Mbappe va Haaland: Jahon chempionatidagi to‘qnashuv
Boston Stadium sahnasida jahon futbolining ikki yirtqich hujumchisi to‘qnash keladi: Kylian Mbappe boshchiligidagi Fransiya va Erling Haaland yetakchiligidagi Norvegiya. Juma kungi bu o‘yin oddiy guruh bosqichi uchrashuvi emas. Bu — birinchi o‘rin uchun pley-off, taqvimni yengillashtiradigan yo‘l uchun kurash.
Ikkalasi ham turnirni portlash bilan boshladi. Mbappe ham, Haaland ham dastlabki ikki uchrashuvning har birida dubl qayd etdi. To‘rtta o‘yin, sakkizta gol — ikkovi o‘rtasida teng taqsimlangan. Ularning ustidan hozircha faqat bitta ism turibdi: Lionel Messi. U beshta gol bilan “Golden Boot” poygasida oldinda, lekin oradagi farq atigi bitta zarba masalasi.
Mbappe – “Les Bleus” yuragi
Fransiya terma jamoasi uchun Mbappe oddiy yetakchi emas, butun ritmni belgilab beradigan yurak. Avgust 2022 yildan beri statistika buni ayovsiz tasdiqlab turibdi: Mbappe maydonda bo‘lsa, Fransiya o‘yinlarining 69,8 foizini yutadi. U holda — atigi 50 foiz.
Farq faqat natijada emas, o‘yinning nafasida ham ko‘rinadi. Shu davrda “Les Bleus” Mbappe bilan har uchrashuvda o‘rtacha 2,3 tadan gol urgan. U bo‘lmaganida bu ko‘rsatkich 1,9 taga tushib ketadi. Bu raqamlar Mbappening nafaqat yakunlovchi, balki butun hujum tizimini yurgizib turadigan dvigatel ekanini ko‘rsatadi.
U allaqachon Fransiya tarixidagi eng yaxshi to‘purar. Jahon chempionatlarida esa 16 o‘yinda 16 gol. Oldinda esa, nazariy jihatdan, Messi bilan poyga. Argentinlik yulduz 39 yoshda va katta ehtimol bilan so‘nggi mundialini o‘tkazyapti. Mbappe esa undan 12 yosh kichik va hozircha atigi ikki gol orqada. Bu raqamlarning o‘ziyoq, Boston kechasi uning uchun qanday sahna ekanini ko‘rsatib turibdi.
Haaland – Norveya umidi va quroli
Norveya uchun Haalandning ahamiyati yanada yalang‘och ko‘rinadi. Kadrlar tanqisligi bor jamoada u — nafaqat yulduz, balki butun konsepsiyaning markazi. Avgust 2022 yildan beri Haaland maydonda bo‘lganda Norveya o‘yinlarning 64,5 foizini yutgan. U bo‘lmaganda bu ko‘rsatkich keskin tushib, 33,3 foizga aylanadi.
Bu — bitta futbolchi ta’sirining eng sof ko‘rinishlaridan biri. Haaland Jahon chempionatidagi ilk ishtirokidayoq o‘zini to‘lqin ustidagi Viking eshkakchisi kabi tutyapti. Turnir tarixida dastlabki ikki o‘yinda ham kamida ikkita gol urgan oltinchi futbolchi bo‘ldi. So‘nggi 50 yilda buni faqat bitta o‘yinchi bajargan edi — 2018 yilda Harry Kane.
Norvegiya safidagi so‘nggi formasi esa deyarli irreal ko‘rinadi: u ketma-ket 12 ta rasmiy xalqaro uchrashuvda gol urgan. Oxirgi olti o‘yinda esa 16 ta gol. Bunday ritmni faqat alohida toifa hujumchilar ushlab tura oladi.
Eng qiziq joyi — umumiy terma jamoa statistikasi. Mbappe 100 ta o‘yinda 60 ta gol urgan bo‘lsa, Haaland 52 uchrashuvda 59 taga yetgan. Ya’ni u Mbappedan 48 ta o‘yin kam o‘tkazib, atigi bitta gol ortda qolgan, xolos.
Ikki yulduz, bitta sahna
Ularning Jahon chempionatidagi harakat xaritalari bir-biridan farq qiladi, ammo bitta haqiqatni tasdiqlaydi: ikkisi ham o‘z jamoasining markazida. To‘p qayerda bo‘lishidan qat’i nazar, xavf tug‘ilish ehtimoli Mbappe va Haaland atrofida keskin oshadi.
Avgust 2022 yildan beri Fransiya hujumlarining 44 foizida Mbappening izi bor: 33 gol, 17 golli uzatma. Norveya safida Haaland ham deyarli xuddi shunday darajada — 39 gol va 4 assist, jamoa gollarining 43,9 foizida bevosita ishtirok.
Farq shundaki, Fransiya bu yozni kubok uchun haqiqiy yurish sifatida ko‘ryapti. Ular favoritlar ro‘yxatining eng yuqori qatida. Hatto Haalandning o‘zi ham ochiq aytdi: u Fransiyaning Norvegiyani yengishiga va turnirni oxirigacha olib chiqishiga ishonadi.
Lekin bu taslim bo‘lish emas. Norveya, ayniqsa bunday formadagi Haaland bilan, har qanday grandga “qonli burun” hadya qila oladigan jamoa. Penalty maydonchasida undan kuchliroq, muntazamroq yirtqich deyarli yo‘q.
Boston Stadiumdagi bu kecha shunchaki guruhdagi birinchi o‘rin uchun o‘yin emas. Bu — hozirgi avlodning ikki eng dahshatli hujumchisi o‘rtasidagi ochiq sahnadagi duel. Savol bitta: qaysi biri ertaga nafaqat jamoasiga, balki butun turnir yo‘nalishiga muhr bosadi?
