NFL arenalarida rekordni parchalagan futbol biznesi
2026-yilgi Jahon chempionati hali guruh bosqichini ham tugatgani yo‘q. Ammo tribunalar allaqachon tarix yozib bo‘ldi.
Payshanba kungi o‘yinlargacha bo‘lgan 60 ta uchrashuvni jami 3 605 357 tomoshabin stadionlarda jonli kuzatdi. Bu raqam 1994-yilda o‘rnatilgan mutlaq rekordni ortda qoldirdi: o‘shanda 3 587 538 muxlis stadionlarga kelgandi. Endi esa eski ko‘rsatkich rasman yangilandi.
Eng hayratlanarlisi – to‘ldirilish darajasi. Ba’zi uchrashuvlarda bo‘sh o‘rinlar ko‘zga tashlanganiga qaramay, umumiy hisobda arenalar 99,7 foizga to‘lgan. Bu endi shunchaki turnir emas, tom ma’noda stadion biznesining namoyishiga aylanmoqda.
AQSh omili: ikki rekord, bir mezbon
Yangi rekordning ildizi aniq: mezbonlar ro‘yxatida yana AQSh bor. 1994-yilda barcha to‘qqizta stadion aynan shu mamlakatda joylashgan edi. Bu safar esa turnirni Meksika va Kanada bilan birga o‘tkazayotgan bo‘lsa-da, asosiy sahna baribir NFL arenalariga tegishli.
Turnirni ko‘tarib turgan infratuzilma ro‘yxati baland:
- MetLife Stadium (Nyu-Jersi)
- Lincoln Financial Field (Filadelfiya)
- Gillette Stadium (Boston yaqinida)
- Hard Rock Stadium (Mayami)
- Mercedes-Benz Stadium (Atlanta)
- Arrowhead Stadium (Kansas-Siti)
- AT&T Stadium (Dallas)
- Reliant Stadium (Xyuston)
- SoFi Stadium (Los-Anjeles)
- Levi’s Stadium (Santa Klara)
- Lumen Field (Sietl)
Bu arenalar odatda yakshanba kunlari NFL shoularini qabul qiladi. Endi esa ular global futbol sahnasini egallab, Jahon chempionati auditoriyasini yangi darajaga olib chiqmoqda. Katta shaharlar, transport qulayligi, tayyor infratuzilma – bularning barchasi kassalar uchun ideal kombinatsiya bo‘lib chiqdi.
Rekord hali yakun emas
Eng qiziq tomoni – bu faqat boshlanishi. 60 ta o‘yin ortda, yana 44 tasi oldinda. Guruh bosqichi hali tugamagan paytda rekord yangilandi. Pley-off, yarim final, final hali oldinda turganini inobatga olsak, yakuniy ko‘rsatkich yillar davomida yaqiniga ham kelish qiyin bo‘lgan marrani belgilashi kutilmoqda.
Savol o‘z-o‘zidan tug‘iladi: bu plankani kim va qachon oshiradi? Javob taxmin qilish qiyin bo‘lmagan darajada aniq – yana AQSh mezbonlik qilgan turnirda.
Keyingi mundiallar xaritasi va katta savol
Rasmiy taqvim allaqachon chizilgan. 2030-yilgi Jahon chempionati olti davlatga tarqaladi: Ispaniya, Marokash, Portugaliya, Argentina, Paragvay va Urugvay. 2034-yilda esa navbat Saudiya Arabistoniga keladi.
Shu fon’da 2026-yilgi raqamlar FIFA uchun aniq signal berayotgandek: AQSh bozorining qudrati, NFL arenalarining sig‘imi va infratuzilmasi turnirni nafaqat sport, balki moliyaviy tomondan ham mutlaqo boshqa darajaga olib chiqmoqda.
Shunday ekan, bitta savol tobora balandroq yangrayapti: FIFA 2038-yil uchun yana bir bor AQSh’ni taklif qilishni qanchalik tez o‘ylab ko‘radi?
