Pedro Neto – Chelsea bilan uzoq muddatli shartnoma
Pedro Neto bu yozda klub atrofida esayotgan shovqin-suronga boshqacha javob berdi. Atrofida Manchester City singari grandlarning qiziqishi, bozorning oxirgi kunlarigacha cho‘zilgan savdolar, murabbiylar almashinuvi – hammasi bor edi. U esa qolishni tanladi. Endi esa bu sadoqat va startdagi yorqin o‘yinlar yangi, uzoq muddatli shartnoma bilan taqdirlandi.
26 yoshli portugaliyalik qanot himoyachisi/vinger endi yana besh yilga o‘z kelajagini Chelsea bilan bog‘ladi, bitimda qo‘shimcha bir yilga uzaytirish varianti ham bor. Maosh ham oshadi. Klubning hozirgi transfer siyosati fonida bu shunchaki formal yangilanish emas – bu loyiha markazida kimlar turishini ochiq ko‘rsatib qo‘ygan qaror.
Alonso tizimidagi asosiy qurol
Xabi Alonso qo‘l ostida Neto oddiy vinger emas. U butun yon chiziq bo‘ylab yuguradigan, hujumni ham, pressingni ham yelkasiga oladigan hujumkor wing-back sifatida ishlatilmoqda. Besh o‘yinda ikki gol – raqamlar sodda ko‘rinishi mumkin, lekin uning o‘yinga ta’siri bundan ancha keng.
2024 yilda Wolves safidan 54 million funt evaziga kelgan Neto hozirga qadar Chelsea uchun 40 ta golga bevosita hissa qo‘shgan (gol + assist jamlanmasi). Bu uni jamoaning hujumdagi eng barqaror qurollaridan biriga aylantiradi. Aynan shuning uchun ham klub uni uzoq muddatga bog‘lab qo‘yishga shoshildi.
Bu qaror yolg‘iz emas. Yil davomida João Pedro, Reece James va Moisés Caicedo ham yaxshilangan shartnomalarga imzo chekdi. Cole Palmer esa o‘tgan mavsumdayoq kelajagini klub bilan bog‘lashini ochiq aytib, 2024 yilda yangi bitimni imzolagan edi. Neto shu safning navbatdagi bo‘g‘ini bo‘lib qo‘shildi – asosiy tayanchlar asta-sekin mahkamlanmoqda.
Uzun shartnomalar, lekin yopiq eshiklar emas
Klub egalarining strategiyasi allaqachon ko‘rinib bo‘lgan: asosiy futbolchilarga uzoq muddatli, rag‘batlantiruvchi shartnomalar berish. Bu moliyaviy barqarorlik, tarkibni rejalashtirish va aktiv qiymatini saqlash uchun qulay yo‘l.
Ammo bu uzun muddatli bitimlar futbolchini “muzlatib qo‘yish”ni anglatmaydi. Neto misoli shuni ko‘rsatdi – ko‘p yillik shartnomaga ega bo‘lish, yaxshi o‘yinlar uchun maoshni qayta ko‘rib chiqish imkonini to‘sib qo‘ymaydi. Klub ichida ham shu signal berilmoqda: kim loyiha uchun kurashsa va maydonda yetakchilik qilsa, mukofotini oladi.
Yaqin kunlarda yana bir necha shartnoma yangilanishlari e’lon qilinishi kutilmoqda. Stamford Bridge atrofidagi ohang asta-sekin barqarorlashayotganini his qilish qiyin emas.
Enzo Fernández – boshqa yo‘lni tanlagan ism
Neto qarori ayniqsa Enzo Fernández bilan bo‘lgan voqealar fonida yanada keskinroq ko‘rinadi. Transfer oynasining so‘nggi soatlarida Argentina terma jamoasi yarim himoyachisi Manchester City safiga 125 million funt evaziga sotildi.
Fernández bilan dastlab yangi shartnoma borasida gaplashuvlar bo‘lgandi, lekin u yangilangan bitimga ega bo‘lmadi. Mart oyida u omma oldida kelajagi haqida savollar qo‘ydi, yanvarda Enzo Maresca bosh murabbiylikdan ketganini tanqid qildi va Madridda yashash istagini aytib, Real Madrid bilan bog‘liq gap-so‘zlarni avj oldirdi. Chelsea bunga javoban uni ikki o‘yinga diskvalifikatsiya qildi.
Madrid klubi bu qiziqishni omma oldida pasaytirgan bo‘lsa-da, Fernández yangi chaqiriq istagini yashirmadi. Pep Guardiola o‘rniga Maresca kelgan City tez orada uning eng jiddiy xaridori sifatida oldinga chiqdi. Chelsea o‘z narxidan pastga tushmaslikka qat’iy qaror qilgandi, ammo taklif shartlari ularning uzoq muddatli rejalariga mos kelishini ko‘rishgach, ajralish eng to‘g‘ri yo‘l sifatida baholandi.
Klub ichida esa bir alam bor edi: jamoa qiynalayotgan pallada asosiy yetakchilardan biri ko‘proq mas’uliyat ko‘rsatishi mumkin edi. O‘tgan mavsum 10-o‘rin va Yevropa yo‘llanmasiz yakunlangani fonida bu kamchilik yanada og‘riqli ko‘rindi.
Uzulib qolgan ko‘priklar
Liam Rosenior aprel oyida ishdan ketdi, Alonso may o‘rtalarida tayinlandi. Yangi murabbiy kelgach, klub Fernándezni qayta integratsiya qilish imkoniyatini ham ko‘rib chiqdi. Lekin yarim himoyachi yozma transfer so‘rovi topshirgani aytiladi.
U, shuningdek, o‘tgan mavsum yakunida va yozgi oynada sobiq murabbiy – katta ehtimol bilan Maresca – bilan aloqa qilgani haqida klubga xabar bergani tushunilgan. Bu esa ichki ishonchni yanada yemirdi.
Stamford Bridge rahbariyati uchun bu yetarli signal edi: jamoa ichidagi munosabatlar, ayniqsa uning jamoadoshlari bilan bo‘lgan aloqasi jiddiy darajada buzilgan. Fernández tomoni hozircha bu borada izoh bermagan.
Shunga qaramay, klub ichidagi manbalar bitta fikrni qat’iy rad etmoqda – Chelsea bu transferda “bosim ostida qolib”, majburan sotgan emas. Ular buni strategik qaror sifatida ko‘rmoqda. Neto bilan yangi shartnoma esa shu pozitsiyani mustahkamlovchi dalil sifatida talqin qilinmoqda: asosiy futbolchilar loyiha g‘oyasiga ishonyapti va buning evaziga mukofot olmoqda.
Savdo oynasining shovqinidan keyin Chelsea uchun savol aniq: Neto kabi sodiq va tizimga mos futbolchilar atrofida yangi davrni qura olishadimi yoki Fernández kabi yo‘lini boshqa joydan izlagan yulduzlarning o‘rni yana kimlar bilan to‘ldiriladi?
