NHLdagi eng yaxshi shartnomalar: yangi moliyaviy davrda yutuqlar

Leo Carlssonning “eng ko‘p maosh oluvchi yulduz” maqomi atigi 26 kun yashadi.

Iyul boshida yiliga 18 millionlik offer sheet butun ligani larzaga keltirgandi. Oradan ko‘p o‘tmay, Macklin Celebrini San Jose Sharks bilan besh yillik, 94 million dollarlik ulkan shartnomaga qo‘l qo‘ydi va NHL moliyaviy manzarasini butunlay o‘zgartirdi. 2027-28 mavsumidan kuchga kiradigan yangi bitim yiliga 18,8 millionlik “cap hit” bilan Carlssonni deyarli bir millionga ortda qoldiradi.

Bu pulga arziydimi? Hozirgi bozor sharoitida – mutlaqo. Celebrini hozircha sayyoradagi eng yaxshi xokkeychi emas, lekin bu pog‘onaga juda yaqinlashib qoldi. U endigina 20 yoshda, ortda 115 ochkolik mavsum, Olimpiadadagi debyut va deyarli har o‘yinda muz ustidagi eng xavfli o‘yinchi bo‘lib ko‘ringan turnir. Bozor qayta belgilangan bo‘lsa, uning tepasida aynan Celebrinining turishi mantiqan to‘g‘ri.

Biroq bu burilish Sharks uchun noqulay paytga to‘g‘ri keldi. “Cap” o‘smoqda, lekin Celebrinining raqami baribir og‘ir. Oldinda Will Smith, Michael Misa, Sam Dickinson kabi yulduzlar uchun ham yangi shartnomalar turibdi. San Jose endi bu yangi moliyaviy olamda yo‘l topishi, atrofini yetarli darajada sifatli tarkib bilan to‘ldira olishi kerak. Aks holda, asosiy yadro aql bovar qilmas pulga tushayotgan raqiblar bilan kurashish qiyinlashadi.

Eng katta ustunlik kimda bo‘ladi? Yulduzlarini yozning bu portlashidan oldin arzonroq raqamlarda uzoq muddatga bog‘lab qo‘ygan klublarda. Vaqt va vaziyat ayrim eski shartnomalarni endi mutlaq “o‘g‘irlik” darajasidagi bitimga aylantirmoqda.

Montreal: kelajakni bugun arzonlashtirgan klub

• Lane Hutson – 8 yil, yiliga 8,85 mln
• Ivan Demidov – 8 yil, yiliga 9,15 mln

Moliyaviy nuqtai nazardan ligadagi eng yaxshi joylashgan yadro? Hozircha bu maqomga Montreal Canadiens juda yaqin. Hutson va Demidov bo‘yicha vaqt tanlovi klub foydasiga ishladi: nazariy jihatdan ikkalasi ham Carlsson offer sheetidan keyin kutib turishi va yanada qimmatga tushishi mumkin edi. Shunga qaramay, Hutson o‘tgan yilning oktabrida imzo chekdi, Demidov esa Carlsson shovqinidan atigi bir necha kun oldin bitimni yopdi.

Eng katta yutuq – muddat. Montreal ikkalasini ham sakkiz yillik shartnoma bilan qo‘lga kiritdi, bu esa sentabrdan keyin endi variant bo‘lmaydi. Demidovning shartnomasi esa hatto 2027-28dan keyin kuchga kiradi.

Demidov atigi 20 yoshda, Hutson 22da. Klub ularning butun cho‘qqi yillarini deyarli Carlssonning bitta AAViga teng, Celebrinidan ham arzonroq umumiy “cap hit” evaziga qo‘lga kiritdi. Ustiga ustak, Nick Suzuki, Cole Caufield va Juraj Slafkovsky ham 20 yoshlarning o‘rtalarida bo‘lishiga qaramay, yiliga 8 milliondan kam maoshga uzoq muddatga bog‘langan. Montreal uchun bu – yorqin, juda yorqin kelajak manzarasi.

Dallas: Wyatt Johnston bilan vaqtni yutgan jamoa

• Wyatt Johnston – 4 yil, yiliga 8,4 mln

Johnstonning shartnomasi allaqachon “qimmat sharob” kabi yillab totib bormoqda. Dallas Stars uni sakkiz yilga qulflab qo‘ya olmadi, lekin keyingi to‘rt mavsum uchun yiliga 8,4 million – bugungi bozorda top-sentrdan kutish mumkin bo‘lgan eng yoqimli raqamlardan biri.

Bu raqam Dallasga bozorning yuqori qavatida harakatlanish imkonini berdi: Mikko Rantanenni olib kelish, Jason Robertsonga hozircha bo‘lsa-da, joy topish – bularning bari Johnston bitimi tufayli. Yana to‘rt yil davomida Stars elit jamoalar safida qolishi kutilmoqda. Johnston 23 yoshda, demak, yaqin yillarda muzda yanada ko‘proq mas’uliyat va daqiqalar oladi.

Sonlar o‘zi gapiradi: so‘nggi uch mavsum – 65, 71 va 86 ochko. Ammo uning haqiqiy qiymati pley-offda ochiladi. To‘rt mavsumlik pley-off yo‘lida u allaqachon 22 ta gol urgan, bu ko‘rsatkich bilan Paul Kariya, Marcel Dionne, Owen Nolan, Keith Primeau kabi afsonalardan o‘zib ketgan. Bunday hujumchini yiliga 8,4 millionga ushlab turish – ligadagi eng shirin sdelkalardan biri.

Tampa: Brandon Hagel va “cap”ni yutgan qaror

• Brandon Hagel – 6 yil, yiliga 6,5 mln

Chicago Blackhawksning 23 yoshli Hagelni shoshilinch tarzda Tampa Bay Lightningga sotgani hanuz savol uyg‘otadi. Hagel Florida qirg‘oqlariga kelgach, ketma-ket ikki mavsumda o‘rtacha o‘yinga bir ochkodan ko‘proq ishlab, 2024-25da 90 ochko to‘pladi. U elit darajadagi hujumchiga aylandi va fevral oyida Kanadaning Olimpiya terma jamoasida ham joy oldi.

Shu fonida Lightning tomonidan imzolangan sakkiz yillik shartnoma (undan yana olti yili oldinda) – haqiqiy mahorat namunasi. Yiliga 6,5 million – “cap” qayerga ketayotganini hisobga olsak, deyarli mayda xarajat. Bu raqam Tampaga kelajakdagi asosiy bosh og‘riq – Nikita Kucherov shartnomasini yumshoqroq qabul qilish imkonini beradi. Hart Trophy sohibi bo‘lgan Kucherov hozir 9,5 million oladi va yangi bitimda oshishi deyarli aniq. Hagel kontrakti esa bu jarayonni ancha hazm bo‘larli qiladi.

Ottawa: Brady Tkachuk ketdi, lekin yadro joyida

• Jake Sanderson – 6 yil, yiliga 8,05 mln
• Tim Stutzle – 5 yil, yiliga 8,35 mln

Brady Tkachukning ketishi Senators muxlislari uchun og‘ir zarba bo‘ldi. Lekin klub hali ham juda sog‘lom, yosh va nisbatan arzon yadroga ega. Sanderson o‘tgan mavsumda 66 ochkolik sur’atda o‘ynadi, 14 gol urdi va so‘nggi ikki mavsumda o‘rtacha deyarli 25 daqiqa muzda bo‘ldi. Bu – to‘liq birinchi juftlik himoyachisi yuklamasi.

Stutzle esa allaqachon bir mavsumda 90 ochko to‘plab ulgurgan va o‘tgan yil ham o‘rtacha o‘yinga bir ochkodan yuqori darajani ushlab turdi. Ottawa tarkibi mukammal emas, lekin klub bugungi bozor qiymatidan ancha past raqamga haqiqiy top-sentr va №1 himoyachini uzoq muddatga bog‘lab qo‘ygan. 2026-27da ortga qadam tashlash uchun sabab ko‘rinmayapti.

Toronto: Matthew Knies – kuch, texnika va arzon “cap hit”

• Matthew Knies – 5 yil, yiliga 7,75 mln

Bir necha oy davomida transfer mish-mishlarining markazida bo‘lgan Knies qoladigan bo‘ldi. Toronto Maple Leafs uchun bundan yaxshiroq ssenariy topish qiyin. Hozirgi NHLda uning profili juda kam uchraydi: muntazam ochko to‘playdigan, lekin shu bilan birga jismoniy jihatdan raqibni ezib tashlay oladigan hujumchi.

U atigi 23 yoshda va o‘sishga joy juda katta. O‘tgan mavsumda jarohatlar bilan kurashgan holda, juda og‘ir holatdagi Leafs tarkibida ham 66 ochko bilan shaxsiy rekordini yangiladi. Sog‘lom Knies, yaxshiroq tizim va kuchliroq sheriklar bilan – bu allaqachon liganing eng xavfli “power forward”laridan biriga aylanishi mumkin. Yiliga 7,75 millionlik “cap hit” esa bunday paket uchun mutlaq sovg‘a.

Utah Mammoth: Dylan Guentherga uzoq muddatli ishonch

• Dylan Guenther – 7 yil, yiliga 7,14 mln

Utah klubi 2024 yil sentabrida Guentherga sakkiz yillik shartnoma taklif etganida, bu ko‘proq ishonch kreditiga o‘xshardi. O‘sha paytga qadar u Arizona Coyotes safida ikki mavsum davomida atigi 24 gol urgan edi. Ammo klub Utahga ko‘chgach, Guenther portladi.

So‘nggi ikki mavsum: 27 va 40 gol. 23 yoshli hujumchi NHLdagi eng tez va aniq zarbalardan biriga ega ekanini isbotlab bormoqda. Eng qiziq raqam – hal qiluvchi gollar. 91 karyera golining 20 tasi g‘alaba goliga aylangan. Bu tasodif emas, bu – klatch instinkt.

Hech kim Guenther bir kun kelib 50 gollik forvardga aylanib qolsa, hayron bo‘lmaydi. Mammoth esa uni keyingi yetti mavsum uchun Celebrinidan ikki baravar arzon narxda bog‘lab qo‘ygan. Franchayz uchun bu – strategik jackpot.

Detroit: yangi yuzlar – Lucas Raymond va Moritz Seider

• Lucas Raymond – 6 yil, yiliga 8,07 mln
• Moritz Seider – 5 yil, yiliga 8,55 mln

Dylan Larkin Detroit Red Wings libosida allaqachon oxirgi o‘yinini o‘tkazib bo‘lgan bo‘lishi mumkin. Shunday bo‘lsa, kelasi besh yillikda klubning asosiy yuzi sifatida sahnaga Lucas Raymond va Moritz Seider chiqadi. Pley-off qurg‘oqchiligi davom etayotgan bo‘lsa-da, Detroit kamida ikki tayanch ustunini uzoq muddatga qo‘lga kiritgan.

Raymond so‘nggi uch mavsumda o‘rtacha 27 gol va 76 ochko ishlab kelmoqda. Seider esa to‘liq ikki yoqlama o‘yin ko‘rsata oladigan himoyachi sifatida kelajakdagi Norris Trophy nomzodlaridan biri bo‘lib ulgurgan.

Agar Larkin yakunda treyd qilinsa, Alex DeBrincat esa keyingi mavsumdan so‘ng erkin agent sifatida ketib qolsa, Detroit “cap” bo‘yicha katta bo‘shliq oladi. Aynan shunda Raymond va Seiderning hozir juda jamoa foydasiga bo‘lgan shartnomalari klubga bozorga agressiv kirish imkonini beradi.

Minnesota: Matt Boldy va nihoyat ochilgan eshiklar

• Matt Boldy – 4 yil, yiliga 7 mln

2026 yilgi pley-off – Matt Boldy uchun haqiqiy sahnaga chiqish bo‘ldi. Minnesota Wild nihoyat o‘n yildan ortiq tanaffusdan so‘ng seriyani yutdi, bunda Boldyning o‘rni beqiyos: 42 gol bilan yakunlangan muntazam mavsum, ustiga 11 pley-off o‘yinida 7 gol. 25 yoshli hujumchi, shuningdek, AQSh terma jamoasining Olimpiada oltinida ham muhim rol o‘ynadi.

Bularning barchasi fonida uni yana to‘rt yil davomida yiliga atigi 7 millionga ushlab turish – Minnesota uchun strategik sovg‘a. Aynan shu raqam klubga Kirill Kaprizovni ulkan shartnoma bilan saqlab qolish, yozda esa Quinn Hughes bilan ham katta extension bo‘yicha kelishish imkonini berdi. Agar Wild o‘z vaqtida Boldyni shunday darajada arzon raqamga qulflamaganida, bu jumboqning bo‘laklari bir-biriga sig‘magan bo‘lardi.

Washington: Logan Thompson va “arzon” elita darajasidagi darvozabon

• Logan Thompson – 5 yil, yiliga 5,85 mln

Yangi moliyaviy reallik darvozabonlar bozorini to‘liq ostin-ustun qilmaydi – pozitsiya butunlay boshqacha. Lekin Logan Thompsonning shartnomasi baribir alohida e’tiborga loyiq. Prognoz qilish eng qiyin pozitsiyada u asta-sekin shunday statistik portfel to‘plamoqdaki, ligada kam sonli kiprlar unga tenglasha oladi.

200dan ortiq o‘yinda Thompsonning karyera “save percentage”i – .912. Eng yomon mavsumida ham bu ko‘rsatkich .908dan pastga tushmagan. O‘tgan mavsumda u 58 o‘yinda maydonga tushib, 29,3 “goals saved above expected” bilan ligada peshqadam bo‘ldi – bu to‘liq №1 darvozabon yuklamasi va undan ham ko‘prog‘i.

Ligadagi o‘rtacha “save percentage” o‘tgan mavsum .896 bo‘lganini, Thompson esa Philipp Grubauer, Jordan Binnington, Adin Hill kabi darvozabonlardan kamroq maosh olayotganini hisobga olsak, Washington Capitals darvozada juda qulay pozitsiyada turibdi.

Carolina: Jackson Blake va Logan Stankoven bilan “cap”ni yanchish

• Jackson Blake – 8 yil, yiliga 5,11 mln
• Logan Stankoven – 8 yil, yiliga 6 mln

Agar “cap” bo‘yicha eng yaxshi qurilgan tarkib uchun Montreal bilan bahslashadigan jamoa bo‘lsa, bu – Carolina Hurricanes. Buning markazida aynan Stankoven va Blake turibdi. Klub 2025 yil yozida ikkisini birdan sakkiz yillik bitimga ko‘ndirdi. Keyingi mavsumda ular har biri 20 tadan ko‘proq gol urdi, Blake 53 ochko bilan muntazam mavsumni yakunladi.

Ammo ularning asl qiymati pley-offda ochildi. Hurricanes Stanley Cup yo‘lida ikkinchi kubogini qo‘lga kiritar ekan, Blake va Stankoven 19 o‘yinda jami 18 gol va 36 ochko ishlab, jamoaning yuragi va ritmini belgilab berdi.

Bugun Carolina “cap” bo‘yicha deyarli 10 millionlik bo‘shliqka ega. Blake va Stankovenni uzoq muddatga shunchalik past raqamda qulflash – kelgusi yillarda erkin agentlar bozorida yoki treydlar bozorida istalgan yulduzga tashlanish imkonini beradi. Yangi moliyaviy davrda bunday manevr erkinligi – chempionlikka eltadigan eng muhim omillardan biri emasmi?