Tyson Fury Pattayada g‘alaba qozondi – Anthony Joshua navbatda
Tailandning Pattaya shahridagi Max Muay Thai Stadium kechasi katta shou emasdi. Shov-shuvsiz, kameralar kam, zalda taxminan 1 500 tomoshabin. Lekin ringga chiqqan ism – Tyson Fury. Va bu kecha, qanchalik sokin ko‘rinmasin, uning Anthony Joshua bilan kutilayotgan superjangiga olib boradigan yo‘lda muhim bekatga aylandi.
Kichik zal, katta ism
37 yoshli Fury Mariusz Wachga qarshi sakkiz raundlik bahsga tushdi. Aslida, jang sakkizga ham bormadi. Britaniyalik yirik vazn chempioni yetti raund davomida polyak raqibini bosim ostida ushlab, nazoratni qo‘ldan boy bermadi. Sakkizinchi raund boshlanishida esa 46 yoshli Wach o‘tirgan joyidan qayta turmadi – burchagi jangni to‘xtatdi.
Fury uchun bu – professional faoliyatidagi 36-g‘alaba. Va nihoyat, 2022 yilda Derek Chisora ustidan qozongan g‘alabadan beri ilk muddatidan oldin to‘xtatilgan jang.
Ringdagi ustunlik haqida ko‘p narsa aytish shart emas. Ijtimoiy tarmoqlarda paydo bo‘lgan qisqa lavhalar hammasini ko‘rsatib qo‘ydi: dastlabki raundlarda Fury masofani, tempni o‘zi belgiladi. Bir epizodda Wach uni o‘ng qo‘l bilan tutib olgani ko‘rinadi, xolos. Qolganida esa Fury tashabbusni qo‘ldan bermadi.
Beshinchi raundda esa manzara yanada ravshanlashdi. Lavhalardan birida Fury raqibiga yaqin masofada qayta-qayta yuqoriga zarbalar yo‘llayotgani ko‘rinadi. Wachning mudofaasi yemirilgan, oyoqlari og‘irlashgan, faqat tajribasi uni jangda ushlab turgandek.
Hatto bir jurnalist oltinchi raund o‘rtalarida Fury Wachni o‘pib qo‘ygani haqida yozdi – bu holat ham ringda bosim qanchalik bir tomonlama bo‘lgani, Fury o‘zini qanchalik erkin his qilganini ko‘rsatadi.
Uchinchi, to‘rtinchi, beshinchi raundlar – Furyning nazorati. Yettinchi – jarayonning mantiqiy davomi. Sakkizinchi raund esa umuman boshlanmay qoldi. Wach va uning burchagi yana uch raundlik zarba ostini ko‘rishga tayyor emasdi.
Netflix uchun jang, ammo kelajak – Joshua
Bu kecha televideniye orqali jonli efirga ham uzatilmadi. Radio yo‘q, pay-per-view yo‘q. Jang butunlay boshqacha maqsadga xizmat qiladi: u Netflix’ning “At Home With The Furys” hujjatli serialining uchinchi mavsumiga kiritiladi.
Fury bugun endi nafaqat ring yulduzi, balki ommaviy madaniyat qahramoni. Uning ochiq gapiradigan fe’l-atvori, realiti-shoular, sahna ortidagi hayoti uni sport chegarasidan ancha tashqariga olib chiqib bo‘lgan. Lekin Pattayadagi bu kecha – go‘yo boshqa davrdan qolgan epizod.
Avvaliga arenada odatdagi Muay Thai dasturi o‘tkazildi. Shundan keyin xodimlar ringni yangidan yig‘ib, kanvasni almashtirib, Fury uchun boks kechasini tayyorlashdi. Hech qanday yirik reklama kampaniyasi yo‘q, millionlab tomoshabinlar ham emas. Faqat stadiondagi muxlislar, bir necha jurnalist va YouTube kanallari. Qolgan dunyo esa natijani ijtimoiy tarmoqlarda yangilanishlar orqali kutdi.
Fury jangdan so‘ng ringda hazil aralash tarixga ishora qildi: “Thriller in Manila”ni, “Rumble in the Jungle”ni esladi va Pattayadagi jangni “punch-up in Pattaya” deb atadi. Kulgili, ammo o‘ziga xos ramziy ibora: bu kecha katta tarixiy afsonalar bilan bir qatorda turmaydi, lekin uning karerasidagi muhim bo‘lim sifatida qolishi mumkin.
Fury shuningdek, chiptalardan tushgan foyda mahalliy xayriya tashkilotiga – imkoniyati cheklangan bolalar va talabalarni qo‘llab-quvvatlovchi fondga yo‘naltirilishini aytdi. Bu ham kechaning kayfiyatini o‘zgartirdi: shou kichik, ammo ma’nosi kattaroq.
Joshua soyasidagi g‘alaba
Bu g‘alaba bitta savolni yana oldinga surdi: endi navbat Anthony Joshuagami?
Joshua ham o‘z navbatida qaytish yo‘lida. U yaqin kunlarda Saudiya Arabistonida albaniyalik Kristian Prenga bilan ringga chiqadi. Fury jangdan so‘ng buni ochiq aytdi: “Bugun men sinovimdan o‘tdim. Endi u o‘z sinovidan o‘ta oladimi, ko‘ramiz”.
Ko‘pchilik Fury Pattayadan to‘g‘ri Jeddahga uchib, Joshua jangini ring yonidan tomosha qiladi, g‘alaba bo‘lsa, ikkalasi ham ringda kelasi superjangni e’lon qiladi, deb o‘ylagandi. Ssenariy chiroyli, lekin Fury boshqa yo‘lni tanladi.
U aniq javob berdi: uydan uzoq bo‘lishdan charchagan.
“Uyga qaytaman. Xotinim bilan yuzma-yuz turishim kerak. Uyga borganimda dazmol qilishim kerak. So‘nggi yetti oyda oltita oy uyda bo‘lmadim”, dedi u. “Jeddahga bormayman, xotinim va bolalarim yoniga qaytaman. Qayta kuch to‘playman va umid qilamanki, kelasi hafta katta jangga shartnoma imzolaymiz”.
Qayerda bo‘ladi bu jang?
Eng katta savol esa hamon javobsiz: Fury – Joshua to‘qnashuvi qayerda o‘tadi?
Joshua tarafidan Eddie Hearn uning shartnomasida jang joyi sifatida Buyuk Britaniya ko‘rsatilganini aytgan. Lekin boks olamida boshqa gaplar yuribdi – AQShdagi arenalar tilga olinmoqda.
Fury esa buni o‘ziga xos tarzda izohladi: “Qayerga borsak, o‘sha yerga boramiz. Kim biladi? Vegas bo‘lishi mumkin, New York, Ireland, London. Kim biladi, jang qayerda bo‘lishini?”
Bu noaniqlik, aslida, qiziqishni yanada oshiryapti. Fury bir paytlar Wembley Stadiumni 96 ming muxlis bilan to‘ldirgan, Tottenham Hotspur Stadiumda 64 500 tomoshabinni yig‘gan. Pattayadagi bo‘sh o‘rinlar aks etgan lavhalar esa bugungi kechaning qanday fon ekanini eslatib turdi – bu faqat tayyorgarlik, katta sahnaga olib boradigan oraliq pog‘ona.
Shu orada u ringda o‘z ishini qildi: raqibini yengdi, to‘xtatib qo‘ydi, o‘zini sog‘lom va jangovar holatda ekanini ko‘rsatdi. Endi navbat Joshua va uning sinoviga.
Savol esa oddiy, lekin keskin: Joshua ham o‘z kechasidan omon o‘ta oladimi – va nihoyat, butun boks olami kutayotgan britancha superjangga yo‘l ochiladimi?
