Arsenal Newcastle yulduzlari Guimaraes va Tonali bilan kelishuvni ko‘rib chiqmoqda
Arsenal yozgi oynani markaziy yarim himoya bilan boshlamoqchi. Klub rahbariyati allaqachon Newcastle yulduzlari Bruno Guimaraes va Sandro Tonali bo‘yicha dastlabki aloqalarni yo‘lga qo‘ydi. Gap hozircha rasmiy taklifda emas, lekin London klubi qaysi yo‘nalishda zarba berishini sinchiklab o‘lchab ko‘rayotgani aniq.
Mikel Arteta uchun bu yoz – markazni qayta chizish vaqti. Reja oddiy: faqat bitta “bosh” markaziy yarim himoyachi olib kelinadi, lekin u darhol jamoaning o‘qiga aylanadigan darajada bo‘lishi kerak.
Guimaraes va Tonali – yuqori polkdagi nomlar
Bruno Guimaraes bo‘yicha uning atrofidagi shtab bilan shartlar, imkoniyatlar, narx va rejalar haqida gaplashilgan. 28 yoshli braziliyalik hozircha butun e’tiborini Braziliya bilan jahon chempionatiga qaratgan, oldinda Yaponiya bilan 1/16 final. Ammo bozor uni kutmaydi.
Sandro Tonali borasida ham shunga o‘xshash muloqotlar bo‘lib o‘tgan. Uning vakillari bilan Arsenal aloqada, lekin hozircha faqat “agar” va “qanday bo‘lsa” darajasida. Newcastle esa? Klub hali London jamoasidan rasmiy murojaat olgani yo‘q.
Bu yerda muhim detallar bor. Newcastle yaqinda Tonali uchun Tottenham Hotspur tomonidan taklif etilgan qariyb 80 million funtlik taklifni rad etdi. Klub braziliyalik sardor Guimaraesni ham qo‘yib yuborishni istamaydi. Bu ikki futbolchi jamoaning ruhiy va taktik markazi.
Guimaraesning shartnomasida yana ikki yil bor. Tonali esa deyarli 2030 yilgacha bog‘langan – o‘n oylik betting taqiqi davrida klub unga ishonch bildirgan, u esa yangi shartnoma bilan javob qaytargan. Shuning uchun Newcastle hozir bozorni bosh ko‘targancha kuzatmoqda, ayniqsa Manchester City vaziyatni sinchiklab kuzatayotgan bir paytda Tonali uchun 100 million funtga yaqin summa talab qilish imkoniyati bor.
Bozor “qizib ketgan”, bu esa Newcastle qo‘lini kuchaytiradi
Yevropa bozorida markaziy yarim himoyachilar narxi osmonga chiqib ketgan. Manchester City Nottingham Forestdan Elliot Anderson uchun klub rekordini yangilaydigan 116 million funtlik kelishuvga erishdi. West Ham esa atigi 21 yoshli Mateus Fernandes uchun 80 million funtgacha so‘ramoqda.
Shunday fon fonida Newcastle o‘z yulduzlari uchun yuqori narx talab qilishdan tortinmaydi. Arsenal uchun esa yosh omili juda nozik masalaga aylanadi. Guimaraes noyabrda 29 yoshga kiradi, Tonali esa may oyida 26 yoshni qarshilagan. London klubi bu yoshdagi futbolchilarga qanchalik katta investitsiya qilishga tayyor? Savol ochiq turibdi.
Rejada faqat Newcastle yo‘q: Scott va Bouaddi ham radarda
Arsenal faqat bitta yo‘nalishga yopishib olgani yo‘q. Klub ichki muhokamalarda Bournemouth yarim himoyachisi Alex Scott nomi ham alohida tilga olinmoqda. 22 yosh, Premyer-ligaga moslashib ulgurgan, ustiga-ustak Manchester United va Chelsea ham qiziqib turgan futbolchi. Manbalar Arsenalning unga bo‘lgan qiziqishi “qat’iy” ekani haqida gapirmoqda.
Lille futbolchisi, Marokash terma jamoasi a’zosi Ayyoub Bouaddi ham variant sifatida ko‘rib chiqilgan. Shuningdek, West Hamning yosh va dinamik markaziy futbolchisi Mateus Fernandes bo‘yicha ichki tahlillar davom etmoqda. Uni Tottenhamming asosiy maqsadlaridan biri sifatida ko‘rayototgan fon fonida Arsenal ham raqobat maydoniga tushishi mumkin.
Andrea Berta uslubi: bir nechta front, bitta hal qiluvchi zarba
Klub sport direktori Andrea Berta ko‘p yillardan beri tanilgan uslubidan voz kechmayapti: bir vaqtning o‘zida bir nechta kelishuv ustida ishlash, so‘ng eng maqbulini tanlab, bitta hal qiluvchi zarba berish. Shuning uchun hozircha aniq “birinchi raqamli nishon”ni ko‘rsatish qiyin – Guimaraes, Tonali, Scott, Bouaddi yoki Fernandesdan biri yoz oxirida Emiratesga tushishi mumkin.
Bitta narsa ravshan: yangi markaziy yarim himoyachi kelishi bilan kimdir ketadi. Klub allaqachon 32 yoshli Daniya vakili Christian Norgaard bo‘yicha takliflarni ko‘rib chiqishga tayyor. Uning kelajagi endi bozor va Arsenal qaroriga bog‘liq.
Bu transfer, kim bo‘lishidan qat’i nazar, yana bir nozik masalani ko‘taradi: Martin Zubimendi. Ispaniyalik futbolchi hozir Artetaning start tarkibida muntazam o‘yinchi sifatida qaraladi. Ammo yangi “bosh” markaz kelgach, uning roliga qay darajada o‘rin qoladi?
Arsenal yozgi oynani shunchaki “kuchaytirish” uchun emas, balki butun markazni qayta qurish uchun boshlayapti. Endi savol bitta: bu inqilobni Newcastle yulduzlari boshlab beradimi yoki kelajak yillarni belgilaydigan yosh variantlardan biri?
