Mudrykning kutilmagan qaytishi: 614 kunlik sukutdan so‘ng
Mykhailo Mudryk yana safda. Bu safar u na sud zalida, na advokatlar davrasida, balki Chelseaning Avstraliya va Janubi-Sharqiy Osiyodagi tayyorgarlik safarida, Hong Kongdagi mashg‘ulot maydonida paydo bo‘ldi. Klubning o‘zi ham bunday ssenariyni kutmagandi.
Uning oxirgi rasmiy o‘yini ortda qolganiga 614 kun bo‘ldi. Shundan beri qancha gap-so‘z, qancha gumon, qancha sukut.
To‘rt yillik taqiq va bir imzo bilan tugagan “jang”
2024-yil noyabrida oddiygina dopинг testi hammasini o‘zgartirdi. Mudryk namunasida yurak xastaliklarini davolashda ishlatiladigan, lekin sportchilarda chidamlilik va tiklanishni oshirishi mumkin bo‘lgan meldoniy izlari topildi. Futbol assotsiatsiyasi (FA) uni dastlab vaqtincha chetlatdi, so‘ng “salbiy topilma” uchun to‘rt yilga diskvalifikatsiya berdi.
Ukrainalik vinger taslim bo‘lmadi. Bu yil boshida ishni Sport arbitraj sudi (CAS)ga olib chiqdi. Ammo burilish kutilmagan tomondan keldi: FA va Jahon antidoping agentligi (WADA) bilan kelishuv, aybni qabul qilish va allaqachon o‘tagan muddatiga teng diskvalifikatsiya bilan cheklanish.
Yangi qoidalar Mudryk foydasiga ishladi. Endi siydik namunasida aniqlangan “past konsentratsiya”dagi meldoniy bunday jazoga sabab bo‘lmaydi. Natija aniq: u darhol o‘ynashi mumkin.
Mudryk bunga javoban ijtimoiy tarmoqlarda hissiyotlarga to‘la bayonot qoldirdi. U bu davrni “kariyerasidagi eng og‘ir bosqich” deb atadi va yana bir bor ta’kidladi: taqiqlangan moddani hech qachon ataylab qabul qilmaganini.
Alonso uchun “kutilmagan sovg‘a”
Yangi bosh murabbiy Alonso uchun ham bu xabar birdaniga tushgan momaqaldiroq bo‘ldi, lekin yoqimli tomoni bilan. Tottenhamga qarshi Sidneyda kechgan o‘rtoqlik uchrashuvidan keyingi matbuot anjumanida u Mudryk mavzusidan chetlab o‘tmadi.
“Biz u uchun xursandmiz, – dedi ispan mutaxassisi. – U bu vaqt ichida nimalarni boshidan kechirganini to‘liq tasavvur qila olmaymiz. Muhimi, u yana jamoaning bir qismi ekanini his qilsin. U buni anchadan beri sezmagan.”
Alonso so‘zida davom etdi. U Shakhtar davrini esladi: birga-bir vaziyatlardagi portlashi, o‘zi yaratgan epizodlari, o‘yin taqdirini bir lahzada o‘zgartira olishi. “U maxsus futbolchi,” – dedi u.
Endi u maxsus futbolchini Osiyodagi safarga qo‘shib oladi. Ammo bu qaytish ertakning baxtli yakuni emas, balki yangi, murakkab bobning boshlanishi.
85 hafta yolg‘izlikda
Mudrykning so‘nggi 85 haftasi – bu elita futbolidan uzilgan hayot tarzi. Chelseaning Cobham bazasidan yiroqda, G‘arbiy Londondagi kichik Uxbridge klubi maydonida yakka tartibdagi mashg‘ulotlar, shaxsiy murabbiylar, yollangan darvozabonlar.
Bu – o‘zini o‘zi ushlab turish urinishlari. Lekin yakka mashg‘ulotlar hech qachon to‘liq jamoaviy ritmni, yuqori tezlikdagi o‘yin amaliyotini almashtira olmaydi. Chelsea ham buni yaxshi biladi: deyarli ikki yil maydonga tushmagan futbolchining jismoniy holati va o‘yin ritmi qanchalik zararlanganini endi sinchiklab baholash kerak bo‘ladi.
Shunga qaramay, bozor darhol jonlandi. Angliya va Yevropadan qiziqishlar yog‘ildi. Xabarlar bo‘yicha, Coventry City ham safga qo‘shilgan – u yerda bosh murabbiy Frank Lampard Mudryk bilan 2022-23-yilgi Chelseadagi muvaffaqiyatsiz oraliq davrida birga ishlagan.
Hozircha esa hech qanday yakuniy qaror yo‘q. Klub qolgan mavsumoldi davrida uning holatini ko‘rishni istaydi. Chelsea yangi 2026-27 mavsumini 24-avgust kuni Fulhamga safar bilan boshlaydi, o‘sha paytgacha Mudryk haqida aniqroq tasavvur paydo bo‘lishi kerak.
To‘lib ketgan chap qanot va toraygan imkoniyatlar
Alonso ham shoshilmayapti. U Mudrykni qayta moslashtirish – jarayon ekanini ochiq aytadi. “U har kuni yakka o‘zi mashq qilgan hayotdan butunlay boshqacha dunyoga o‘tmoqda,” – deydi u. Bu oson o‘tish emas.
Asl savol esa boshqa joyda: Chelsea safida unga joy bormi?
Mudryk chetlatilgan davrda klub chap qanotga katta sarmoya kiritdi. Rekord darajadagi 117 million funt evaziga kelgan Morgan Rogers shu flankda o‘ynashi kutilmoqda. O‘tgan yili 52 million funtga Jamie Gittens olib kelingan. Mavsumoldida atigi 17 yoshli Dastan Satpaev chap qanotda o‘zini ko‘rsatdi. Yana Pedro Neto ham bor – ikkala qanotda ham ishlay oladigan futbolchi.
Bu raqobat fonida Mudrykning qaytishi romantik hikoyaga o‘xshashi mumkin, lekin raqamlar boshqacha gapiradi. Chelsea 2023-yilda uni Shakhtar Donetskdan 89 million funtga olib kelganida, ko‘pchilik uni kelajak yulduzi sifatida ko‘rgan. Amalda esa 73 o‘yinda atigi 19 gollik ishtirok. Ko‘pincha ishonchsiz, o‘ziga ishonchi so‘nib qolgan, bosim ostida ezilgan futbolchi manzarasi.
Endi esa deyarli ikki yillik tanaffus. Ruhiy tomoni yanada og‘irlashgani aniq.
Qarorlar yozgi bozorga bog‘liq
Mavsumoldi bozoridagi har bir qadam Mudryk taqdiriga ta’sir qiladi. Hozirgi sharoitda eng mantiqli variant – ijaraga jo‘natishdek ko‘rinadi: balki Strasbourg, balki qayta tiklanish uchun Shakhtar, yoki Premyer-ligadagi boshqa klub.
Yana bir ssenariy ham haqiqatga yaqin: Chelsea uni hozircha o‘zida saqlab, faqat jismoniy holatini tiklashga e’tibor qaratadi, rasmiy o‘yinlarda esa kamdan-kam qo‘llaydi. Qishki oynada esa ijaraga yoki hatto to‘liq transferga yo‘l ochilishi mumkin.
Shartnoma masalasi ham havoda osilib turibdi. Dopинг bo‘yicha diskvalifikatsiya odatda shartnoma shartlarini buzish sifatida talqin qilinishi mumkin. Bu esa, agar tomonlar kelishsa, chiqib ketishni yengillashtiruvchi omil bo‘lishi mumkin – Juventusdagi Paul Pogba holatida bo‘lgani kabi. Faqat Chelsea 89 million funtlik investitsiyaning hech bo‘lmaganda bir qismini qaytarib olishni xohlashi tabiiy.
Qaytish – yengillik, kelajak – jumboq
Hozircha Mudryk uchun eng katta yutuq – maydonga qaytishning o‘zi. U yana jamoa bilan mashq qiladi, yana kiyinish xonasidagi shovqinni eshitadi, yana stadion chiroqlarini ko‘radi.
Lekin bu qaytish uning Stamford Bridgedagi yo‘lini uzaytiradimi yoki aksincha, yangi manzilga eltuvchi ko‘prikka aylanadimi – hozircha hech kim aniq ayta olmaydi.
Bir narsani vaqt ko‘rsatadi: 614 kunlik sukutdan keyin Mudryk yana o‘zini eshittira oladimi?
