Zidan Fransiya terma jamoasi shtabini e’lon qildi
Fransiya futbolida navbat yana Zidan atrofida aylanyapti. Fransiya futbol federatsiyasi (FFF) payshanba kuni uning terma jamoa uchun tuzgan murabbiylar shtabi rasman tasdiqlanganini ma’lum qildi. Endi u Didier Deschampsdan keyingi doimiy bosh murabbiy sifatida o‘z davrini boshlaydi.
Bu tarkib to‘liq ko‘rinmada ommaga faqat sentabr boshida taqdim etiladi. Bu hammasi 28-iyuldagi rasmiy taqdimot paytida chizilgan aniq reja bo‘yicha ketayotgani, Zidan ishni shoshilmasdan, lekin qat’iy tartib bilan olib borayotganini ko‘rsatadi. FFF prezidenti Philippe Diallo esa uning barcha takliflarini to‘liq ma’qulladi.
Barthez qaytishi – darvozabonlar qo‘lida afsona
Eng katta shov-shuv, shubhasiz, Barthez nomi bilan bog‘liq. Fransiya futbolining ramziga aylangan sobiq darvozabon endi terma jamoa posbonlari uchun mas’ul bo‘ladi. Zidan va Barthez bir paytlar Les Bleus safida mislsiz yutuqlarni qo‘lga kiritgan, endi esa o‘sha tajriba murabbiylar xonasiga qaytyapti.
Ularning qayta birlashuvi nafaqat romantik hikoya. Bu — yirik turnirlarning bosimi, penaltilar dramatikasi, final kechalari shovqini qayta zaxiraga kelayotgani degani. Darvozabonlar endi faqat mashg‘ulot emas, balki eng yuqori bosqichdagi ruhiy tayyorgarlikni ham o‘sha odamdan o‘rganadi.
Diomede – kutilmagan chetda qolish
Rasmiy ro‘yxatda ko‘zga tashlanadigan yo‘qlik ham bor. Bernard Diomede. U dastlab shtabning bir qismi bo‘lishi kutilgan edi, lekin yakuniy tanlovga kirmadi. Zidan qarorlari murosa bilmas darajada aniq bo‘layotganini aynan mana shu epizod ko‘rsatadi: hissiyotlardan ko‘ra, funksionallik ustun.
Zidan “yuragi” – ishonchli yordamchilar
Zidan yonida eng ishonchli safdoshlari bilan ishlashni tanladi. Real Madrid davridagi eng yaqin hamkori David Bettoni tabiiy ravishda assistent murabbiy sifatida keladi. Ularning bir-birini yarim so‘zdan tushunishi Fransiya terma jamoasida ham asosiy tayanch bo‘lishi aniq.
Taktik shtabga Hamidou Msaidie ham qo‘shiladi. U ham assistent sifatida murabbiylar guruhini kengaytiradi, o‘yin rejalarini tayyorlashda yana bir kuchli ovoz paydo bo‘ladi. Zidan atrofida endi faqat ism-sharif emas, aniq rollarga ega bo‘lgan, sinovdan o‘tgan mutaxassislar halqa hosil qilmoqda.
Stephane Plancque skaut va taktik kuzatuvchi sifatida muhim bo‘g‘inga aylanadi. Uning vazifasi — raqibni maydonga chiqishdan ancha oldin “ochish”, kuchli va zaif tomonlarini aniqlash, Zidan qo‘lidagi taktik kartani boyitish.
Gregory Dupont esa jamoaning strategiya va performans bo‘yicha bosh maslahatchisi etib belgilandi. Zamonaviy futbolda yuklama, tiklanish, o‘yin ritmi – hammasi ilmiy asoslangan bo‘lishi kerak. Zidan aynan shunday yondashuvni tanlaganini shu tayinlov ochiq ko‘rsatadi.
Texnik shtabni esa Farid Tabet (assistant coach va data video tahlilchisi) hamda Clement Ybert (assistant video analyst) to‘ldiradi. Ular raqamlar, kesmalar, videolar orqali har bir epizodni mayda bo‘laklarga ajratib, murabbiylar qaroriga asos bo‘ladigan material tayyorlaydi.
Federatsiya va davlat o‘rtasidagi yangi ko‘prik
FFF tez orada shtabga alohida aloqa xodimi ham qo‘shilishini ma’lum qildi. Bu lavozim Fransiya Ichki ishlar vazirligi bilan tuziladigan rasmiy kelishuv doirasida belgilanadi. Terma jamoa atrofidagi tashkiliy, xavfsizlik va institutsional masalalar endi alohida mutaxassis zimmasida bo‘ladi.
Tibbiyot bo‘limi – murabbiylar rejasining yashirin tayanchi
Zidan shtabi faqat taktika va tahlil bilan cheklanmaydi. Tibbiy bo‘lim ham to‘liq qayta yig‘ildi. Dr Herve Collado tibbiyot jamoasiga boshchilik qiladi. Uning atrofida esa aniq yo‘nalishlarga bo‘lingan mutaxassislar: osteopat Philippe Boixel, podiatrist Marc Retali, fizioterapevtlar qatorida Maxime Matton va Paul Olive.
Bu tuzilma bir narsani anglatadi: Zidan uchun har bir futbolchining sog‘ligi va tayyorgarligi – alohida loyiha. Yirik turnirlar oldidan jarohatlar, charchoq, mikrotravmalar bilan kurashish endi tasodifga emas, tizimga tayanadi.
Endi esa – maydon
Shtab rasman shakllandi. Ismlar e’lon qilindi, rollar taqsimlandi, federatsiya tasdiq berdi. Endi bahona yo‘q. Zidan va uning yangi jamoasi oldida xalqaro o‘yinlar turibdi, u yerda esa faqat bitta mezon bor: natija.
Les Bleus endi nafaqat yulduzli tarkib, balki zamonaviy, qat’iy va aniq tuzilgan murabbiylar shtabiga ham ega. Savol bitta: bu kombinatsiya Fransiyani yana cho‘qqiga olib chiqadimi?
