Palacios – yangi davrning markazidagi ism

Town nihoyat o‘zining eng yirik transferlaridan birini yopdi. Argentina bilan jahon chempioni bo‘lgan Exequiel Palacios kecha kechqurun Bayer Leverkusen safidan “ko‘klar”ga qo‘shildi va bu klub ichida ham, Premyer-liga ichida ham kuchli aks-sado berdi.

27 yoshli yarim himoyachi 2030-yil yozigacha mo‘ljallangan uzoq muddatli shartnomaga imzo chekdi. Bitim qiymati – 22,5 million yevro (19,2 million funt), ustiga-ustak, 5 million yevrogacha (4,3 million funt) bonuslar ko‘zda tutilgan. Leverkusen kelajakdagi sotuvdan 10 foiz ulush olishi kutilmoqda. Bu raqamlarning o‘ziyoq Town qanchalik jiddiy o‘yin kirityotganini ko‘rsatadi.

O’Neil: “Bu klub uchun ajoyib imzo”

Bosh murabbiy Gary O’Neil yangi kelgan yulduz haqida gapirar ekan, so‘zini tejamadi.

“U iste’dodli yigit, so‘nggi yillarda klub va terma jamoa darajasida ulkan muvaffaqiyatlarga erishgan”, – deydi u. – “Bu klub uchun ajoyib imzo. Yoz bo‘yi hamma bir yoqadan bosh chiqarib, loyihamizga odamlarni ishontirish uchun ishladi”.

O’Neil jamoa ichidagi kayfiyatning ham o‘zgarganini his qilmoqda. Uning fikricha, faqat yangi kelganlar emas, ancha vaqtdan beri bu yerda bo‘lganlar ham darajasini oshirmoqda.

“Dara O’Shea, Jacob Greaves, Leif Davis va boshqalar… So‘nggi sakkiz haftada klubdagi ishlar shunday darajada bo‘ldiki, biz bu mavsum nimanidir alohida qilishimiz mumkinligiga ishonayapmiz”, – deydi murabbiy.

Debyut – “Old Trafford” sahnasida?

Palacios, katta ehtimol bilan, darhol sahnaga tashlanadi. O’Neil buni yashirmadi.

“Yakshanba kuni uni ko‘rasiz, bunga ishonchim komil”, – dedi u. Gap Manchester United bilan o‘yinga borib taqaladi. Yangi yulduz uchun bundan yaxshi sinov bo‘lishi qiyin: Premyer-ligadagi ilk daqiqalar, darhol eng katta sahnalardan birida.

So‘nggi haftalarda Town qayta-qayta taklif yuborgan sari bu transfer tobora muqarrar ko‘rina boshladi. O’Neilning o‘zi esa Palaciosning qaroriga deyarli shubha qilmagan.

“Yo‘q, men uning kelishiga ishonganman. Eng qiyin qismi, ehtimol, klublar o‘rtasida kelishuv bo‘lgandir. Yigit bilan gaplashganim zahoti, u bu klub uchun o‘ynashni qanchalik xohlayotganini sezdim”, – deydi u.

Murabbiy bu holatning o‘ziyoq klubning o‘tgan yillardagi yo‘lini ko‘rsatishini ta’kidlaydi: “Bu klub qayerdan qayerga kelganini ko‘rsatadi. Bu yo‘lda hissa qo‘shgan har bir kishi faxrlansa arziydi”.

“Bu faqat boshlanish”

O’Neil shunga qaramay, o‘zini ham, jamoani ham xotirjamlikka berishni istamaydi.

“Bu yerda to‘xtab qolmaymiz, bu faqat boshlanish. Bularning barchasidan foydalanib, chegarani yana balandroq ko‘tarishga harakat qilishimiz kerak”, – deydi u.

Murabbiy Palaciosni nafaqat sifat, balki chuqurlik nuqtai nazaridan ham muhim bo‘lak sifatida ko‘radi.

“U fantastik qo‘shimcha. U bilan ishlashni intiqlik bilan kutyapman. Guruh uchun yana bir qatlam kuch qo‘shdik va bunga ehtiyojimiz bor. Oldinda 38 ta liga o‘yini, kuboklar bor. Imkon qadar ko‘proq futbolchiga ega bo‘lishimiz kerak”, – deydi u.

O’Neilning rejasida har bir chiziq to‘liq ta’minlangan bo‘lishi lozim: “Har bir pozitsiyada sifat, tajriba, yosh, atletiklik bo‘lishiga intilyapmiz. Premyer-liga nimani sinasa, hammasiga tayyor turishimiz kerak. Pala bizga maydon markazida haqiqiy sifat beradi”.

Nega aynan Town?

Palacios kabi darajadagi futbolchini yangi ko‘tarilgan klubga ishontirish oson emas. Lekin O’neilga ko‘ra, bu yerda hozir jozibador narsa ko‘p.

“U o‘zini Premyer-ligada sinab ko‘rishni xohlaydi, buni tushunaman – bu dunyodagi eng yaxshi, eng talabchan liga”, – deydi u. – “U allaqachon katta yutuqlarga erishgan, nihoyatda iqtidorli futbolchi. Endi esa aynan shu ligada o‘zini sinashni istadi”.

Murabbiy Palacios bilan dastlabki suhbatlarda yo‘l xaritasini aniq chizib berganini aytadi: “Biz unga loyiha haqida gapirdik, jamoa qanday o‘ynashini tushuntirdik, u qanday mos tushishini, uning roli bizga qanday yordam berishini ko‘rsatdik. Klub sifatida va iste’dodli futbolchi sifatida birgalikda qanday oldinga siljishimiz mumkinligi borasida qarashlarimiz juda mos tushdi”.

Bir haqiqat bor: Palacios jamoaga taktik jihatdan biroz kechroq ulanadi. “Yigitlar yetti-sakkiz haftadan beri birga ishlashdi, tushuncha va taktika borasida ancha oldinda. Palacios esa bu borada biroz orqaroqda bo‘ladi. Lekin u g‘alabaga chanqoq”, – deydi O’Neil.

Murabbiy Janubiy Amerikadan kelgan futbolchilar ruhiyatini yaxshi biladi: “U janubiy amerikalik. Men ularning ko‘plari bilan ishlaganman. Ular o‘yinga aql bovar qilmas darajadagi ishtiyoq, ehtiros olib keladi. G‘alabaga talpinadi. Bizga kerak bo‘ladigan barcha sifatlar unda bor”.

Bu transfer – butun liga uchun signalmi?

Palaciosning kelishi raqiblar uchun ham ishora bo‘lishi mumkin. Lekin O’Neil bunday savollarga boshqacha qaraydi.

“Boshqalar buni qanday qabul qilishini bilmayman. Men har shanba soat uchda bayonot berishga harakat qilaman. Men va jamoa uchun eng katta imkoniyat – aynan shu payt, hakam hushtagi chalinsa, biz qayerdaligimizni ko‘rsatamiz”, – deydi u.

Murabbiy uchun asosiy “imtihon qog‘ozi” – har haftadagi o‘yin: “Qolganini odamlar o‘zicha talqin qiladi yoki qilmaydi. Bizning imtihonimiz har hafta bo‘lib turadi”.

Shu bilan birga, u jamoa ichidagi kayfiyatni aniq tariflaydi: “Bizda kuchli diqqat va qat’iyat bor. Borib, mavsumni yaxshi boshlagan bo‘lsak, endi buni tasdiqlashni xohlaymiz”.

Ambitsiya murabbiyni ham, futbolchini ham jalb qilmoqda

O’Neilning o‘zi ham yozda Town’ni tanlaganida aynan shu omil – ambitsiya – hal qiluvchi bo‘lgan.

“Bu yerga kelish imkoniyatim haqida gapirgandim. Oldin ham Premyer-ligaga qaytish uchun takliflar bo‘lgan, lekin ular to‘g‘ri tuyulmagan”, – deydi u. – “Men Fransiyada juda yoqimli ishda edim, shunchaki birinchi taklifga sakrab chiqmoqchi emasdim. Bu yerning ambitsiyasi, murabbiylarga beriladigan qo‘llab-quvvatlash, klubning yo‘nalishi meni ishontirdi”.

Endi esa o‘sha ambitsiya futbolchilarni ham tortmoqda. “Yangi ko‘tarilgan klub bo‘la turib, biz hozirgacha qo‘lga kiritgan futbolchilarni jalb qila olayotganimiz – bu hammasini ko‘rsatib turibdi. Issa Diop, Sasa Lukic kabi Premyer-ligada o‘zini isbotlagan futbolchilar, dunyoning turli burchaklaridan kelgan o‘yinchilar…”, – deydi O’Neil.

U egalarga alohida minnatdorchilik bildiradi: “Egalar bergan qo‘llab-quvvatlash uchun juda minnatdorman. Ular bu klubni imkon qadar alohida qilishga qat’iy bel bog‘lashgan”.

Murabbiy transfer oynasida qilinayotgan ishlarni ham realistik kontekstga qo‘yadi: “Yaqin yillarda Championship’dan ko‘tarilgan jamoalarning tarixiga qarasangiz, Premyer-ligada raqobatbardosh bo‘lish uchun tarkibni sezilarli darajada kuchaytirish kerakligini ko‘rasiz. Biz ham aynan shuni qilishga harakat qilyapmiz”.

Savol endi bitta: Palacios boshchiligidagi yangilangan Town bu ambitsiyani maydonda nechog‘li tez va nechog‘li baland darajada isbotlay oladi?