Fury va Joshua o‘rtasidagi superjang: Kardiffda amalga oshadigan orzu
Tyson Fury va Anthony Joshua o‘rtasidagi yillar davomida kutilgan superjang nihoyat manzil topayotganga o‘xshaydi. Rejalashtirilayotgan sana – 11 dekabr, juma. Sahna – Kardiffdagi Principality Stadium.
Rasmiy e’lon hali berilgani yo‘q, lekin Netflix, Saudiya Arabistonidagi promouterlik kompaniyasi Sela va ikki lager o‘rtasidagi so‘nggi detallar yakunlanar ekan, aynan Kardiff bosh favoritga aylangan. E’lon shu hafta kutilmoqda.
Bir necha hafta avval voqea butunlay boshqacha ko‘rinardi. Jang deyarli Madison Square Garden uchun “zakaz” qilingandi, Manxettenda matbuot anjumani ssenariylari chizila boshlagan, Nyu-Yorkga uchish deyarli ish bitgan ishdek tuyulgan.
Ammo Joshua va uning promouteri Eddie Hearn o‘z shartnomalaridagi asosiy banddan – jangni Britaniya hududida o‘tkazish huquqidan – bir qadam ham chekinmadi. Shundan so‘ng sahna markazi keskin o‘zgardi, Uels poytaxti oldingi chiziqqa chiqdi.
Nega aynan Kardiff?
BBC Sport ma’lumotiga ko‘ra, bu asr britan boksi uchun eng yirik voqealardan biriga aylanishi mumkin bo‘lgan kecha mezbonligi uchun dastlab Wembley Stadium deyarli “tabiiy tanlov”dek ko‘rilgan. Ikki britaniyalik og‘ir vazn yetakchisining to‘qnashuvi uchun bundan zo‘r fon topish qiyin.
Lekin yo‘l bitta kichik, ammo hal qiluvchi tafsilot tufayli murakkablashdi: Joshua va Fury Sela bilan alohida shartnomalar imzolagan, yagona qo‘shma kelishuv yo‘q. Joshua bitimida jang albatta Birlashgan Qirollikda bo‘lishi qat’iy belgilangan, Fury hujjatlarida bunday cheklov yo‘q edi.
Aynan shu tafovut Netflix va tashkilotchilar AQSh variantini agressiv tarzda itarishni boshlagan paytda hal qiluvchi omil bo‘lib chiqdi. Hearnning o‘zi ham deyarli barcha tomon Nyu-Yorkni xohlashini tan oldi, Matchroom esa hatto shu “UK bandi”dan voz kechish uchun qancha tovon kerak bo‘lishini hisoblab ko‘rdi.
Bir mahalda bu qarama-qarshilik butun jangni yo‘qqa chiqarishi ham mumkin edi. Fury omma oldida Joshuani jarayonni cho‘zishda aybladi, hatto qisqa muddatga Oleksandr Usyk bilan trilogiya variantini tilga oldi.
Ammo Fury chekingach, bitta savol oldinga chiqdi: qaysi britan arenasi Netflix talab qilayotgan ko‘lamni ta’minlay oladi, lekin muxlislarni qishning sovuq, yomg‘irli ob-havosidan himoya qiladi?
Javob, deyarli “istisnolarni chizib tashlash” yo‘li bilan, Kardiff bo‘ldi.
Qish, tom yopiq stadion va katta pul
Dastlab jang noyabrga mo‘ljallangandi, ammo arena borasidagi tortishuvlar cho‘zilib ketdi va sana dekabrga surildi. Bu esa ochiq osmon ostidagi har qanday stadion variantini xavfli qimorga aylantirdi.
Wembley nufuzi – bahsga sabab bo‘lmaydigan darajada. Lekin o‘n minglab muxlislar va global translyatsiya uchun ishlayotgan texnik infratuzilmani muzdek shamol, yomg‘ir yoki bo‘ronga tashlab qo‘yish – qabul qilib bo‘lmaydigan tavakkal sifatida baholandi.
Londonning O2 kabi yopiq arenalariga ko‘chish esa ob-havo muammosini bartaraf qiladi, lekin darhol boshqa yo‘qotish keltiradi – o‘n minglab qo‘shimcha chiptalar, stadion shousiga xos ulkan “gate” daromadi yo‘qoladi.
Shu yerda Principality Stadium o‘zining ochilib-yopiladigan tomi bilan sahnaga chiqadi. U nafaqat stadion ko‘lamini, atmosfera va daromadni saqlab qoladi, balki muxlislar va texnik xizmatni ob-havodan to‘liq himoya qiladi.
Rasmiy o‘rindiqlar sig‘imi – 74 mingga yaqin. Boks konfiguratsiyasida esa bu raqam yanada oshishi mumkin. Joshua bu arenani allaqachon sinab ko‘rgan: 2017 yilda u yerda WBA va IBF kamarlarini Carlos Takamga qarshi deyarli 80 ming muxlis oldida himoya qilgan, besh oy o‘tib esa Joseph Parker ustidan g‘alaba bilan WBO kamarini ham qo‘shib olgan.
Demak, bu maydonda yulduz, atmosfera va kassani to‘ldirish qobiliyati bo‘yicha savol deyarli yo‘q.
Netflix va tungi jangning bosh og‘rig‘i
Eng nozik masalalardan biri – vaqt. Netflix uchun AQSh sharqiy qirg‘og‘ida “prime-time” – muqaddas tushuncha. Shunga moslash uchun taxminiy ringga chiqish vaqti Birlashgan Qirollik bo‘yicha soat 01:00 atrofida rejalashtirilgan. Bu – AQSh sharqiy sohili bo‘yicha 20:00.
Londonda bu jadval deyarli devorga borib urildi. Wembley qat’iy 23:00 lik tadbir “komendantskiy soati” bilan ishlaydi. London meri Sadiq Khan jangni qo‘llab-quvvatlagan, stadion rahbariyati ham muzokaraga ochiq bo‘lgan bo‘lsa-da, Brent Council va mahalliy xavfsizlik guruhlari orqali 01:00 gacha ruxsat olish – og‘ir byurokratik jangga aylanishi turgan gap edi.
Kardiffda yo‘l ancha tekis. Principality Stadium egasi va operatori bo‘lgan Welsh Rugby Union avvalroq bu jangni mamnuniyat bilan qabul qilishini bildirgan va kech tugaydigan kecha ular uchun hal qiluvchi to‘siq emasligini ochiq aytgan.
Albatta, tun yarmida tugaydigan superkecha uchun shahar markazida transport, politsiya va olomonni boshqarish bo‘yicha katta logistika talab qilinadi. Lekin bu yerda tajriba bor: 2007 yilda Joe Calzaghe Mikkel Kessler bilan super o‘rta vaznni birlashtirgan jang aynan shu arenada, Amerika telekanali Showtime talabi bilan, mahalliy vaqt bilan soat 02:00 da boshlangandi.
Demak, Kardiff bunday ssenariyni nafaqat ko‘taradi, balki allaqachon bir marta muvaffaqiyatli o‘tkazib ham bo‘lgan.
Asr jangi: nihoyat uy topdimi?
Shartnomalar hali to‘liq yakuniga yetgani yo‘q, rasmiy e’lon ham berilmadi. Lekin hozircha bitta haqiqat aniq ko‘rinadi: Fury va Joshua o‘rtasidagi bu jang Britaniya tuprog‘ida bo‘lishi uchun Joshua tomoni oxirigacha kurashdi va o‘z so‘zini o‘tkazdi.
Endi esa hamma nigoh bitta nuqtaga qadalgan: Principality Stadium tomi yopiladi, ring markazga qo‘yiladi va ikki britaniyalik og‘ir vazn gigantining hisob-kitobi, nihoyat, shu yerda hal bo‘ladimi?
