Messi mish-mishlarga nuqta qo‘ydi: Thiago Inter Miami'da qoladi
Lionel Messi bir lahza ichida bir necha kunlik shov-shuvni yer bilan bitta qildi. Inter Miami lagerida bo‘lib o‘tgan Leagues Cup oldidan jurnalist Bruno Vain unga oddiy savol bilan murojaat qildi: “Thiaguito ketayaptimi?”
Messi to‘xtamadi. Orqasiga ham qaramadi. Faqat bitta so‘z aytdi: “Yo‘q.”
Shu kifoya bo‘ldi. Ijtimoiy tarmoqlarda portlab ketgan, La Masia sari “kutilayotgan qaytish” haqida yozilgan barcha xabarlar shu bir og‘iz javob bilan ma’nosiz bo‘lib qoldi.
Thiago – hozircha Inter Miami futbolchisi
Haqiqat juda sodda: 13 yoshli Thiago hozircha Inter Miami akademiyasida qoladi. U 2023 yildan beri klub tizimida, asosan yarim himoyachi sifatida o‘ynayapti. Otasidan farqli ravishda, u darvoza tomon yuguradigan yakunlovchi emas, o‘yinni boshqaradigan futbolchi sifatida ko‘riladi.
Messi buni avvalroq “Simplemente Futbol” dasturidagi suhbatda aniq ta’riflab bergan:
“U ko‘proq o‘ylab o‘ynaydi, ko‘proq tashkilotchi, ko‘proq yarim himoyachi.”
Shu yo‘l bilan Thiagoning futboldagi yo‘li chizilayotgandek: pas, ritm, o‘yinni o‘qish, to‘pni so‘rab olish va taqsimlash. Inter Miami yoshlar tizimidagi o‘sishi barqaror davom etmoqda, hozircha Barcelonaga qaytish haqida hech qanday reja yo‘q.
Mish-mishlar qayerdan paydo bo‘ldi?
Shov-shuv havodan paydo bo‘lmadi. Thiagoning o‘tmishi bu gaplarga yoqilg‘i bo‘ldi.
2016–2019 yillar oralig‘ida u hali otasi Barcelona safida bo‘lgan paytda Barça Escola tizimida to‘p surgan. Keyin Messi Parijga ko‘chib o‘tgach, Thiago ham Paris Saint-Germain akademiyasiga qo‘shildi. Demak, u allaqachon ikki yirik yevropalik klub akademiyasida o‘ynab ko‘rgan bola.
Yana bir omil – yosh. Thiago bugun deyarli o‘sha yoshda, Lionel Messi esa bir paytlar Rosariodan Kataloniyaga katta orzular bilan yo‘l olganida shuncha yoshda edi. Farzandning Barcelonaga bo‘lgan muhabbati ham hech qachon yashirilmagan. Shu bois ijtimoiy tarmoqlarda bitta surat, bitta taxmin yetarli bo‘ldi – va La Masia haqidagi xabarlar tezda “ishonchli manbalar” darajasiga ko‘tarildi.
Ammo yakunda hammasini otaning o‘zi yopdi. Rasmiy bayonotlar, press-relizlar, uzun izohlar shart bo‘lmadi. Bitta “Yo‘q” yetarli bo‘ldi.
Ota izidan, lekin boshqa yo‘l bilan
Thiagoning Barcelonaga bo‘lgan aloqasi – bu faqat romantika emas, tarix ham. U bolaligidan Blaugrana muhitini ko‘rib ulg‘aygan, Camp Nou ichki hayotini o‘z ko‘zi bilan ko‘rgan. Shuning uchun ham ko‘pchilik uni tabiiy ravishda La Masiaga qaytadi, deb o‘ylaydi.
Ammo hozircha uning sahnasi – Inter Miami. Bu yerda u Messi soyasida emas, balki o‘z avlodining yangi loyihasi – MLS va klub akademiyasi kontekstida shakllanmoqda. Katta bosimdan nisbatan uzoq, ammo futbol olamining diqqat markazidan butunlay tashqarida ham emas.
Messi ham intervyularida o‘g‘illariga nisbatan bitta fikrni doim takrorlab keladi: ular o‘z yo‘lini o‘zi tanlashi kerak. Thiagoning bugungi qarori – aynan shunday mustaqil yo‘lning bir bo‘ligi.
Barcelona uchun og‘riqli sana, Messi uchun yangi bob
Bu voqea ramziy bir vaqtda yuz berdi. Barcelona bilan Messi yo‘llari ajralganiga besh yil to‘ldi. 2021-yil 5-avgust kuni u Blaugrana bilan xayrlashuv marosimida ko‘z yoshlarini yashira olmagandi. Futbol tarixidagi eng yorqin sahifalardan biri o‘sha kuni yopildi.
Endi esa, besh yil o‘tib, Barcelonaga qaytish haqida gap ketganda, mavzu Messining o‘zi emas, uning o‘g‘li haqida bo‘ldi. Futbol avlodlar almashinuvi bilan yashaydi, lekin har bir avlod o‘z qarorini o‘zi qabul qiladi.
Hozircha qaror aniq: Thiago Messi Inter Miami akademiyasida qoladi, o‘z o‘yinini, o‘z uslubini, o‘z hikoyasini quradi. La Masia esa, hozircha, faqat bolalikdagi xotira va kelajak uchun ochiq, ammo belgilab qo‘yilmagan eshik bo‘lib qolmoqda.
