Real Madrid Rodri uchun hujumga o‘tmoqda
Real Madrid nihoyat o‘z niyatini yashirishni bas qildi. Endi ular bevosita yurakni nishonga olishyapti – Manchester City o‘yinini boshqarib turgan asosiy figura, ispaniyalik kapitan Rodri.
Madrid klubi allaqachon City bilan dastlabki aloqani o‘rnatgani ma’lum. Gap shunchaki qiziqish haqida emas, aniq reja haqida ketmoqda: bir yil qolgan shartnoma fonida Rodri uchun taxminan 50–60 million yevro atrofida taklif tayyorlanmoqda. Zamonaviy bozorni hisobga olsak, bu “yig‘ishtirib olingan” narx, ayniqsa o‘yin darajasini inobatga olganda.
Ammo Manchester bu stolga sotuvchi sifatida o‘tirgani yo‘q. Aksincha, ular Rodri atrofida yangi davrni qurmoqchi.
Cityning “yo‘q”i va yangi shartnoma rejasi
Etihaddagi pozitsiya aniq: Rodri sotilmaydi. Klub rahbariyati uni qo‘yib yuborish o‘rniga, yangi uzoq muddatli shartnoma bilan bog‘lab qo‘ymoqchi. Enzo Maresca davri boshlanmoqda, va City bu davrni aynan Rodri boshchiligida ko‘rishni istayapti.
Bitta muammo bor – vaqt. Shartnoma muddati qisqarib boryapti, Real esa aynan shunday vaziyatlarni ko‘p marta o‘z foydasiga hal qilgan klub. Ular sabr bilan kutishni ham, bosimni oshirishni ham bilishadi.
Hozircha esa Rodri maydondan uzoqda. U dushanba kuni beliga operatsiya qildirdi va tiklanish jarayonida. Shuning uchun ham u Community Shield va yangi mavsumdagi ilk Premier League uchrashuvini o‘tkazib yuborishi kutilmoqda. City uchun bu sportiy zarba, Madrid uchun esa – imkoniyat oynasi.
Perezning ichki bosimi va ispaniyaliklar masalasi
Florentino Perez qayta saylangach, Real Madrid ichida bir mavzu yana ko‘tarildi: Ispaniya terma jamoasida klub vakilligi juda kam. Madridning tarixiy imiji – nafaqat yulduzlar klubi, balki La Roja tayanchlaridan biri sifatida shakllangan. So‘nggi yillarda esa bu rasm xira tortgan.
Bu yozda Marc Cucurella transferi bilan ispaniyaliklar soni oshdi. Endi navbat Rodriga. Ispaniya terma jamoasi sardori, jahon chempioni, Yevropa chempioni, o‘yin sur’atini boshqaradigan futbolchi. Perez uchun bu faqat taktik emas, siyosiy qaror ham bo‘lishi mumkin.
Real ichida bu transfer g‘oyasiga qarshi bo‘lganlar topilayotgani yo‘q – hamma deyarli bir fikrda: agar bozor imkon bersa, Rodri kelishi kerak.
Guardiola tizimining yuragi
Manchester City uchun bu faqat bir futbolchini yo‘qotish emas. Bu – tizimning yuragini sug‘urib olishga teng.
Pep Guardiola yillar davomida o‘z o‘yinini Rodri atrofida qurdi. U to‘pni qabul qilishda, tor vaziyatlarda yechim topishda, pressingni sindirishda, ritmni belgilashda – hammasida markazda turdi. City to‘pni aylantirsa, sur’atni oshirsa yoki pasaytirsa, bu boshqaruv pulti ko‘pincha uning oyog‘ida edi.
Xuddi shunday rolni u yozda Ispaniya terma jamoasida ham bajardi. Turnir davomida o‘yinni “shakllantiruvchi” futbolchi sifatida maydonni boshqardi, finalga eltgan yo‘lda ham, g‘alaba chog‘ida ham.
Shu boisdan ham, uning yo‘qligi City uchun oddiy rotatsiya emas. Statistikaga qaralsa, Rodri jarohatlar bilan qiynalgan mavsumlarda Cityning Premier League chempionligini saqlab qololmagani tasodif emasdek ko‘rinadi. Bunday o‘yinchi o‘rnini to‘ldirish emas, faqat yo‘qotishni yumshatish mumkin.
Anderson – voris yoki faqat o‘rinbosar?
Savol shunday: Rodri ketadigan bo‘lsa, kim uning o‘rnini bosadi?
Javob qisqa: to‘liq hech kim.
Ammo Cityda bitta nom alohida tilga olinmoqda – Anderson. Angliya terma jamoasi a’zosi bo‘lgan bu 23 yoshli yarim himoyachi boshqa tipdagi futbolchi, ammo salohiyat bor. U hozircha Rodri kabi o‘yinni boshqaradigan “diktator” emas, lekin box-to-box roli orqali statistik ko‘rsatkichlari bilan yaqinlashib bormoqda.
City ichida unga Rodrining bevosita kloni sifatida emas, balki yangi shakldagi markaziy figura sifatida qaralayotgandek. Agar u rivojlanishda to‘xtamasa, Maresca qo‘lida yangi markaziy o‘yin quruvchi paydo bo‘lishi mumkin.
Shu bilan birga, klub bozorga ham qarab turibdi. Lille va Marokash terma jamoasi yarim himoyachisi Ayyoub Bouaddi bilan kelishuv bo‘yicha ishlar olg‘a silayotgani aytilmoqda. Bu ham Rodri atrofidagi vaziyatga bilvosita javob – City markazni oldindan mustahkamlashga urinmoqda.
Madridning qadami, Cityning sabr sinovi
Endi sahnada ikki kuchli iroda to‘qnashadi. Bir tomonda – o‘z o‘yin falsafasini Rodri atrofida qurgan, uni yangi davr sardori sifatida ko‘rayotgan Manchester City. Ikkinchi tomonda – Ispaniya terma jamoasi sardorini o‘z uyiga qaytarib, yulduzlar to‘plamini yana bir supernom bilan boyitmoqchi bo‘lgan Real Madrid.
Madrid taklif bilan chiqadi. City rad etadi. Narx oshishi mumkin, bosim kuchayishi mumkin. Rodrining o‘zi ham bir payt kelib tanlov qilishga majbur bo‘lishi mumkin.
Savol bitta: Etihad devorlari bu safar ham bosimga chiday oladimi yoki Madrid yana bir bor “imkonsiz” tuyulgan transferni amalga oshiradimi?
