Harry Kane: Angliya sardori bo‘lishi kerakmi?
Kane – sokin yetakchi, savol ostidagi sardor? Pallisterning Angliyaga og‘ir savollari
Angliya sardori bo‘lish uchun yagona qolip yo‘q. Kimdir kiyinish xonasini titratib yuboradigan darajada baqir-chaqir qiladi, boshqasi esa ovozini ko‘tarmasdan, faqat maydondagi ishlari bilan hurmat qozonadi. Harry Kane aynan ikkinchi toifaga kiradi.
U hech qachon John Terry yoki Roy Keane kabi raqibni ham, sherikni ham titratib yuboradigan kapitan bo‘lmagan. U maydon o‘rtasida hakam bilan bahslashmaydi, chiziq bo‘ylab yugurib borib, himoyachilarga hayqirmaydi. Kane o‘zining haqiqiy san'atiga yopishib oladi – gol urishiga. Va buni mislsiz darajada qiladi.
Gollar, rekordlar va sokin hukmronlik
Bayern Munich safida o‘tgan mavsum Kane uchun klub darajasidagi eng sermahsul yil bo‘ldi – 61 marta raqib darvozasini ishg‘ol qildi, Bundesligada chempionlikni qo‘lga kiritdi. Milliy jamoada esa raqamlar yanada hayratlanarli: Angliya uchun 81 gol. Endi u Peter Shiltonning 125 o‘yinlik tarixiy rekordiga tobora yaqinlashib bormoqda.
Shilton 1990-yilgi jahon chempionatida Three Lions sardori bo‘lgan. 2026-yilda esa bu vazifa Kane zimmasida. Lekin savol o‘tkir: hujumchi chindan ham eng to‘g‘ri tanlovmi?
Gary Pallister bu mavzuni ko‘tarar ekan, sardorlikni ko‘proq maydonni to‘liq ko‘ra oladigan futbolchiga berish tarafdori ekanini yashirmaydi. Uning fikricha, ideal variant – butun o‘yin ko‘z o‘ngida bo‘ladigan markaziy yarim himoyachi yoki markaziy himoyachi.
U o‘z tajribasini eslaydi: Yevropa chempionatida Alan Shearer sardor bo‘lgan, Manchester Unitedda Eric Cantona yetakchilik qilgan, Peter Schmeichel ham bir necha o‘yinlarda kamarbast bo‘lgan. Ya’ni pozitsiya emas, shaxsiyat hal qiladi. Shunga qaramay, Pallister Kane’ni Robson, Keane yoki John Terry tipidagi klassik, markazdagi buyruq beruvchi kapitan sifatida ko‘rmaydi. Uningcha, Kane ko‘proq “namuna bilan yetakchi”.
Maydonda esa vaziyat boshqacha ko‘rinadi. Kane gol urishda davom etayotgan bo‘lsa-da, Angliyaga ayniqsa himoyada “ovoz” yetishmayotgani haqida gaplar ko‘paydi. Orqa chiziqda buyruq beradigan, tartibga soladigan, boshqalarga yo‘l ko‘rsatadigan futbolchi ko‘rinmayapti.
Maguire’siz Angliya: yo‘qotilgan tajriba
Aynan shu nuqtada Harry Maguire nomi paydo bo‘ladi. Manchester United markaziy himoyachisi bu safar Shimoliy Amerikaga uchadigan samolyotga chiqmadi. Va bu qaror hamon bahs markazida.
Pallister bunga ochiqchasiga hayron. Uning so‘zlariga ko‘ra, o‘tgan mavsum Maguire yana o‘zining eng yaxshi ko‘rinishiga qaytdi. Bir necha yil oldingi og‘ir davrdan so‘ng o‘zini tiklab, United safida barqaror o‘yin ko‘rsatdi. Eng muhimi – Angliya uchun yirik turnirlarda hech qachon yomon o‘ynamagan, doim ishonchli bo‘lgan.
Shuning uchun Pallister uchun bu qaror g‘alati: tajribali, turnir muhitini yaxshi biladigan, bosimni ko‘tara oladigan himoyachini uyda qoldirish – mantiqan tushunarsiz. U hozirgi vaziyatda Maguire’ni Marc Guehi yonida asosiy juftlik sifatida ko‘rgan bo‘lardi.
John Stones haqida gap ketganda, Pallister uning Manchester Citydagi yutuqlari va ishonchliligini tan oladi. Lekin bir jihat bor: Stones terma jamoaga chaqirilishidan oldin atigi bir marta to‘liq 90 daqiqa o‘ynagan. Turnir futbolida esa bu xavfli signal.
Yillar davomida bir haqiqat ko‘p bora isbotlangan: formasi yo‘q, yetarlicha o‘yin amaliyoti to‘plamagan yoki jarohatdan to‘liq tiklanmagan futbolchilarni yirik turnirlarga olib borish kamdan-kam hollarda foyda keltirgan. Baribir ritm, o‘yin amaliyoti va ishonch eng katta omil bo‘lib qoladi.
Shu nuqtada Pallister yana bir bor Maguire masalasiga qaytadi. Uning fikricha, United safida yaxshi formada bo‘lgan, turnir tajribasiga ega, Angliya libosida ko‘p bora o‘zini ko‘rsatgan futbolchini chetda qoldirishga asos ko‘rinmaydi.
Kapitan oldinda, ovoz orqada bo‘lishi mumkinmi?
Angliya uchun asosiy dramatizm ham shu yerda. Oldinda – tarixiy raqamlar sari intilayotgan, sovuqqon, klinik yakunlovchi Kane. Orqada esa yetarlicha buyruq bera oladigan, raqib bosimi ostida chiziqni boshqaradigan yetakchi yo‘qdek.
Pallister ko‘z o‘ngida ideal manzara boshqacha: markazda Robson, Keane yoki Patrick Vieira tipidagi, o‘yin markazida turib hamma bilan aloqa qiladigan kapitan. Hozir esa Angliya sardori – jarima maydoni ichida so‘nggi zarbani kutayotgan hujumchi.
Savol esa ochiq qoladi: Kane’ning sokin, ammo mislsiz samarali yetakchiligi va Maguire kabi ovozli himoyachining yo‘qligi – Angliyani navbatdagi yirik turnirda qancha narxga tushadi?
