Tonny Vilhena Willem II bilan qaytmoqda
Tonny Vilhena yana qaytmoqda. Bu safar – qutqaruv uchun kurashadigan, ammo ambitsiyasi baland Willem II bilan.
Yaqinda Eredivisie’ga ko‘tarilgan tilburgliklar tajribali yarim himoyachi bilan kelishuvni yakunlash arafasida. VI xabariga ko‘ra, 31 yoshli sobiq Niderlandiya terma jamoasi futbolchisi yunonlarning Panathinaikos klubidan Willem II safiga o‘tishi kutilmoqda. Afina jamoasida o‘tgan mavsum atigi uchta uchrashuvda maydonga tushgani fonida bu transfer ham futbolchining, ham klubning yo‘lini yangidan chizishi mumkin bo‘lgan qarorga o‘xshaydi.
Feyenoorddan boshlangan yo‘l
Vilhena nomi Niderlandiyada avvalo Feyenoord bilan bog‘lanadi. Rotterdam klubi akademiyasidan chiqqan yarim himoyachi asosiy tarkibda o‘nlab murabbiylar almashgan davrni ko‘rdi, 258 o‘yin o‘tkazdi va 41 ta gol urdi. U o‘sha yillardagi jamoaning ritmini belgilab bergan futbolchilardan biri bo‘lgan: pressing, intensivlik, maydonning har qarichida kurash.
2019-yilda u mamlakatni tark etib, Rossiyaga yo‘l oldi va Krasnodar bilan shartnoma imzoladi. U yerda ham o‘z o‘rnini topdi: 79 uchrashuv, 9 gol. Biroq martaba xaritasi tez orada yana o‘zgardi.
2022-yil yanvarida Vilhena La Liga sari burildi – Espanyol bilan ijaraga kelishildi, yozda esa transfer to‘liq kuchga kirdi. Ispaniya bosimi, texnik futbol, taktik intizom – u bu muhitga moslasha oldi, lekin yo‘l yana davom etdi.
Italiya, Gretsiya, Turkiya – va yana uyga qaytish
Keyngi bekat – Italiya. Salernitana bilan o‘tkazilgan mavsum unga Serie A’ning keskinligi va pastki qismdagi jamoalar qanday kurashishini ko‘rsatdi. Shundan so‘ng 2023-yil yozida Panathinaikos bilan shartnoma tuzildi. Yunon klubi safida u 44 uchrashuvda maydonga tushdi, o‘yin amaliyoti qaytdi, lekin barqarorlik uzoqqa cho‘zilmadi.
2024/2025-yilgi mavsumda Vilhena Turkiyaga yo‘l oldi – Alanyaspor uni olti oylik ijaraga oldi. 15 o‘yin, 2 gol. Qisqa, ammo samarali davr. Ammo Afina klubiga qaytgach, u ortiqcha futbolchilar ro‘yxatiga tushib qoldi. Panathinaikos endi boshqa yo‘l tanladi, Vilhena esa yangi sahifa ochishga majbur bo‘ldi.
Endi bu sahifa Willem II bilan yozilishi kutilmoqda. Eredivisie’ga endigina qaytgan klub uchun bu transfer – tajriba, xarakter va kiyinish xonasida so‘z o‘tkaza oladigan futbolchini qo‘lga kiritish demak. Ular uchun maqsad oddiy emas: ligada qolish, ikkinchi darajaga bir zumda qaytib ketmaslik.
Willem II uchun qanday Vilhena kelmoqda?
Bu endi Feyenoorddagi yosh, portlovchan Vilhena emas. Bu – Rossiya, Ispaniya, Italiya, Gretsiya va Turkiya maydonlarini ko‘rgan, turli futbol madaniyatlaridan o‘tgan, 30 yoshdan oshgan, o‘yinni o‘qiydigan, bosimga chidashni biladigan futbolchi.
Willem II uchun bunday profil juda muhim. Yangi ko‘tarilgan klub odatda tajribaga tayanadi: o‘yin tempini ushlab turadigan, yosh futbolchilarga yonma-yon turib, qarorni to‘g‘ri qabul qilishni o‘rgatadigan futbolchilarga. Vilhena aynan shunday rolni bajarishi mumkin – chuqurroq markazda ham, biroz oldinda, pressing boshlanadigan nuqtada ham.
Savol endi bitta: Feyenoorddan chiqqan bu o‘yinchi yana Eredivisie sahnasida bosh rolni o‘ynay oladimi yoki bu transfer uning katta sahnadagi so‘nggi katta sinovi bo‘lib qoladimi?
