Real Madrid Enzo Fernándezga qiziqish bildirmadi
Transfer bozori yana qizib bormoqda, lekin Madridda bitta eshik bugun qattiq yopildi. Real Madrid rasmiy bayonot bilan chiqib, Chelsea yarim himoyachisi Enzo Fernández bo‘yicha hech qanday qiziqish bildirmaganini va kelajakda ham bunday rejasi yo‘qligini ochiq-oydin ma’lum qildi.
So‘nggi haftalarda argentinalik futbolchi nomi Madrid bilan juda ko‘p bog‘landi. Agent Javier Pastore ispaniyalik nashr MARCA bilan suhbatda o‘z mijozining “Chelsea’dan ketish imkoniyatlarini ko‘rib chiqayotganini” aytgach, mish-mishlar yanada kuchaydi. Shu bilan birga, ESPN 29-may kuni xabar berishicha, agar Fernández klubdan ketishni majburan yo‘lga qo‘yishga harakat qilsa, Chelsea taxminan 120 million funt atrofida tovon puli talab qiladi.
Shu fonida Real Madridning keskin ohangdagi bayonoti transfer bozoridagi kayfiyatni birdan o‘zgartirdi. Klub matni aniq va keskin: hech qanday yashirin uchrashuv, orqa eshikdan muzokara yoki “og‘zaki qiziqish” bo‘lmagan.
“Oxirgi kunlarda Real Madrid CF tomonidan Enzo Fernándezga qiziqish bildirayotgani haqida paydo bo‘lgan xabarlar va bayonotlar munosabati bilan klub shuni ma’lum qiladiki, mazkur futbolchini qo‘lga kiritish bo‘yicha na bevosita, na bilvosita biror urinish bo‘lmagan, xuddi shuningdek, bunday operatsiyani amalga oshirish niyati ham yo‘q”, — deyiladi Madrid klubining rasmiy bayonotida.
Bu faqat rad etish emas, bu – ohirgi nuqta. Madrid shuningdek, hurmat ohangini ham alohida ta’kidladi.
“Real Madrid Enzo Fernándezga, uning yuksak darajadagi futbolchilik fazilatlari va faoliyatiga, shuningdek, Chelsea FC’ga – klub bilan bizni bog‘lab turgan a’lo darajadagi institutsional munosabatlarga eng chuqur hurmatini bildiradi”, — deyiladi matnda davom etib.
Keyingi jumla esa aynan mish-mishlarga qaratilgan zarba bo‘ldi. Klub o‘z obro‘si va Chelsea bilan aloqalarini himoya qilish uchun keskin so‘z ishlatdi: “Aynan Chelsea FC kabi klubga nisbatan zarur bo‘lgan hurmat va Real Madrid harakatlarini doimo boshqarib kelgan institutsional sadoqat tamoyillari tufayli, klub asossiz va haqiqatga mos kelmaydigan bunday taxminlarni qat’iy rad etishni zarur deb hisoblaydi”.
Shu orada, ESPN manbalariga ko‘ra, Chelsea ichkarida vaziyatni ancha sovuqqon baholamoqda. Klub Enzo Fernándezni Argentina terma jamoasi bilan Jahon chempionati kampaniyasidan keyingi ta’tilini yakunlab, odatdagidek mavsumoldi yig‘iniga qaytishiga umid qilmoqda. Ya’ni London klubi hozircha o‘z yulduzini kelasi mavsum rejalarining markazida ko‘rishda davom etyapti.
Agentning ochiq gaplari, bozorning keskin ko‘tarilishi, 120 million funt atrofidagi narx va Real Madridning keskin rad javobi — bularning bari bir savolni ochiq qoldiradi: Enzo Fernández keyingi qadamini qayerga tashlaydi?
Madrid eshigi hozircha berk. London esa uni ushlab turishga tayyor. Endi navbat o‘yinchining o‘zida va yozgi bozorning beomon ritmida.
