Ciro Immobile karerasini 350 gol bilan yakunladi
36 yosh. 656 o‘yin. 350 gol.
Bugun Ciro Immobile raqamlar ortiga nuqta qo‘ydi va futbolchilik faoliyatini rasman yakunlaganini e’lon qildi.
Italiya va Lazio afsonasi bo‘lgan hujumchi so‘nggi klubida – Paris FC safida o‘ynar ekan, shartnomasi 2027-yilgacha amal qilishi kerak edi. Ammo tana bardosh bermadi. Ketma-ket jarohatlar uni maydondan ko‘ra ko‘proq tibbiyot xonasiga bog‘lab qo‘ydi va oxir-oqibat kramponlarni mixga ilishga majbur qildi.
Shunga qaramay, u Parijda ham so‘nggi marta o‘z sinfini ko‘rsatishga ulgurdi: atigi 12 uchrashuvda 2 gol va 2 golli uzatma. Statistikada bu raqamlar katta ko‘rinmasligi mumkin, lekin jarohatlar fonida bu oson emasdi.
Ko‘z yoshlari bilan aytilgan xayr
Bugun, juma kuni, Football Italia xabariga ko‘ra, Immobile o‘z qarorini Paris FCdagi jamoadoshlariga e’lon qilarkan, ko‘zlari yoshga to‘ldi. So‘z topish qiyin bo‘lgan lahza. 17 yil davom etgan professional yo‘l, yuzlab gollar, o‘nlab shaharlar, turli ligalar – barchasi bir xonada, bir necha daqiqaga sig‘di.
Shu yerning o‘zida uning yo‘li yana bir bor esga olindi: 656 rasmiy o‘yin, 350 gol. Bu oddiy statistik satr emas. Bu – Serie A tarixidagi eng sermahsul hujumchilardan birining merosi.
Italiya terma jamoasi va yevropalik shon-shuhrat
Immobile Italiya terma jamoasida ham o‘z izini qoldirdi. 57 o‘yin, 17 gol. Eng muhim yodgorlik esa – Euro 2020 kubogi. Azzurri bilan ko‘tarilgan bu sovrin uning avlodini belgilab bergan turnir bo‘ldi.
U to‘rt marta Serie Ada eng yaxshi to‘purar unvonini qo‘lga kiritdi. Bu Italiya futbolining eng qattiq himoyalari orasidan yo‘l topgan, eng muhim onlarda ham sovuqqonligini saqlay olgan hujumchi uchun tabiiy natija edi.
Salernitanadan dunyo bo‘ylab: adashgan, lekin topilgan yo‘l
Immoblening hikoyasi Salernitana yoshlar jamoasida boshlandi. U yerdan esa tezda Juventus tizimiga ko‘tarildi. Biroq turinliklar safida darhol porlab ketmadi, yo‘li murakkab bo‘ldi.
U Italiya bo‘ylab sayr qildi: Siena, Grosseto, Pescara, Genoa, Torino. Keyin esa chet el sahnasi: Borussia Dortmund, Sevilla. Qisqa muddatli, ba’zan og‘ir moslashuv davrlari, ba’zan esa o‘z o‘rnini topa olmagan mavsumlar.
Keyin ham yana yo‘l davom etdi: Lazio, Besiktas, Bologna va nihoyat Paris FC. Har bir klub uning karerasiga alohida bo‘lak qo‘shdi, lekin bitta manzil boshqalardan keskin ajralib turadi.
Rimdagi oltin sahifa
Immobile uchun haqiqiy uy Lazio bo‘ldi. 2016-yildan 2024-yilgacha uzluksiz sakkiz yil – zamonaviy futbol olamida kam uchraydigan sadoqat va barqarorlik.
U Rim klubida nafaqat gollar urdi, balki tarix yozdi. Lazio tarixidagi eng yorqin hujumchilardan biri sifatida nom qoldirdi, rekordlarni yangiladi, muxlislar uchun ramzga aylandi. Uning ismi klub tarixi sahifalariga, so‘zma-so‘z, oltin harflar bilan yozildi.
Bugun u maydondan ketmoqda. Ammo Serie A tarixidagi to‘purarlik rekordlari, Azzurri bilan ko‘tarilgan Euro 2020 kubogi va Laziodagi oltin yillari bir savolni ochiq qoldiradi: Italiya futboli keyingi Ciro Immobile’ni qachon topadi?
