Shotlandiya politsiyasi Glazgodagi Hamdo‘stlik o‘yinlaridan so‘ng xorijlik sportchilarni qidiryapti

Shotlandiya politsiyasi Glazgodagi Hamdo‘stlik o‘yinlaridan so‘ng uyiga qaytmagan xorijlik sportchilar bo‘yicha tergov boshladi. Mahalliy OAV ularni Uganda va Pokistondan kelgan bokschilar sifatida tilga olmoqda.

“Police Scotland bir nechta sportchi bedarak yo‘qolgani haqida xabarlar oldi”, – dedi politsiya matbuot kotibi seshanba kuni kechqurun. “Holat yuzasidan tergov davom etmoqda, ichki ishlar bo‘yicha mas’ul idora bilan dastlabki muloqot boshlangan”.

Ugandadagi NBS Sport telekanali ma’lumotiga ko‘ra, mamlakatning oltita a’zodan iborat boks jamoasidan to‘rttasi seshanba kuni rejalashtirilgan parvoz oldidan g‘oyib bo‘lgan. Telekanalga gapirgan bokschilardan biri ular boshpana so‘rashni rejalashtirayotganini aytgan.

Pakistan Today nashri esa Pokiston delegatsiyasidagi bokschilardan biri ham seshanba kuni uyga qaytish reysiga kelmaganini yozdi.

Bunday holatlar Hamdo‘stlik o‘yinlari tarixida yangilik emas. So‘nggi yillarda musobaqa Avstraliya va Britaniya mezbonligida o‘tgach, sportchilar yo‘qolib qolishi haqidagi xabarlar muntazam takrorlanib kelmoqda. 2018-yil Gold Coastdagi Hamdo‘stlik o‘yinlaridan bir oy o‘tib ham Avstraliya rasmiylari 50 nafar sportchi va delegatsiya a’zosini qidirayotgan, yana 190 kishi esa boshpana so‘ragan edi.

Glazgodagi 11 kunlik musobaqaga 74 mamlakatdan 3 mingga yaqin sportchi qatnashgan. Endi esa ularning bir nechtasi taqdirini sport maydonlari emas, migratsiya idoralari va sud zallari hal qilishi mumkin.