, hozircha gap shunchaki kuzatish va aloqada bo‘lish darajasida qolmoqda. Asencioning o‘zi hali ham Real Madridda qolish niyatidan voz kechmagan, shu sababli muzokaralar rasmiy bosqichga o‘tmagan.
Shu bilan birga, agar u Santiago Bernabéu’dan ketish zarurligini tan olsa, Liverpool stolda qoladigan asosiy nomlardan biri bo‘lib turibdi. Klub tajribali markaziy himoyachiga ehtiyoj sezayotgani yashirin emas: Giovanni Leoni va Jeremy Jacquet hali elit darajada yetarlicha o‘yin amaliyotiga ega emas. Asencio bu bo‘shliqni birdaniga to‘ldira oladigan nom sifatida ko‘rilmoqda.
Hujum chizig‘i: Barcola operatsiyasi
Mudofaadagi ehtimoliy yangiliklar fonida Liverpoolning asosiy sahnasi baribir hujum chizig‘ida. Victor Munoz (Osasuna) allaqachon kelib bo‘ldi, Rennes’dan uzoq kutilgan Jeremy Jacquet transferi ham nihoyasiga yetdi. Endi navbat qanotga.
Klubning bosh nishoni – Paris Saint-Germain hujumchisi Bradley Barcola. Uning jamoadoshi Ibrahim Mbaye ham yozgi ro‘yxatda turibdi, ammo ayni paytda butun diqqat Barcola atrofida jamlangan.
Fabrizio Romano dushanba kuni o‘z YouTube kanalida tasdiqlaganidek, endi gap shunchaki mish-mishlar emas. Liverpool va PSG o‘rtasida Barcola bo‘yicha “rasmiy klubdan klubga” muzokaralar boshlangan. Anfield tomoni Parij klubiga rasmiy ravishda taklif berish niyatini bildirgan, ikki klub o‘rtasidagi ishchi munosabatlar esa iliq ruhda kechayotgani ta’kidlanmoqda.
Boshlang‘ich raqamlar esa PSG kutgan darajadan ancha past. Shu sababli bu transfer yaqin kunlarda “here we go” darajasiga chiqadigan kelishuv emas. Moliyaviy tafovut sezilarli, tomonlar hali narx borasida bir-biriga yaqinlashgani yo‘q.
Shunga qaramay, muzokaralar to‘xtab qolmaydi. Liverpool Barcolani xohlaydi. Eng muhimi, Barcolaning o‘zi ham Liverpool loyihasiga oshkor tarzda qiziqmoqda. Romano ma’lumotiga ko‘ra, shaxsiy shartlar bo‘yicha muammo bo‘lmaydi – futbolchi bu g‘oyadan “juda ham vasvasaga tushgan”.
Demak, bu transfer – davom etayotgan jarayon. Narx bo‘yicha kurash, sabrni sinovdan o‘tkazadigan savdolashuv va oxir-oqibat, qanotga yangi asosiy figura olib kelish imkoniyati.
Strategiya: bir yozda ikki front
Liverpoolning yozgi rejasida aniq chiziq ko‘rinib turibdi. Bir tomonda – yosh, portlovchi qanotchi Barcola bilan hujumni keskinlashtirish, boshqa tomonda – Raul Asencio kabi tajribaliroq markaziy himoyachi bilan orqa chiziqqa xotirjamlik olib kirish.
Hozircha ikkala frontda ham hal qiluvchi zarba berilmadi. Ammo bozor hali ochiq, klub esa o‘z niyatini yashirmayapti. Savol bitta: Anfield tribunalarida yangi mavsum boshlanguncha, bu rejalar qanchalik tez real voqelikka aylanadi?
