Liverpool Barcola transferi uchun harakatni boshladi
“Liverpool” nihoyat ko‘p oydan beri pishib kelayotgan rejani ishga tushirmoqda. Klub “PSG” bilan Bradley Barcola transferi bo‘yicha rasmiy muzokaralarni ochishga tayyor.
Mohamed Salah ketganidan beri yuqori darajadagi qanot hujumchisi – Anfielddagi birinchi navbatdagi vazifa edi. Barcola esa bu ro‘yxatning yuqori qismida anchadan beri turibdi. Endi navbat so‘zdan ishga o‘tishga keldi.
Qanotga yangi markaziy figura qidiruvi
“Liverpool” allaqachon futbolchining vakillari bilan dastlabki suhbatlarni o‘tkazdi, endi esa ochilish taklifini tayyorlab, “PSG”ga rasmiy murojaat yo‘llash arafasida. Klubning niyati aniq: yangi davr qanotdan boshlanadi.
23 yoshli Barcola “PSG” bilan shartnomasining yakuniga ikki yil qoldirgan. U Parijda o‘yin amaliyotining kamligidan norozi, yangi shartnoma imzolash niyati yo‘qligini bildirgan. “Liverpool”ga o‘tish imkoniyati unga jiddiy ma’qul bo‘layotgani aytilmoqda.
Savol bitta: “PSG” narxni tushiradimi?
Barcola 2023-yilda taxminan 40 million funt evaziga sotib olingan edi. Hozir esa yozgi bozorni larzaga keltirayotgan summalar tilga olinmoqda. “Sky Sports News” ma’lumotiga ko‘ra, parijliklar uni dastlab 145 million funt (170 million yevro) atrofida baholagan. Endi boshqa manbalar bu raqam 128,5 million funt (150 million yevro) atrofida bo‘lishi mumkinligini ta’kidlamoqda.
Narx hanuz osmonlarda, lekin muzokara uchun eshik biroz bo‘lsa-da ochilgandek.
Iraola futboli va Barcola moslamasi
“Andoni Iraola” jamoalari qanday futbol o‘ynashini “Bournemouth” va “Rayo Vallecano”ni kuzatganlar juda yaxshi biladi: tezlik, bosim, cheksiz yugurish va qanotlardan uzluksiz zarba. Uning tizimida qanot hujumchilari – shunchaki dekor emas, butun pressing mexanizmining yuragi.
Shu nuqtai nazardan qaralganda, Barcola “Liverpool”ning yangi bosh murabbiyi qo‘lida markaziy bo‘lakka aylanishi mumkin bo‘lgan futbolchi. Tezlik bor. Jismoniy kuch bor. Intellektual o‘yin bor. Bularning barchasi Luis Enrique qo‘lida sayqallangan.
Yana bir fakt: u so‘nggi ikki yil ichida to‘qqizta yirik sovrin yutgan, shu jumladan ikki marta Chempionlar Ligasi g‘olibi bo‘lgan. Bu – “Liverpool” qanday kalibrdagi futbolchiga qo‘l uzatayotganidan dalolat.
Anfield tomoni endi nafaqat sifat, balki g‘oliblik mentalitetiga ega bo‘lgan futbolchini olib kelmoqchi.
Parijdagi ikkinchi rol, lekin yulduzlik salohiyati
“PSG”da Barcola eng katta sahnada doimiy asosiy tarkib futbolchisiga aylana olmadi. Chempionlar Ligasi finalida ham ketma-ket ikki mavsum zaxiradan maydonga tushishga majbur bo‘ldi. 2025-yil yanvarida “Napoli”dan kelgan Khvicha Kvaratskhelia chap qanotda birinchi raqamli tanlovga aylandi.
Ammo Parijda asosiy tarkib kafolati bo‘lmagani, uning yulduz darajasiga yetib bormaganini anglatmaydi. Aksincha, mutaxassislar uni hali to‘liq ochilmagan, narxiga yarasha ulkan salohiyatga ega futbolchi sifatida ko‘rmoqda. Tezlik, kuch, pressingga tayyorlik va to‘g‘ri qaror qabul qilish – yuqori bosimli Premer-liga uchun ayni muddao.
Shu bois ham Barcola bu yozgi oynaning eng qimmat transferlaridan biriga aylanishi kutilayotgan nomzodlardan biri sifatida tilga olinmoqda.
“Arsenal” soyadagi raqobatchi
“Liverpool” bu poygada yolg‘iz emas. “Arsenal” ham Barcola bilan jiddiy qiziqib turibdi.
London klubi dastlab bozorni boshqa yo‘nalishda ochgan edi. Ularning asosiy orzularidan biri – “Real Madrid” yulduzi Vinicius Junior edi. Biroq “Sky Sports News” xabariga ko‘ra, madridliklar uni bu yozda sotish niyatida emas va yangi shartnoma bo‘yicha kelishuvga ishonchlari baland. Shunga qaramay, “Arsenal” futbolchining vaziyatini diqqat bilan kuzatishda davom etmoqda – amaldagi shartnomasi yakuniga bir yil qolgan.
Dharmesh Shethning ta’kidlashicha, “Arsenal” sport direktori Andrea Berta transfer bozorida ishlash uslubini aniq belgilagan: bitta maqsadga qadalib qolish emas, bir vaqtning o‘zida uch-to‘rt variantni maksimal darajada oldinga surib borish, so‘ng yakuniy qarorni qabul qilish.
O‘sha ro‘yxatda Barcola ham bor. U “PSG”ga yangi shartnoma imzolamasligini bildirgan, bunga asosiy sabab – eng katta o‘yinlarda zaxirada qolib ketgani. U bunday mavsumni yana bir bor boshdan kechirishni istamaydi va transferga ochiqligini anglatgan.
Demak, “Arsenal” ham, “Liverpool” ham bir xil eshikni taqillatmoqda. Farq shundaki, kim birinchi bo‘lib va qanchalik qat’iy taklif bilan kirib keladi?
Bozor savoli: “PSG” qay darajada yon berishi mumkin?
Bu transferning kaliti bitta omilga borib taqaladi: “PSG” narxdan qanchalik pastga tushishga tayyor?
Yozgi bozor yuqori darajadagi futbolchilar uchun rekord darajadagi baholarni ko‘ryapti. Barcola atrofidagi raqamlar ham buni tasdiqlaydi. “Liverpool” va “Arsenal” esa nafaqat bugungi sifat, balki keyingi besh-o‘n yilga mo‘ljallangan yulduzlik salohiyatiga pul tikmoqchi.
Anfieldda yangi qanot qahramoni sahnaga chiqadimi yoki Barcola Premer-ligaga Emirates orqali kirib keladimi – endi gap “PSG”ning stol ustidagi narxida va ingliz gigantlarining qanchalik dadil bo‘lishida.
