Aston Villa Mbaye bilan 55 million yevrolik kelishuvga erishdi
Aston Villa Salah o‘rniga ko‘rilgan yulduzni ilib ketdi: Mbaye endi Birmingemga
Liverpool ko‘z tikkan, Parijdan chiqib kelayotgan navbatdagi iqtidor endi boshqa manzilni tanladi. 18 yoshli Ibrahim Mbaye faoliyatini Premyer ligada davom ettiradi, lekin Anfieldda emas.
Merseyside klubi uni Mohamed Salahga uzoq muddatli o‘rinbosar sifatida o‘rganib chiqqan, hatto muzokara eshiklarini ham ochgan edi. Lekin Parijdan kelgan narx Liverpool rahbariyatini ortga chekinishga majbur qildi.
Liverpool chetga chiqdi, Villa hujumga o‘tdi
PSG yoz bo‘yi Mbaye bo‘yicha talab qilinadigan summani raqibga qarab o‘zgartirdi. Liverpool uchun belgilangan narx – 70 million yevro. Ichkarida bu summani tushirish mumkinligi haqida ishonch bo‘lsa-da, klub rahbariyati o‘z vaqtini uzoq savdolashuvga sarflashni istamadi.
Ular butun e’tiborini asosiy nishon – Bradley Barcola bilan kelishuvni yopishga qaratdi. Shunda sahnaga Aston Villa chiqib keldi. Ular Mbaye’ni allaqachon bir necha oydan beri kuzatib kelayotgan edi.
Birmingem klubi yanvar oyidayoq yosh qanot futbolchisiga jiddiy qiziqqan, biroq o‘sha paytda PSG eshikni berk qilib qo‘ygandi. Endi esa vaziyat butunlay o‘zgardi: Mbaye muntazam o‘yin amaliyoti izlab ketishni istaydi, Parij klubi esa bu safar uni ushlab qola olmadi.
55 million yevrolik kelishuv va ikki egasining aloqasi
The Athletic nashridan David Ornstein xabariga ko‘ra, Aston Villa PSG bilan 55 million yevrolik bitimni kelishib oldi. Bu raqamning ortida faqat sportiy omil emas, balki klub egalari o‘rtasidagi yaqin aloqalar ham turibdi: Nasser Al-Khelaifi va Nassef Sawiris o‘rtasidagi ijobiy munosabatlar muzokaralarga tezlik berdi.
Mbaye bilan shartnoma hozir yakuniy bosqichda. U Villa bilan uzoq muddatli kelishuv imzolashi kutilmoqda. Hisobotlarga ko‘ra, Senegal terma jamoasi futbolchisi Birmingem klubi skaut ro‘yxatida anchadan beri turibdi.
18 yosh, lekin katta sahnada allaqachon pishib ulgurgan
Mbaye hali atigi 18 yoshda, ammo allaqachon elit futbolning bosimini his qilib ulgurgan. U PSG safida 42 ta rasmiy o‘yin o‘tkazgan, qishda Afrika Millatlar Kubogida, yozda esa Jahon chempionatida Senegal tarkibida maydonga tushgan.
Shunga qaramay, o‘tgan mavsumning ikkinchi yarmida, AFCONdan qaytgach, uning maydonga tushish vaqti keskin kamaydi. Aynan shu holat yangi chaqiriq izlash istagini kuchaytirdi. Endi bu chaqiriqni unga Unai Emery taklif qilmoqda.
Ispaniyalik murabbiy qanotlarga yangi energiya qo‘shishni xohlardi. Mbaye undan aynan shuni oladi: yuqori pressing, tezkor qarshi hujumlar, bo‘sh zonalarga yugurish. Villa Park tribunalari bunday profildagi futbolchini yaxshi qabul qiladi.
Leao bilan muzokaralar so‘nadi, Mbaye sahnaga chiqadi
So‘nggi kunlarda Aston Villa AC Milan hujumchisi Rafael Leao bilan ham aloqada bo‘lib kelayotgandi. Biroq kelayotgan xabarlar bir xil: portugaliyalik futbolchi Galatasaray variantini afzal ko‘rdi. Birmingem klubi taklif qilgan shartnoma uni to‘liq ishontirmadi.
Shu fon’da Mbaye bo‘yicha kelishuv Villa uchun ayni muddao bo‘ldi. Bir eshik yopildi, boshqasi esa ancha qulayroq ochildi.
Endi savol bitta: 18 yoshli Senegal yulduzi Premyer ligada darhol ta’sir ko‘rsata oladimi yoki bu transfer Aston Villa’ning uzoq muddatli, sabr talab qiladigan loyihasiga aylanadimi?
