
- muallif:
- Jasur Ahmedov
ONE Championship Welterweight Title Bo‘shadi: To‘rt Yillik Sukunat Tugadi
ONE Championship bugun rasmiy qaror chiqardi: ONE Welterweight MMA World Title endilikda bo‘sh. Sabab bitta — uzoq davom etgan faoliyatsizlik.
To‘rt yil avval aynan shu kunda Christian Lee ushbu kamarni qo‘lga kiritgandi. O‘sha g‘alaba uning karerasidagi cho‘qqi bo‘lib ko‘ringan, lekin hayot rejasini o‘zgartirdi. Lee singlisi Victoria Lee ning kutilmagan o‘limidan so‘ng oktagondan chetga chiqdi, butun e’tiborini oilasiga va farzandlarining tug‘ilishiga qaratdi.
ONE shu og‘ir davrda chempionini siyladi: diviziondagi Jahon chempionlik janglari to‘xtatildi. Kamar qog‘ozda Lee nomida turdi, ammo vazn toifasi muzlab qoldi. Raqobat bor, lekin taxtga yo‘l yopiq — welterveytlar uchun aynan shunday manzara yuzaga keldi.
Yil boshida vaziyatni siljitish uchun harakat boshlandi. Tashkilot Christian Lee ga chempionlikni himoya qilish imkoniyatini taklif qildi. Lekin jang shartnomasini kelish va imzolashning imkoni bo‘lmadi. Oktagonga qaytish ssenariysi yozilmadi.
Shu nuqtada bosim oshdi. Divizionni kutish rejimida ushlab turish adolatdan uzoqlasha boshladi. Kamar atrofida navbat kutayotgan welterveyt jangchilar bor, reytinglar yangilanmoqda, lekin chempionlik yo‘li berk edi.
ONE Championship oxir-oqibat keskin, lekin zarur qarorga keldi: ONE Welterweight MMA World Title darhol kuchga kirgan holda bo‘sh deb e’lon qilindi.
Bu — taxt uchun ochiq ov qaytganini anglatadi. Endi savol bitta: kim birinchi bo‘lib bo‘sh qolgan kamar ortidan tushadi va welterveyt taxtini yangi davrga olib kiradi?