Yozgi transferlar: Arsenal, Manchester United va Bayern harakatda

Yozgi bozor qizib ketdi. Premyer-liga startiga atigi ikki haftadan sal oshiq vaqt qolganda, yirik klublar stol ustidagi barcha variantlarni ishga solyapti. Rasmiy muddat – 1-sentabr, lekin eng katta zarbalar ancha oldin berilmoqda.

Bu yozning markazida yana Angliya. Ayniqsa, London.

Arsenal – Bruno bilan zarbani birinchi bo‘lib beradi

Arsenal yangi mavsum oldidan eng katta bayonotlardan birini qilish arafasida turibdi. Klub uzoq davom etgan muzokaralardan so‘ng Bruno Guimaraes bo‘yicha kelishuvga kelgan.

Ma’lumotlarga ko‘ra, “kannonchilar” Newcastle uchun 75 million funt to‘lashga rozi bo‘lgan. Bu – St James’ Parkni tark etayotgan navbatdagi yulduz. Oxirgi oylar ichida klubdan bir nechta katta ism ketdi, endi esa navbat yarim himoyadagi eng muhim figuralardan biriga kelgandek.

Bruno Guimaraes London klubiga kelgach, Mikel Arteta qo‘lida markaz uchun butunlay yangi raqobat maydoni paydo bo‘ladi. Arsenal tarixida ilk bor ketma-ket ikki marta Premyer-liga chempioniga aylanishni nishonga olgan bir pallada, bunday transfer – oddiy kuchaytirish emas, aniq signal.

Ammo shimoliy London uchun bu yoz faqat Bruno bilan cheklanmaydi.

Vini Jr atrofida keskin tortishuv

Arsenal ko‘zini yanada balandroq tutgan: Vinicius Junior bo‘yicha ham kulis ortida keskin o‘yin ketmoqda. Real Madrid yulduzining amaldagi shartnomasi yana bir yilga mo‘ljallangan, “qirollik klubi” esa yangilangan taklifni allaqachon uzatgan.

Hisob-kitob oddiy: Real Madrid o‘z chegarasidan yuqoriga chiqmoqchi emas. Vini Jr tomoni esa yiliga yana 7 million funtga yaqin qo‘shimcha maosh talab qilayotgani aytilmoqda. ESPN xabariga ko‘ra, chorshanba kuni futbolchi, uning vakillari va klub rahbariyati o‘rtasida navbatdagi uchrashuv bo‘lib o‘tadi.

Agar braziliyalik hujumchi yangi bitimga imzo chekmaydi, Real Madrid tanlov oldida qoladi: endi sotish yoki keyingi yozda uni bepul qo‘yib yuborish xavfini qabul qilish. Arsenal esa shu oraliqda imkonni boy bermaslikka urinadi.

Manchester United – chiqishlar davom etadi

Oldinga yurish uchun avval ortni yengillashtirish kerak. Manchester United yozni shunday shior bilan o‘tkazyapti. Klub Chempionlar ligasiga qaytayotgan bir paytda, Michael Carrick tarkibni aniq shaklga keltirishga urinmoqda.

Navbatdagi qadam – darvozabon Radek Vitekning ketishi. O‘tgan mavsumni Championshipdagi Bristol City safida ijarada o‘tkazgan 22 yoshli posbon Middlesbrough uchun asosiy nishonga aylangan.

The Standard xabariga ko‘ra, Vitek transferni yakunlash uchun Teeside tomon yo‘l oladi. U yerda unga bir narsani va’da qilishgan: birinchi raqam bo‘lish imkoniyati. Manchesterda esa bu o‘rin allaqachon Senne Lammens tomonidan egallangan.

United uchun bu – kichik, lekin mantiqiy qadam. Yozgi “kirib-chiqishlar” ro‘yxatiga yana bir satr qo‘shildi, oldinda esa yanada yirik qarorlar turibdi.

Bayern – Premier-ligaga ko‘z tikkan

Bundesliga gigantlari ham jim emas. Bayern Munich endi Premier-ligadan ijodkor yarim himoyachi izlamoqda va nishon – Nottingham Forest yetakchisi Morgan Gibbs-White.

Bu futbolchi allaqachon Angliyaning bir nechta top klubini o‘ziga qiziqtira olgan. O‘tgan yozda unga Manchester City ko‘z tashlagani, Tottenham esa deyarli kelishuvga yaqinlashgani aytilgan edi.

Endi esa sahnada Bayern. The Daily Mail ma’lumotiga ko‘ra, nemis klubi Gibbs-White transferini faqat bitta shart bilan ko‘rib chiqadi: agar Michael Olise klubni tark etsa. Demak, bu hikoyada bir domino bo‘lagi ikkinchisini harakatga keltirishi mumkin.

Atletico – Cristian Romero uchun hujumga o‘tadi

Madridning boshqa qismida ham mudofaa chizig‘i qayta qurilmoqda. Atletico Madrid markaziy himoyachi qidirmoqda va asosiy nomzod – Cristian Romero.

Tottenham uchun bu yo‘qotish juda og‘ir bo‘lishi mumkin. Argentinalik himoyachi o‘tgan yozda yangi shartnomaga imzo chekkan, lekin shunga qaramay, uning kelajagi borasida savollar paydo bo‘ldi.

Marca xabariga ko‘ra, Atletico Romero uchun rasmiy taklif tayyorlamoqda. Diego Simeone bu transferni amalga oshirishni juda istayapti. Endi esa savol bitta: Tottenham bu bosimga qanchaga chidab bera oladi?

Real Madrid – yangi qanotga qo‘l uzatayotgan payt

Madridda faqat Vini Jr emas, kelajak ham muhokama qilinmoqda. Yan Diomande transferi nihoyasiga yetib qoldi. Yevropaning bir qator klublari ortidan tushgan bu yosh vinger poygada Los Blancos foydasiga qaror qilgan ko‘rinadi.

Xabarlarga qaraganda, transfer summasi bo‘yicha og‘zaki kelishuv allaqachon erishilgan. Endi faqat rasmiylashtirish qoldi va Diomande yozda Real Madrid futbolchisiga aylanishi kutilmoqda.

Agar Vini Jr bilan vaziyat cho‘zilsa yoki keskin burilsa, bu transferning ahamiyati yanada oshadi.

Manchester City – qanotda nozik hisob-kitob

Manchester City ham qanotlar bo‘yicha variantlarni ko‘zdan kechirmoqda. Klub Pedro Neto nomini ichki ro‘yxatiga kiritgan.

Qizig‘i shundaki, hozircha Manchester City tomonidan rasmiy qadam yo‘q. The Daily Mail ma’lumotlariga ko‘ra, Neto hali ham Chelsea tomonidan yuqori baholanmoqda va London klubi uni osonlikcha qo‘yib yubormoqchi emas.

Bu orada Savinho nomi Tottenham bilan bog‘lanmoqda, shuningdek, Neto bo‘yicha ham London klubi kuzatuvda ekani aytilmoqda. Agar City Savinho bilan xayrlashsa, Neto mavzusi birdaniga keskinlashishi mumkin. Hozircha esa bu faqat tayyorgarlik bosqichi.

Salah – Anfielddan Trabzon qirg‘oqlariga

Eng ko‘nikish qiyin bo‘lgan manzara esa Turkiyadan keldi. Mohamed Salah endi Trabzonspor futbolchisi.

U Liverpool bilan shartnomasi yakunlangach, erkin agent sifatida Turkiya Super Ligini tanladi. Klub allaqachon uni yangi libosda namoyish qildi – ilk suratlar ham tarqaldi.

Anfield tribunalarida yillar davomida ramzga aylangan futbolchini endi boshqa ranglarda ko‘rish ko‘pchilik uchun oson bo‘lmaydi. Lekin bozor shafqatsiz: afsonalar ham yo‘lini o‘zgartiradi.

Yozgi oynaning eng keskin haftalari endi boshlanyapti. Arsenal Vini Jr va Bruno bilan chempionlikni mustahkamlashni ko‘zlayapti, Real Madrid esa kelajak va hozirning nozik muvozanatini ushlashga urinmoqda. Bayern, Atletico, Manchester klublari va boshqalar – hammasi o‘zcha zarba berishga hozirlanmoqda.

Savol shunday: 1-sentabr kelganda, qaysi klub o‘zini g‘olib deb his qiladi, qaysi biri esa bozor stolidan pushaymon bo‘lib turib qoladi?