Volta a Portugal yo‘lida 19 yoshli Finlay Tarling halok bo‘ldi
Portugaliya yo‘llarida bugun sport emas, motam hukmron bo‘ldi. 19 yoshli britaniyalik velosipedchi Finlay Tarling Volta a Portugalning sakkizinchi bosqichi chog‘ida sodir bo‘lgan og‘ir yo‘l-transport hodisasi oqibatida hayotdan ko‘z yumdi.
NSN Development Team sharafini himoya qilib kelgan yosh sportchi 166,8 kilometrli Melgaco – Fafe yo‘nalishida halokatga uchradi. Poyga davom etayotgan pallada u qarama-qarshi yo‘nalishda harakatlanayotgan, musobaqaga aloqasi bo‘lmagan avtomobil urib ketgani aytilmoqda.
Jamoasi bu xabarni og‘ir dard bilan tasdiqladi. Rasmiy bayonotda shunday deyiladi: Finlay jamoaning sevimli a’zosi edi, ammo eng avvalo – o‘g‘il, aka va ko‘plab insonlar uchun yaqin do‘st edi. U juda sog‘iniladi. NSN Development Team uning ota-onasi Michael va Dawn, ukasi Josh hamda Finlayni do‘st deb bilgan barcha insonlarga chuqur hamdardlik bildirdi.
Bu fojea nafaqat bir jamoani, balki butun pelotonni larzaga soldi. Portugaliyaning RTP telekanali hodisa tafsilotlarini yoritarkan, halokatga aynan poygaga aloqasi bo‘lmagan mashina sabab bo‘lgani haqida xabar berdi.
Mamlakat rahbari ham befarq qolmadi. Portugaliya prezidenti Antonio Jose Seguro o‘z ta’ziyasini yo‘llab, Tarlingning o‘limi “pelotonni, turnirni va mezbon mamlakatni motamga cho‘ktirdi”, deya ta’kidladi.
Volta a Portugal tashkilotchilari ham rasmiy bayonot e’lon qildi. Unda 87-chi nashr doirasida ishtirok etayotgan britaniyalik velosipedchi Finlay Tarlingning sakkizinchi bosqichda yuz bergan og‘ir baxtsiz hodisa oqibatida vafot etgani chuqur iztirob bilan qayd etildi. Tashkilotchilar va Portugaliya velosport federatsiyasi sportchining oilasi, jamoadoshlari, NSN Development Team hamda uning barcha yaqinlariga samimiy hamdardlik bildirdi.
Poyga esa odatdagidek davom eta olmadi. Qaror keskin bo‘ldi: bosqich Fafe shahrigacha “neytrallashgan” holda, ya’ni sport kurashisiz, ramziy tarzda davom ettiriladi. Bugunga mo‘ljallangan podium marosimi ham hurmat va motam ramzi sifatida bekor qilindi.
Yosh, iste’dodli velosipedchi hayoti katta sahnaga endigina qadam qo‘yayotgan chog‘ida uzildi. Volta a Portugal yo‘llari bugun natijalar bilan emas, bir savol bilan esda qoladi: xavf bilan yonma-yon yashaydigan bu sportda yana nechta iqtidor yo‘llarda so‘nmasligiga kim kafolat bera oladi?
