Zolani Tete: Janubiy Afrikada sobiq jahon chempioni otib o‘ldirildi
Janubiy Afrikada sobiq jahon chempioni bokschi Zolani Tete otib o‘ldirildi. Mamlakat sport, san’at va madaniyat vaziri Gayton McKenzie kechki bayonotida 38 yoshli sobiq chempion o‘z mashinasida nishonga olinganini ma’lum qildi. Avtomobilda bo‘lgan 27 yoshli ayol bir necha bor o‘q yeb, kasalxonaga yetkazilgan.
Politsiya ma’lumotiga ko‘ra, hujum Eastern Cape mintaqasidagi Mdantsane shaharchasida sodir bo‘lgan. Tete uyiga yetib kelgan, darvoza ochilishini kutayotgan paytda, balaklava kiygan ikki qurolli shaxs yaqinlashib, o‘t ochgan. O‘q ovozlari bilan bir paytlar ringlarni larzaga keltirgan chempion hayoti shu yerning o‘zida uzildi.
Qishloqdan chiqqan chempion
Zolani Tete nomi Janubiy Afrikada bokschilar avlodiga umid bergan ramzga aylangandi. U 2007–2008 yillarda WBF flyweight toifasida jahon chempioni kamarini taqib yurgan bo‘lsa, 2017 va 2019 yillarda WBO bantamweight chempionlik kamarini ham qo‘lga kiritgan.
Chap qo‘l uslubidagi bokschining katta sahnaga chiqishi 2014 yilga to‘g‘ri keladi. O‘sha yili u Yaponiyada Teiru Kinoshita ustidan ochkolar hisobiga g‘alaba qozonib, IBF junior-bantamweight jahon chempionlik kamarini yelkasiga ilgan. Oradan ko‘p o‘tmay WBO interim kamarini ham egalladi va to‘laqonli jahon chempioni sifatida tan olindi.
Uning ringdagi shafqatsiz aniqligi raqiblarni dovdiratib qo‘yardi. 2017 yilgi jahon chempionlik jangida Siboniso Gonya bilan bahs atigi 11 soniya davom etgan. Birinchi zarba. Birinchi yiqilish. Tarixga kirgan eng tezkor nokautlardan biri – jahon chempionlik jangi darajasida eng tezkor nokaut sifatida qayd etildi.
Raqamlar ortidagi hayot
Tete professional ringda 29 marta g‘alaba qozondi. Ulardan 22 tasi nokaut bilan yakunlangan. To‘rt mag‘lubiyat va bir marta “no contest” – shuncha jang, shuncha kecha-kunduzlik mehnat, vazn tushish, mashg‘ulotlar, qayta-qayta qaytish.
Uning so‘nggi rasmiy jangi 2022 yil iyulida bo‘lib o‘tdi. Londonning Wembley Arena zalida u britaniyalik Jason Cunningham ustidan g‘alaba qozondi. O‘sha kecha Tete yana bir bor yuqori darajadagi raqibni yengishga qodir ekanini isbotlagandek ko‘ringandi.
Ammo oradan ko‘p o‘tmay zarba ringdan emas, laboratoriyadan keldi. Stanozolol moddasi borligi aniqlangan doping testi tufayli jang natijasi bekor qilindi, bokschining o‘zi esa to‘rt yilga diskvalifikatsiya qilindi. Tete taqiqlangan modda qasddan qabul qilinganini qat’iyan rad etib keldi, biroq jazodan qochib bo‘lmadi.
Diskvalifikatsiya joriy yil iyul oyida yakunlandi. U esa shu orada yana bir bor ringga qaytish uchun tayyorgarlik ko‘rardi. Qaytish rejalari, yangi janglar, yana bir chempionlik yo‘lidagi urinishlar haqida o‘ylayotgan pallada uni o‘q ovozi to‘xtatdi.
Mdantsane ko‘chalari Tete uchun bolalik xotiralari, ilk mashg‘ulotlar, ilk orzular manzili edi. Endi esa u yer uning so‘nggi manziliga aylandi. Savol esa ochiq: ringda raqiblarini yengib kelgan chempionni himoyasiz qoldirgan bu zo‘ravonlik to‘lqinini kim to‘xtatadi?
