Silverstone’da yangi Lego ‘minicar’lar bilan jangga tayyor
Silverstone oldida yana g‘ishtlar shovqini. Bu safar jiddiyroq.
O‘tgan yili Miami Grand Prix oldidan bo‘lib o‘tgan haydovchilar paradi Formula 1 paddokida alohida sahna bo‘lgandi: to‘liq hajmdagi Lego bolidlarida kulgi, to‘qnashuvlar, uchib ketayotgan bo‘laklar. Endi esa Lego shu tajribani boshqa bosqichga olib chiqib, yakshanba kungi British Grand Prix oldidan Silverstone yo‘lagiga butunlay yangi “minimashinalar” armiyasini olib kelmoqda.
Katta bolidlardan jangga tayyor “minicar”larga
Miami tajribasidan keyin asosiy xulosa aniq bo‘ldi: haydovchilar Lego mashinalarini asrash uchun emas, ular bilan zavqlanib “urushish” uchun o‘tiradi. Shuning uchun o‘tgan yilgi ikki o‘rinli, ketma-ket joylashgan Lego bolidlari tarixda qoldi. Ularning o‘rnini 22 ta yakka “go-kart” egallaydi – har biri alohida haydovchiga mo‘ljallangan, elektr motorli, plastik bamperli va xavfsizlik halqali.
Bir so‘z bilan aytganda, bu safar Lego haqiqiy jang uchun “minicar”lar yasadi.
Lego katta dizayneri Jonathan Jurion ESPN bilan suhbatda Miami saboqlarini yashirmadi: “Miami’da juda ko‘p narsani o‘rgandik. Eng asosiysi – mashinalar albatta sindiriladi”, – deydi u. Shundan keyin jamoa yangi konstruktsiyani boshidan o‘ylab chiqdi.
“Go-kartlarni imkon qadar xavfsiz qilishga harakat qildik. Xavfsizlik halqasi qo‘shdik, atrofini bamper va qanotlar bilan o‘radik, shunda o‘tgan safardagidek ko‘p g‘isht yo‘qotmaymiz. Eng muhimi, haydovchilar o‘zlarini xavfsiz his qilsin”, – deydi Jurion.
28 mingdan ortiq g‘isht, 6 400 soat mehnat
Har bir “minicar” ortida ulkan ishlab chiqarish jarayoni yotadi. Kladno (Chexiya) shahridagi Lego zavodida 20 nafar dizayner, muhandis va yig‘uvchi jamoasi har bir kartni 28 300 dan ortiq g‘ishtdan qo‘lda terib chiqqan.
Kuzov ostida maxsus po‘lat karkas yotadi, uning ustiga esa g‘ishtlar qatlam-qatlam qilib joylashtirilgan. Natijada har bir mashina F1’ning 11 ta jamoasi liberyasi va logotiplarini aniq aks ettiradi – televizor orqali ko‘rganingiz ranglar, endi g‘ishtlarda.
Umumiy loyiha ko‘lami ham kichik emas: 22 ta “minicar”ni ishlab chiqish va qurish uchun jami 6 400 soat sarflangan. Tayyor kartlarning og‘irligi 280 kilogrammga yetadi, shundan 65 kilogrammi – sof Lego g‘ishtlari.
Tezlik ham oshgan. Miami’dagi yirik ko‘lamli Lego bolidlari taxminan 13 mil/soat atrofida yurishga qodir bo‘lgan bo‘lsa, yangi kartlar deyarli 18 mil/soat tezlikka chiqadi. F1 standartlari bo‘yicha bu kulgili darajada sekin, ammo haydovchilar qo‘lida – aynan yetarli tezlik.
Miami izidan – yana vayrona kutilyapti
Miami’dagi paradni eslasak, tezlik unchalik katta bo‘lmagani bilan, trek bo‘ylab Lego bo‘laklari yomg‘iri yog‘gandi. Endi esa mashinalar kichikroq, chaqqonroq, haydovchilar esa tajribaliroq. Bu kombinatsiya Silverstone atrofida yanada kattaroq “buzg‘unchilik” va’dasini bermoqda.
Jurion va uning jamoasi aynan shuni kutgan: “Haydovchilar Miami’dagi paradni qanday qabul qilganini sinchiklab o‘rgandik. Ularning reaksiyasi, kulgisi, bir-biriga bo‘lgan munosabati – barchasini ko‘rdik. Tomoshabinlarning fikr-mulohazalarini ham yig‘dik. Natijadan juda xursand bo‘ldik, shu bois bu safar ham boshqacha bo‘lib qolmasligiga umid qilamiz”, – deydi u.
Silverstone’da haydovchilar paradi mahalliy vaqt bilan soat 13:00 da boshlanadi. Sahna – tarixiy trek, rollarda – dunyoning eng tezkor 22 nafar haydovchisi va ularning Lego’dan yasalgan jangovar “minicar”lari.
Qolganini esa start chizig‘iga chiqishdan oldin o‘sha kartlar ustida o‘ynaladigan kichik, ammo juda shov-shuvli “poyga” hal qiladi.
