Mohamed Salahning Anfielddagi ertagi tugadi
Mohamed Salahning “Anfield”dagi ertak tugadi. Endi u Qora dengiz bo‘yiga, “Trabzonspor”ga yo‘l olmoqda. Bepul transfer, lekin ulkan voqea.
34 yoshli misrlik yulduz “Liverpool” bilan shartnomasini bir yilga erta bekor qilishga rozi bo‘ldi. Aprel 2025 yilgacha amal qilishi kerak bo‘lgan kelishuv yakuniga yetmay turib uzildi. Bu qaror tasodifiy emasdi: og‘ir mavsum, zaxira, va Arne Slot bilan ochiqchasiga kelishmovchilik – bularning bari Salahni klub eshigidan chiqishga olib keldi.
To‘qqiz yillik davrning yopilgan sahifasi
Salah “Liverpool” uchun shunchaki yaxshi futbolchi emasdi. U klub tarixidagi eng buyuklar qatoriga kirgan holda ketmoqda. To‘qqiz yil ichida u yettita yirik sovrin ko‘tardi, “Merseyside”da afsonaga aylanish uchun yetarli bo‘lgan raqamlar bilan xayrlashdi: 442 o‘yinda 257 gol. Bu uni klub tarixidagi uchinchi eng yaxshi to‘purarga aylantirdi.
“Anfield” tribunalarini yillar davomida larzaga keltirgan, himoyachilarni dovdiratgan, darvozabonlarni ojiz qoldirgan futbolchi endi boshqa libosda maydonga tushadi. Bir paytlar 150 million funtlik taklifni rad etgan klub, uch yil o‘tib, uni bepul qo‘yib yuborishga majbur bo‘layotgani ham bu hikoyaning ironiyasini yanada kuchaytiradi.
Saudiyadan Qora dengizgacha
Salah uchun Saudiya Arabistoni yo‘li deyarli tayyor bo‘lib qolgandek tuyulgandi. “Al Ittihad”dan kelgan 150 million funtlik taklifni “Liverpool” rad etgan payt, ko‘pchilik uning kelajagini Yaqin Sharqda tasavvur qilgan edi. O‘tgan mavsumda “Leeds”ga qarshi o‘yindan keyin zaxirada qolib, bergan shov-shuvli intervyusi ham aynan o‘sha yo‘nalishni yanada realroq ko‘rsatdi.
Ammo sahna o‘zgardi. Endi Salah Saudiya cho‘llariga emas, Turkiya Superligiga yo‘l olmoqda. “Trabzonspor” o‘tgan mavsumni uchinchi o‘rinda yakunlab, Yevropa Ligasi pley-off bosqichiga yo‘llanma oldi. Demak, Salah hali ham yevropalik raqiblar qarshisida maydonga tushadi, faqat boshqa ranglarda.
Nega aynan “Trabzonspor”?
Sobiq Premyer Liga himoyachisi John Curtis “Sky Sports News” efirida bu savolni ochiq qo‘ydi va birinchi navbatda moliyani tilga oldi. Uning aytishicha, Salahning maoshi yiliga taxminan 17 million atrofida bo‘lishi kutilmoqda. Bu “Liverpool”dagidan bir oz kam, Saudiya Arabistonidagi potentsial takliflardan esa ancha past.
Demak, bu faqat pul masalasi emas. 34 yosh – hali ham yuqori darajada o‘ynash mumkin bo‘lgan, lekin eng yuqori bosqichdan bir qadam pastga tushish ehtimoli kuchayadigan yosh. Curtis ta’kidlaganidek, Salah yillar davomida eng zo‘r futbolchilar bilan yonma-yon harakat qildi. Endi esa u sifat jihatidan boshqa darajadagi jamoga kelmoqda. Bu har qanday yulduz uchun zarba bo‘lishi mumkin, lekin ayni paytda yangi chaqiriq ham.
Turkiyada esa uni mutlaqo boshqa muhit kutmoqda: fanatik muxlislar, shovqinli stadionlar, keskin raqobat va Yevropa sahnasiga chiqish imkoniyati. “Trabzonspor” uchun bu transfer – nafaqat sport, balki imidj jihatidan ham signal: ular katta ismlar uchun ham manzil bo‘la olishini ko‘rsatmoqda.
Afsona uchun yangi bob
Salahning “Liverpool”dagi oxirgi mavsumi charchoq va taranglik bilan esda qoldi. Zaxiraga tushish, murabbiy bilan ochiq mojaro, formadagi pasayish – bularning bari uning o‘zi uchun ham, klub uchun ham og‘riqli jarayon bo‘ldi. Shunday bo‘lsa-da, u klub tarixida qoldirgan izni hech kim o‘chira olmaydi.
Endi esa savol boshqacha: u Turkiyada qanday Salahga aylanadi? Yana bir bor jamoani yelkasiga olib chiqadigan lidermi? Yoki asta-sekin katta sahnadan chekinayotgan yulduzmi?
Javoblar endi “Anfield”da emas, Trabzondagi shovqinli kechalarda topiladi.
