Liverpoolning Malo Gusto rejasimi?
Anfieldning o‘ng qanotidagi bo‘shliq: Liverpoolning Malo Gusto rejasimi?
Yozgi oyning ilk haftalarida sokin ko‘ringan Liverpool endi tezlikni oshirdi. Muddati qisqarib borayotgan transfer oynasi fonida Andoni Iraola tarkibdagi eng og‘riqli nuqtalardan birini yopish uchun kutilmagan yo‘nalishga burildi.
Mersisayd klubi hozircha atigi ikki futbolchini qo‘lga kiritdi: Osasuna safidan 34,5 million funt evaziga kelgan Victor Munoz va Barcelona’dan bir mavsumga ijaraga olingan Ronald Araujo. Bu, albatta, yetarli emas. Yangi bosh murabbiy Anfieldda ilk kundan boshlab agressiv, chuqur va raqobatbardosh tarkibni xohlaydi.
Hujum chizig‘ida asosiy orzu nishon allaqachon ma’lum: Bradley Barcola. Biroq Paris Saint-Germain belgilagan 145 million funtlik narx – bu boshqa daraja. Rio Ngumoha va Cody Gakpo bilan raqobatlasha oladigan yangi vinger baribir ustuvor yo‘nalish bo‘lib qolmoqda, lekin o‘ng qanot himoyasi ham shunchalik keskin masala.
Trentsiz hayot va o‘ng qanotdagi bosh og‘riq
Trent Alexander-Arnold o‘tgan yozda erkin agent sifatida Real Madridga yo‘l olganidan beri Liverpool o‘ng qanot himoyasida o‘zini topa olmayapti. O‘tgan mavsumda Dominik Szoboszlai bir necha bor o‘sha pozitsiyani yopishga majbur bo‘ldi, Jeremie Frimpong va Conor Bradley esa jarohatlar girdobidan chiqa olmadi.
Hozircha Frimpong birinchi raqamli variant. Ammo uning tabiiy roli – qanot himoyachisi, to‘liq o‘ng bek emas. Aynan shu tafovut Liverpoolni yangi nom tomon yetaklayapti: Chelsea himoyachisi Malo Gusto.
Chelseaning ichki manbalaridan biri sifatida tilga olinayotgan Simon Phillips xabariga ko‘ra, 23 yoshli fransuz nafaqat Liverpool, balki Tottenham, Bayern Munich va Manchester City e’tiborini ham tortgan. Bozor esa o‘z shartlarini qo‘ygan: Gusto uchun 75 million funt. Manchester City allaqachon bu summani to‘lashdan bosh tortib, muzokaralardan chekingan.
Narx baland, bosim esa ikki tomondan
Gustoga bo‘lgan qiziqish oshgani sari vaziyat murakkablashmoqda. Bir tomonda – Chelseaning talab qilayotgan 75 million funtlik narxi. Ikkinchi tomonda – o‘yinchining o‘zi. Phillips ma’lumotiga ko‘ra, fransuz himoyachi so‘nggi to‘rt oy davomida Stamford Bridge’ni tark etishni istab kelmoqda.
O‘tgan mavsumda u Premier League’da 34 o‘yinda maydonga tushdi, ammo yozda Atalanta’dan 47 million funt evaziga kelgan Marco Palestra uning mavqeini jiddiy o‘zgartirib yubordi. Xabi Alonso tizimida Palestra Reece James bilan birga o‘ng qanot yoki yarim himoyadagi o‘rni uchun kurashadi. Bu esa Gusto uchun startdagi imkoniyatlar keskin qisqarishi mumkin degani.
Chelsea uni 2023-yil yanvarida, 19 yoshida, Lyon safidan 35 million funtga sotib olgandi. O‘shandan beri u liga miqyosida eng istiqbolli o‘ng qanot himoyachilaridan biriga aylandi. Turli tizimlarda o‘ng bek ham, qanot himoyachisi ham bo‘lib o‘ynay olishi, 16 o‘yin bilan terma jamoa tajribasiga ega bo‘lishi, klub darajasida esa barcha musobaqalarda 134 o‘yin, 3 gol va 17 golli uzatma – bularning bari uning bozorini tushirmaydi.
Anfield uchun tayyor qurol
Gusto – zamonaviy to‘liq bek tasviri: tez, tajovuzkor, yuqoriga dadil qo‘shiladi va raqib qanotini bosim ostida ushlab turadi. Bunday profil Iraola futbol falsafasiga juda mos keladi. Anfieldda u Frimpong uchun nafaqat zaxira, balki to‘g‘ridan-to‘g‘ri raqobatchi bo‘lishi mumkin.
Liverpoolni hozircha faqat bitta narsa to‘xtatib turibdi – o‘sha 75 million funtlik narx. Agar Chelsea Gusto uchun talabni pasaytirsa, bozor birdan jonlanishi aniq. O‘yinchi allaqachon chiqish eshigiga yaqinlashgan, top-klublar esa navbatda turibdi.
Savol endi bitta: Anfielddagi yangi davrda o‘ng qanotni kimniki bo‘ladi – Frimpongnikimi yoki Malo Gustoniki?
