Liverpool markazidagi bo‘shliq: Alex Scott va 90 million funtlik muammo
Liverpool yozgi oynaning so‘nggi haftasiga kirar ekan, Anfield atrofida bitta savol tinmay aylanmoqda: yangi tayanch yarim himoyachi keladimi yo‘qmi?
O‘tgan mavsum ham, yakshanba kuni Newcastle bilan 2:2 hisobidagi to‘qnashuv ham bitta haqiqatni yana ochib tashladi – Liverpool markazdan juda oson yorib o‘tilmoqda. Raqiblar uchun oraliqlar topish, pressingni buzish, chiziqlar orasida bo‘shliqdan foydalanish haddan tashqari oson bo‘lib qoldi. Shuning uchun ham Richard Hughesdan bozor yopilishidan avval yuqori darajadagi “oltinchi raqam” olib kelish talabi kuchayib boryapti.
Shu fon’da The Athletic’ning James Pearce bergan xabari sovuq dush bo‘ldi: klub rahbariyati yaqin kunlarda yarim himoyachi olib kelishni rejalashtirmayotgani, e’tibor esa qanotdagi hujumiy kuchaytirishlarga qaratilgani aytilgan. Biroq bu yarim himoya masalasi butunlay yopildi, degani emas.
Alex Scott – rejalardagi “olti raqam”
The Independent sharhlovchisi Miguel Delaney ma’lumotiga ko‘ra, Liverpool tayanch yarim himoya uchun bitta “asosiy nishon”ni allaqachon belgilab qo‘ygan. Bir nechta manbalar aytayotgan ism bitta: Bournemouth markaziy futbolchisi Alex Scott.
23 yoshli futbolchi klubda 8-raqam ostida o‘ynaydi, ammo uning o‘yini, pressingdagi ishtiroki va to‘pni tezda qaytarib olishdagi mahorati uni zamonaviy tayanch yarim himoyachiga aylantiradi. Fotmob ma’lumotlariga ko‘ra, o‘tgan mavsum Scott raqibdan to‘pni tortib olish, pressingdan so‘ng birinchi pasni berish va dribling orqali bosimdan chiqish bo‘yicha jamoasida eng ko‘zga ko‘ringanlardan biri bo‘lgan.
U Fabinho yoki N’Golo Kante kabi klassik “buzg‘unchi” emas. Ammo bugungi Liverpoolga aynan shunday tipdagi futbolchi – to‘pni yutib olib, hujumni o‘zi boshlab beradigan, pressingni davom ettiradigan, texnikasi yuqori bo‘lgan markaziy o‘yinchi juda mos tushadi.
Curtis Jones ketganidan keyin bu ehtiyoj yanada yaqqolroq sezilyapti.
90 million funtlik devor
Biroq bitta katta muammo bor. Delaney xabariga ko‘ra, Bournemouth Scott uchun 90 million funt atrofida narx belgilagan. Liverpool bunday summani hozircha ko‘tarolmaydi. Klub ichkarisida “bu transferni keyingi yilga qoldirish kerak bo‘ladi” degan kayfiyat sezilmoqda.
Bu esa xavfli o‘yin. Chunki bozor hech qachon bo‘sh qolmaydi.
Chelsea allaqachon vaziyatni kuzatib turibdi, London klubi oynaning oxirgi kunlarida taklif berish imkoniyatini o‘rganayotgani aytilmoqda. Janubiy sohil klubi esa qat’iy pozitsiyada: yaqin kunlarda Scottni sotish niyati yo‘q. Bunday sharoitda kim sabrini birinchi bo‘lib yo‘qotadi – shuni vaqt ko‘rsatadi.
“Bir qarashga arzigulik” transfer hozir qanchalik real?
Yoz boshida transfer insayderi Alex Crook Scottning Liverpoolga o‘tishini “kuzatishga arzigulik variant” deb ta’riflagandi. Oradan qariyb uch oy o‘tdi, lekin amalda bir qadam ham tashlanmadi. Narx o‘zgarmadi. Bournemouth pozitsiyasi ham.
Boshqa tomondan, FSG uchun bu yoz allaqachon murakkab kechmoqda. Qanotdagi kuchaytirishlar, tarkibdagi boshqa bo‘shliqlar, moliyaviy balans – bularning hammasi bir vaqtda hal qilinishi kerak. Shunday paytda 90 million funtlik tayanch yarim himoyachi uchun “oxirgi daqiqa”da savdolashish qanchalik mantiqli?
Balki klub rahbarlari Bournemouthning qat’iyligidan xabardordir va avgust oxiridagi har qanday urinishni bekorga sarflangan kuch deb bilayotgandir. Lekin bozor shafqatsiz: hozir rad etilgan imkoniyat bir yil ichida butunlay yo‘qolishi mumkin.
Agar oynaning so‘nggi kunlarida Scott bo‘yicha eng kichik imkon eshigi ochilsa, Liverpool ikkilanib qolishga haqli emas. Chunki savol endi shunday: bu klub o‘z markazini qayta qurish uchun kerakli futbolchini kutishga tayyormi yoki raqiblar navbatdagi imkoniyatni qo‘ldan tortib oladimi?
