Verstappen: nafaqaga yaqinroq edim, lekin Red Bullni tark etmayman
Matbuot anjumanining oxirgi daqiqalari edi. Shovqin bosilib, savollar siyraklashgan paytda Max Verstappen bir jumla bilan butun bahsning markaziga zarba berdi.
"Men jamoani almashtirishdan ko‘ra nafaqaga chiqishga yaqinroq edim", dedi u.
Shu bilan hammasi aniq bo‘ldi. To‘rt karra chempion bu yil o‘zining Formula 1 dagi kelajagi haqida o‘zi bilan uzoq tortishdi. Endi esa u Red Bull bilan shartnomasini 2030 yil oxirigacha uzaytirdi.
Bu qarorga kelish oson bo‘lgani yo‘q.
Gibrid davrga qarshi chiqqan purist
Yil boshida yangi dvigatel reglamenti kuchga kirgach, Verstappen birinchi bor o‘ziga savol berdi: bu sportda qolishning o‘zi kerakmi?
U uchun muammo gibrid texnologiyaning o‘zi emasdi. Masala – uning qanday ishlayotgani, ayniqsa, 2026 yildan kuchga kirgan yangi formatda.
Yaponiya Gran-prisidan keyin sabr kosasi to‘ldi. Suzuka – taqvimdagi eng sof, eng haydovchi yo‘li sifatida ko‘riladigan trassa. Aynan o‘sha yerda u o‘zini o‘zi eshitiladigan darajada baland ovozda savolga tutdi.
Doimiy energiya tiklash, batareyani to‘liq to‘ldira olmaslik, to‘g‘ri chiziq oxirida 470 ot kuchiga yaqin quvvatdan mahrum bo‘lish, eng tez burilishlarda energiya yig‘ishga majbur bo‘lish, o‘tishlar esa mashinalar o‘rtasidagi quvvat farqiga qarab hal bo‘lishi… Verstappen uchun bu poyga emas edi.
"Bu bunga arziydimi? Yoki sportdan zavq olmaganingda, oilang bilan uyda bo‘lish, do‘stlaringni ko‘proq ko‘rish yaxshiroqmi?" – degandi u o‘shanda.
U purist. U doimo chegarada haydashni xohlaydi. Batareya tugab, mashina bo‘g‘ilib qoladigan Formula 1 – uning orzusidagi Formula 1 emas.
Nürburgringda eslatilgan haqiqiy poyga
May oyida u o‘zi qidirgan javobni boshqa seriyada topdi. Red Bull brendlangan Mercedes AMG GT bilan Nürburgring 24 soatlik poygasida ishtirok etdi.
U yerda Verstappen boshqacha ko‘rindi. Birinchi stintdayoq mashinani 10-o‘rindan peshqadamlikka olib chiqdi. Kechdagi kardanshaft nosozligi bo‘lmaganda, g‘alaba ham qo‘ldan ketmasdi.
Mana shu – uningcha, poyga. Toza quvvat, qo‘rquvsiz hujum, hech qanday sun’iy cheklovlar yo‘q.
Shu fon bilan u Formula 1 dagi hozirgi dvigatellarga yanada tanqidiy qaray boshladi. U yolg‘iz emas edi – boshqa haydovchilar ham energiya yetishmovchiligi, sun’iy cheklovlar haqida ochiq gapira boshlashdi. Nihoyat, sport rahbarlari ham bu ovozlarni eshitishga majbur bo‘ldi.
Keyingi ikki yil ichida ichki yonuv dvigatelining umumiy quvvatdagi ulushini oshirish bo‘yicha qoidalar yumshatilmoqda. 2028 yilga borib, ichki yonuv va elektr nisbati taxminan 60:40 bo‘ladi. Hozirgi 53:47 ga qaraganda, bu sezilarli qadam.
Bu energiya ochligini butunlay yo‘qotmaydi, lekin haydovchi uchun mashinani boshqarish zavqini qaytarishga yaqinlashtiradi.
So‘nggi poygalarda Verstappen ohangidagi o‘zgarish sezila boshladi. Tanqidlar o‘rnini murosaga yaqinroq, vaziyatni qabul qilgan ohang egalladi. U buni o‘zi ham tan oldi.
"Bir necha birinchi poygalardan keyin Laurent Mekiesga: ‘Kelajak haqida hech qanday savol bilan yonimga kelma’, deganman. Chunki o‘zim ham qolishni xohlayotganimni bilmasdim", dedi u.
Keyin esa qo‘shib qo‘ydi: u FIA va Formula 1 rahbariyati bilan "juda yaxshi suhbatlar" o‘tkazganini, qoidalar asta-sekin yaxshilanayotganini his qilayotganini aytdi. O‘zi ham moslashgan, vaziyatni qabul qilgan, hozir boridan maksimalini olishga urinayotganini ta’kidladi.
2031 ga qarab: V8 orzusi va siyosiy jang
Endi paddokda navbatdagi katta bahs – 2031 yilda kuchga kiradigan yangi dvigatel reglamenti.
FIA prezidenti Mohammed Ben Sulayem ochiqchasiga eski davrga qaytishni istayapti: tabiiy so‘riluvchi V8, imkon qadar kam yoki faqat ramziy gibrid. Go‘yoki vaqtni o‘n besh yil orqaga qaytarish.
Asl muammo esa gibridning o‘zi emas. Masala – energiya tiklash, batareya sig‘imi va quvvatni chiqarish o‘rtasidagi muvozanatda.
Agar sof V8 ga o‘tilsa, boshqa bosh og‘riqlar paydo bo‘ladi: dvigatellar samaradorligi pasayadi, mashinalar poygani ancha ko‘p yoqilg‘i bilan boshlashiga to‘g‘ri keladi. Bunga hamma ham rozi emas.
Audi va Mercedes kabi ishlab chiqaruvchilar V8 ga qarshi emas, lekin ular turbokompressorni saqlab qolishni xohlashadi. Ba’zilari esa gibrid qismini ramziy emas, sezilarli darajada kuchli ko‘rishni istaydi.
Bu tortishuvlar Verstappen uchun ikkinchi darajali. U uchun bitta narsa muhim: rul ortida o‘tirganida, dvigatelda bor quvvatni xohlagan paytda ishga sola olish.
Hozirgi muhokamalar aynan shu nuqtada unga ma’qul tus olayotganga o‘xshaydi. U ham shuning uchun o‘zini sport bilan murosaga kelgandek his qilmoqda.
"Shaxsan men bundan xursand emasman. Keling, aytaylik, bu fantastik emas. Lekin men baribir poygani yaxshi ko‘raman. Axir bu baribir Formula 1 mashinasi", dedi u.
Qolishmi yoki ketishmi? Mercedes, McLaren va Red Bullning ustunligi
Shunday qilib, birinchi savol hal bo‘ldi: Verstappen Formula 1 da qoladi. Endi ikkinchisi turibdi – qayerda?
Mercedes uni uzoq yillardan beri ko‘z ostida tutib keladi. Rasmiy pozitsiya – kelasi yil uchun George Russell va Kimi Antonelli bilan davom etish. Ammo Verstappen bo‘shashga tayyor bo‘lganda, Toto Wolff uchun eshikni ochmaslik qanchalik qiyin bo‘lardi?
McLaren bilan ham suhbatlar bo‘ldi. Ayniqsa, Verstappenga eng yaqin texnik figur – uning uzoq yillik poyga muhandisi Gianpiero Lambiase 2028 yilga borib McLaren tomon yo‘l olishi kutilayotgani fonida.
Bu orada Red Bullning 2026 yili og‘ir kechmoqda. Verstappen hali g‘alaba nashidasini surgani yo‘q, mashinaning ishlashidan doimiy norozi, poyga ortidan poygaga tanqidlar yangrayapti.
Shunga qaramay, Red Bull uni ishontirishga muvaffaq bo‘ldi. Laurent Mekies "strategik qarorlar" haqida gapirdi, lekin tafsilotlarga kirishni istamadi. Ma’lumki, ular Verstappen uchun yetarlicha ishonch uyg‘otgan.
Yana bir katta ustunlik – Red Bull uning qo‘shimcha loyihalariga to‘sqinlik qilmaydi. Nürburgring 24 soatlik poygasi kabi tashqi startlar uchun eshiklar ochiq. Bu ham haydovchi uchun katta plus.
"Avvalo, o‘zingni qayerda ekaningdan rozi bo‘lishing kerak. Red Bull menga Formula 1 dan biroz tashqarida ham ishlar qilishimga ruxsat beradi. Bu katta ustunlik. Hammasi jamlanib, men uchun mukammal paket bo‘lib chiqadi, bunga juda minnatdorman", dedi u.
Shartnoma ortidagi ishonch va erkinlik
Verstappen ham, Mekies ham yangi kelishuv tafsilotlarini oshkor qilmadi. Ammo paddokdagi manbalarga ko‘ra, bu shartnoma allaqachon Formula 1 dagi eng katta haydovchi maoshiga ozgina qo‘shimcha qo‘yadi.
Eng muhim jihat – Verstappen o‘z kelajagi ustidan nazoratni saqlab qoladi. Kutilgan darajadagi natijalar bo‘lmasa, undan chiqish imkoniyatlari borligi aytilmoqda.
Shu bilan birga, bu qaror jamoaga bo‘lgan ishonchning ochiq deklaratsiyasi. Mekies buni "Max tomonidan jamoaga bildirilgan ishonch namoyishi" deb ta’rifladi.
Verstappen esa bir paytlar marhum hammuassis Dietrich Mateschitzga aytgan gapini yana eslatdi: uning maqsadi – karerasini aynan shu jamoada yakunlash.
"Men har doim aytganman – va buni Dietrich tirik bo‘lganida ham aytganman – maqsadim kareramni shu jamoada yakunlash. Biz bunga tobora yaqinlashyapmiz. Albatta, oldinda hali ko‘p yillar bor, lekin maqsad o‘sha-o‘sha", dedi u.
Endi savol boshqacha: Red Bull unga bu yillarda yana nechta chempionlik darajasidagi mashina bera oladi? Va Verstappen, o‘z navbatida, bu ishonchni nechta kubok bilan oqlaydi?
