Max Verstappen: podium, lekin kayfiyat yo‘q

Hungaroring odatda motor qudratini yashiradigan, shassi va muvozanatni esa butunlay ochib tashlaydigan trek. Ana shunday sharoitda Red Bull hafta davomida burilishlarda beqarorlikdan aziyat chekdi. Shunga qaramay, Max Verstappen poygani ikkinchi o‘rinda yakunladi, oldinda esa mutlaq ustunlik ko‘rsatgan McLaren. Uning jamoadoshi Isack Hadjar oltinchi bo‘ldi.

Natija qog‘ozda yomon emas. Ammo Verstappen kayfiyati boshqacha edi.

“U hali o‘ziga bir tabassum ham ravo ko‘rgani yo‘q,” – dedi Brundle. – “U mashinadan jahlida, burilishlarda uni itarib yuborayotganidan, o‘zi xohlamagan vaqtda uni oldinga otib yuborayotganidan norozi. Menga ko‘rinishicha, mashina burilishlarda uni hayratda qoldiryapti, bu esa aslo kerak bo‘lmagan narsa.”

Red Bull’ning muammosi aniq: mashina tez, lekin notinch. Poygachi esa uni jilovlashga majbur.

Brundle Verstappenga tan berib, uning bu beqarorlikni qanday ko‘tarib yurayotganini alohida ta’kidladi.

“Men hozir Max bilan haqiqatan ham qiziqyapman,” – deya davom etdi u. – “U ajoyib haydayapti; mashinani ko‘tarib olib, u bilan yugurib ketadi, buni ko‘p odam qila olmaydi. Muammolar atrofida haydash – buni juda kam odam uddalaydi. Mening hayotimda juda ozchilik shunday beqaror mashinani boshqara olgan, uni ‘ko‘tarib’ podiumga olib chiqa olgan.”

Shu poygada ham aynan shunday bo‘ldi. Mashina uni qiynadi, lekin Verstappen baribir o‘z ishini qildi. Brundle buni qisqa qilib ifodaladi:

“Max o‘ziga xos ‘Max’ni qilayapti, lekin bir paytning o‘zida jamoaga bosimni juda baland darajada ushlab turishni ham xohlayapti.”

Ya’ni, natija bilan jamoani qutqarib qolmoqda, ammo omma oldida mashinaning kamchiliklarini ochiqchasiga eslatib, Red Bull’ga signal yuboryapti: bu daraja unga yetarli emas.

Davidson: “Red Bull norozi bo‘la olmaydi, lekin Max McLaren’ni ko‘rib kuyadi”

Sky Sports studiyasida yana bir sobiq poygachi, tahlilchi Anthony Davidson masalaga biroz boshqacha rakursdan qaradi. Uning fikricha, kontekstni inobatga olsak, Red Bull uchun bu natija – qabul qilsa bo‘ladigan daraja.

“Men aslida Red Bull’dan bu yerda juda ko‘p narsa kutgandim,” – dedi Davidson. – “Chunki bu trek motor quvvatiga uncha bog‘liq emas, va biz allaqachon ularning mashinasi sekin burilishlarda ancha yaxshi ko‘rinayotganini ko‘rganmiz.”

U Monte-Karlodagi misolni eslatdi:

“Monaco’da Max mashinani oldingi qatordan startga qo‘yishga muvaffaq bo‘lgandi, shuning uchun men ulardan bu yerda ham balki undan ham ko‘prog‘ini kutgandim. Lekin Max kurashishga majbur bo‘lgan muvozanat muammolari, Isack ham shunga o‘xshash qiyinchiliklarni boshdan kechirganini hisobga olsak, Red Bull bugungi ikkinchi va oltinchi o‘rinlardan norozi bo‘la olmaydi, deb o‘ylayman.”

Davidson buni “ular uchun juda yaxshi natija” deb baholadi. Biroq bir haqiqatni yashirishning iloji yo‘q: Verstappen podiumda turib ham, ko‘z o‘ngida uchib ketayotgan raqibni ko‘rdi.

“Max, ehtimol, eng ko‘p shundan xafa – McLaren’ning uzoqlashib, ko‘zdan g‘oyib bo‘lib ketayotganini tomosha qilishdan,” – dedi u.

Hungaroringda shunday manzara yuz berdi: McLaren oldinda, o‘z tempida, Red Bull esa orqada beqaror shassi bilan kurashayotgan holda, baribir natijani qutqarishga urinmoqda. Verstappen esa bu oraliqni qabul qiladigan poygachi emas.

Shu kayfiyat bilan yozgi mavsumning qolgan qismiga kirib borayotgan Red Bull oldida bitta savol turibdi: ular Max’ning bu ochiq bosimini natijaga aylantira oladimi yoki McLaren’ning bugungi ustunligi ertangi kunning yangi me’yoriga aylanadimi?