Yangi mavsum, eski muammolar: Premyer-ligadagi hafta yakuni

Shotlandiya Premyer-ligasida navbatdagi tur yakunlandi. Natijalar jadvalni ham, kayfiyatlarni ham ostin-ustin qildi. Kimdir tanqidlarni yuvib tashladi, kimdadir esa eski muammolar yana bosh ko‘tardi.

McInnes qo‘lida adashgan Rangers

Derek McInnes hali ham birinchi g‘alabasini kutyapti. Uning so‘zlariga ko‘ra, Rangers “odamlar o‘ylaganchalik yomon emas”. Ammo maydonda ko‘rinayotgan manzara boshqa.

Hibsga qarshi o‘yinda u yana orqa chiziqni o‘zgartirdi. Baribir naf bo‘lmadi. Himoya bir butun sifatida ishlamadi, tartib yo‘qoldi, xatolar esa o‘tgan mavsumdagi inqirozni eslatdi. Yangi transfer Vanja Dragojevicning Josh Kerrni yerga tortib penalti “sovg‘a qilishi” bu chalkashliklarning eng yorqin ramziga aylandi.

Tribunadagi sabr chiziqlari allaqachon cho‘zilib ketgan. Xatolar, beqarorlik, ritmsiz o‘yin – bu hammasi Ibrox tomoshabinlarini yana bir bor g‘azablantirdi. Ustiga ustak, klub katta taklifni rad etganidan keyin Youssef Chermitining zambilga yotqizilgancha maydonni tark etishi kayfiyatni butunlay buzdi. Transfer oynasi ochiq, xavotir esa kuchli.

Hibs bosh murabbiyi David Gray o‘yinning oxirida jamoasi ba’zi epizodlarda “omad bilan qutulganini” tan oldi. Ammo mehmonlar jips turdi, o‘zini ayamay ishladi va hafta o‘rtasidagi Conference League saralashidagi yaxshi o‘yindan keyin Ibroxda ham g‘alaba bilan maydonni tark etdi. Gray atrofidagi bosim asta-sekin tushyapti. McInnes atrofidagi bosim esa faqat oshmoqda.

Hogh – tanqidchilarga uchta javob

Kasper Hogh uchun Celticga o‘tish – katta sahnaga chiqish edi. 11 million funtlik narx yorlig‘i unga birinchi kundan boshlab bosim berdi. Dundee bilan debyut o‘yini chippakka chiqqandek tuyuldi: bir nechta aniq imkoniyatni boy berdi, tanqidlar kuchaydi.

Kilmarnockka qarshi esa boshqa Hogh ko‘rindi. Rugby Parkdagi yangi tabiiy gazonda u 35 daqiqa ichida uchta gol urdi. Penaltidan emas, “sovg‘a”dan emas – har birida to‘g‘ri joy tanlash, bo‘sh zonani topish, vaziyatni o‘qish bor edi. Daniyalik hujumchi jarima maydonida qanday harakat qilishni bilishini aniq ko‘rsatdi.

Kilmarnock himoyasi esa shunchaki qulab tushdi. Bu bo‘shliqlardan nafaqat Hogh, balki Benjamin Nygren va Luke McCowan ham foyda ko‘rdi. Celtic to‘p farqi hisobiga jadval tepasiga ko‘tarildi, Nyil McCann jamoasi esa ikki turda to‘qqizta gol o‘tkazib, ochkosiz qolmoqda.

McCann jamoasini ochiq, hujumkor futbol o‘ynashini xohlaydi. Lekin bunday himoya bilan bu yondashuv tez orada tushish zonasidagi yana bir asabiy mavsumga aylanib ketishi hech gap emas.

Hearts nihoyat Vranckencha javob berdi

Wouter Vrancken uchun Heartsdagi start og‘ir bo‘ldi. O‘tgan mavsumda deyarli chempionlik uchun kurashgan jamoa bu safar o‘ziga o‘xshamagan edi. Yevropadagi mag‘lubiyatlar, Aberdeen maydonidagi qulashi – hammasi uning tayinlanishi bo‘yicha savollarni kuchaytirdi.

Shunday fon ostida Tynecastle Parkga Dundee United keldi. Yevropa Ligasidagi 1:6 hisobidagi sharmandali mag‘lubiyatdan so‘ng javob kerak edi. Hearts uni topdi.

Jambos hujumda nihoyat “klik” qildi. Old chiziqda qarorlar tezlashdi, pressing aniqroq bo‘ldi, orqa chiziq esa o‘zini ishonchli tutdi. Eng muhimi – bularning barchasi oltita futbolchi jarohat va diskvalifikatsiya sabab safdan chiqqan holatda sodir bo‘ldi. Tarkib bo‘sh, lekin signallar ijobiy.

Dundee United uchun hisob ularning o‘yiniga to‘liq mos kelmadi. Ular to‘pni ko‘p nazorat qildi, vaziyatlar yaratdi, lekin hal qiluvchi zarba yetishmadi. Rangersga qarshi ochilish turidagi 1:1 natijasi fonida bu mag‘lubiyat og‘irroq tuyuladi, ammo o‘yinning o‘zi umidsiz emas edi. Shunchaki aniqlik va sovuqqonlik yetishmadi.

St Mirren yulduzi: Phillips – qancha vaqtgacha?

St Mirren mavsumni mukammal boshladi: maksimal ochko, ketma-ket ikki o‘yinda “quruq” darvoza. Paisleyda kayfiyat baland. Bu startning markazida esa bitta ism turibdi – Killian Phillips.

Birinchi turdagi dubl ortidan bu safar u penalti orqali St Johnstone ustidan g‘alabani ta’minladi. Yana hal qiluvchi lahzada sahnaga chiqdi. Bunday o‘yinlar befarq skaut qoldirmaydi – qiziqish allaqachon mavjud.

Buddies bosh murabbiyi Craig McLeish ham buni yashirmaydi. U Phillipsga shartnomasining so‘nggi yilida eng yaxshi transfer variantini topishga yordam berishini aytgan. Bu so‘zlar fonida har bir yaxshi o‘yin uning ketish ehtimolini oshirayotgandek.

St Johnstone esa yuqori ligaga qaytishni g‘alaba bilan nishonlaganidan keyin bu safar ham dadil harakat qildi, lekin uchrashuvni o‘zgartirib yuboradigan sifat yetishmadi. Birinchi bo‘limda darvozaga aniq zarba yo‘q, bitta penaltini boy berish, bir necha bor to‘sin va ustunga urilish – imkoniyatlar bor, ammo ularni yo‘qotish oxir-oqibat qimmatga tushdi.

Dens Parkdagi uyg‘onish: Dundee uchadi, Aberdeen to‘xtab qoldi

Bir hafta ichida Aberdeen ikki xil yuzini ko‘rsatdi. Heartsga qarshi ular oxirigacha kurashib, qaytish qildi. Dundee maydonida esa bu xarakter ko‘rinmadi.

Dens Parkda mezbonlar o‘yinni o‘z qo‘liga oldi. Steven Pressley jamoasi 2:0 hisobida g‘alaba qozondi, lekin voqealarga qarab aytganda, hisob bundan ham yirik bo‘lishi mumkin edi. Dundee ko‘proq yugurdi, tezroq o‘yladi, to‘p bilan ham, to‘psiz ham aqlliroq harakat qildi.

Joe Bevan markazda porladi: gol, golli uzatma va butun o‘yin davomida raqibni qiynagan harakatlar. Celtic Parkdagi tor mag‘lubiyatdan keyin bu uch ochko Dundee uchun nafas ochuvchi natija bo‘ldi.

Aberdeen tarafdorlarining sabri esa tugab bormoqda. Yakuniy hushtak bilan birga stadionni qattiq hushtaklar bosib ketdi. Jamoa nafaqat mag‘lub bo‘ldi, balki o‘yin oxirida hech qanday javob yo‘qligini ko‘rsatdi.

Endi bu ikki klub shanba kuni League Cup bahsida yana to‘qnash keladi. Pressley yana shu bosimni raqibga yuklashni xohlaydi. Stephen Robinson esa taktikadan tortib, jamoaviy ruhgacha hamma narsani qayta ko‘rib chiqishi kerak bo‘ladi.

Motherwell – yangi murabbiy, o‘sha qat’iyat

Jens Berthel Askou ketganidan keyin Motherwell atrofida xavotir kuchli edi. Barqarorlik buziladimi? Jamoa orqaga ketadimi? Hozircha javob yo‘q – aksincha, Alfred Johansson qo‘lida Steelmen eski yo‘lidan og‘ishmayapti.

Yangi shved bosh murabbiy qo‘l ostida Motherwell Yevropada ham, ichki chempionatda ham mag‘lub bo‘lmadi. Falkirkka qarshi “quruq” o‘yin bu ijobiy seriyani yanada mustahkamladi. Yana bir to‘rtlik uchun kurashish rejasi xayol emas, aniq maqsad bo‘lib ko‘rina boshladi.

Fir Parkdagi o‘yinning dastlabki daqiqalarida aynan mezbonlar ancha ishonchli ko‘rindi. Ammo Bairns asta-sekin o‘yinga kirib bordi, tempni ko‘tardi va oxir-oqibat bir ochkoni tortib olishga muvaffaq bo‘ldi. John McGlynnga yozda bir qator asosiy futbolchilarni yo‘qotish og‘ir bo‘ldi, lekin bu ko‘rsatkich – murabbiylik ishining kichik, ammo muhim ishorasi.

Falkirk uchun bu natija mavsumdagi ilk tanaffus oldidan ishonchni oshiradi. Motherwell uchun esa bu – mag‘lubiyatsiz seriyani davom ettirish bilan birga, yuqori to‘rtlik haqida jiddiy gapirish mumkinligini eslatuvchi yana bir dalil.

Hafta yakuni shuni ko‘rsatdiki, Premyer-ligada hech kimga kafolat yo‘q. Celtic va St Mirren erta bo‘lsa-da, tepada yonma-yon turibdi, Hearts Vrancken qo‘lida jonlanish alomatlarini ko‘rsatyapti, Dundee uyg‘onmoqda. Savol esa bitta: Rangers va Aberdeen bu ritmga qanchalik tez qo‘shila oladi?